هامسەرۆکەو گردی پارتوو دیموکراسی و یەکسانی گەلا (هەدەپ)ی تولای حاتەم ئۆغلارییە جە کۆبیەیۊ حەفتانەو فڕاکسیۆنەکەیشانە جە پەرلەمانەنە قسېش کەرڎۍ و هۊرسەنگنایش پۍ پەرسە گەرمەکا ڕۊی کەرڎ.

تولای حاتەم ئۆغلاریە هۊرسەنگنایش پې جەنگوو ئیسرائیلی و فەلەستینی کەرڎ و باسش چانەی کەرڎ کە جەهان تەنیا تەماشەو جەنگەکەی کەرۊ. ئانەیچش وست ڕووە، کە ئاڎۍ ئینۍ چنی گەلوو فەلەستینی و واتش، "فرەو جاری واتەنما، جارێوەتەریچ ماچمېشۊ؛ تا شمە درێژە بە پەیماننامە بازرگانی و سەروازییەکاتا چنی ئیسرائیلی بڎەیدۍ، شمە مەتاودۍ حیچ چېوۍ کەرڎۍ. شمە مەتاودۍ شان بە شانوو گەلوو فەلەستینی مردېوە".

هامسەرۆکەو گردی هەدەپی ناڕەزایش ۋەران ۋەر بە دەسەڵاڎدارا ئاکەپە-مەهەپەی نیشانەدا و واتش، "جە ئاژېوەنە کە تورکیانە قۊرتەو کوردی ئیناوەروو چەماوە و ڕۊشن و ئاشکران، گۊش پۍ بانگەوازەکا ئاشتی مەگېرا، ئایا شمە باسوو کامە ئاشتی و دڎان گېرتەی وېرە کەرڎۍ؟ ئەردۆغان جە بارەو جەنگوو ئیسرائیل - فەلەستینیوە ماچۊ جەنگ ویژدانوو گەلا هۊرتەکنۊ. ئانەی ماچۊ 'شەوێوە پڕېنە متاومۍ بەیمۍ' و بە شەوو ڕووۍ کوردا بۆردومان کەرۊ؛ سەرۆککۆمارو ئی دەسەڵاتینە و بیەن بە ' خۊتان ویژدان' و ئی قسا کەرۊ".

هحاتەم ئۆغلارییە ئانەیچش وست ڕووە، کە بە پەشتیوانی، رێکوستەی و کۊشیای ئېشەکا ۋېشا کەمکەراوە.

گۆشەگیری ئیمراڵی

حاتەمئۆغلارییە جە بەشێوەتەروو قسەکاشانە ۋەران ۋەر بە گۆشەگیری جە ئیمراڵیچ ناڕەزایش بەربڕی و ئەرەیاۋناش، "پۍ ئانەی بەرە ڕووەو چارەسەری دیموکراتیکینە کریۊوە، ئێمە درێژە بە کۊشیای ۋېما مڎەیمۍ. جە ڕاسینە چاگە تاوانێوە میان نەتەوەییە ئەنجام مڎریۊ. دژایەتی یاسای و مرۆڤایەتی کریۊ. جە حیچ وڵاتێوە جەهانینە نییا کە حیچ زانیاریېوە جە بارەو ئینسانېوە زینڎانیۊ ۋەردەس نەبۊ. رووە جە وەزیروو داڎی کەروو، بە جابەجێکەرڎەی قەراروو گېرتەی وەروو رێکارەکا کە جە لایەن و کۆمسیۆنوو مافەکا مرۆڤی و نەتەوەیۊگېرتەکاوە بەرشیەن و زیاڎ جە ساڵێوەش سەرەرە ویەرڎەن، پۍ چی هەنگامېوە ئەوتۆ نەگیرانەنە ۋەر. چا مژارەنە مشۊم دەمودەس ئەرکو ۋېشا جابەجێ کەرا. داوا جە کۆمیتەو ڕاگیری جە ئەشکەنجەو ئەنجومەنوو ئەوروپای (سی پی تی) کەروو؛ ئەرکوو ۋېشا جابەجېکەرا، سەردای ئیمراڵی کەرا و بە تایبەتی جە بارەو تەندروستی بەڕێز ئۆجالانی و ئاژەو دوورگەکەی پۍ رای گرڎی ئاشکرا کەرا، کە ئینەیچ داواکاریی ملۋېنان ئینسانان. گەلوو کوردی تامەزرۊو زانای ئاژەو دلۍ دوورگەکەیا. گەلا ۋەرکەوتوو میامینی بە تامەزرۊییۊ تەماشەش کەرا. هۊرگېرتەی گۆشەگیری دژواری یاردیدەرۍ گەورەن پۍ چارەسەروو قۊرتەکا گەلا جە ۋەرکەوتوو میامینی، بەتایبەتیچ دمایی ئارڎەی بە جەنگی جە غەززەنە. حەرپۊکەی ماچمۍ مشۊم دەمودەس دمایی بە گۆشەگیری بېنە.

ئێمە قۊرتەو کوردی بە هۆشمەندیېوە ئاشتیانە و یەکسان سەرو بەستێنی و بوارێوە دیموکراتیکی چارەسەر کەرمۍ. کەس ئاورا و لانەواز و بێ یانە و حاڵ نەبۊ. گرڎ کەسۍ وېرەگا متاوۆ وارڎەی بەرۊوە پۍ یانەی. بێئانەی خەموو ئاینڎەیشا بۊ متاوا بە ئاسودەیی واردەکەیشا وەرا. وەختوو بێدەنگی و تەماشەکەرڎەی نییا. پۍ رزگاری کۆمەڵایەتیما وەخت و ئامای دەنگی و چالاکیی و کردەوان".