تەڤگەروو ژەنا کوردی جە ئەوروپانە (تەژەکە-ئە) هجوومەکۍ ٢٧و گوڵانی جە دژوو چالاکی ئێشکگیری ئازاڎیی شەرمەزارۍ کەردۍ. جە وەختێنە ماوەو ١٢ ساڵان چالاکی ئێشکگیری ئازاڎیی شاروو ستراسبۆرگوو فەرەنساینە بەردەواما.
ڕۊو ٢٧و گوڵانی گرووپێوە تورکی نەژاڎپەرس هجوومش کەرد سەروو چالاکی 'ئێشکگیری ئازاڎیی' کە ماوەو ١٢ ساڵان پەی مسۆگەرکەردەی ئازاڎیی جەستەیی ڕابەروو گەلو کوردی عەبدوڵا ئۆجالانی و ماڕای گۆشەگیری بەردەواما. جە وەختوو لووای ڕاوەو چالاکیەکەینە هجوومکەرەکۍ هجوومشا کەرد سەروو چالاکیەکەی و دروشمۍ و تابلۆکۍ چالاکییەکەیشا ماڕۍ و پەرش و وەڵاوێشا کەردۍ.
پەوەیس پا ڕوودایۆ تەژەکە-ئە بە ئەرەیاۋنێوە نویسیا ئا هجوومێشە شەرمەزارۍ کەردۍ و داواش جە دەوڵەتوو فەرەنسای کەرد دژوو ئی حۆڵە ئاژاوە گێڵنیا ڕاوجای پێویس بگێرۊنە ۋەر.
جە ئەرەیاۋناکەینە ئامان: "چالاکی ئێشکگیری ئازاڎیی ماوەو ١٢ ساڵان بەردەواما، ڕێکوستەکا ژەنا جە چوارچێوەو هەڵمەتەو "ئازاڎیی پەی عەبدوڵا ئۆجالانی، چارەسەری سیاسی پەی پرسوو کوردی"نە چنڎین چالاکیێشا ئەنجام دێنۍ و نامەشا پەی سی پی تی کیاستەن، کە پێویسا ئا ئەرەمەرزیۍ ئەرک و ۋەرپرسیاری یاسایی ۋێشا جابەجێبکەرا و ئیتر جە ئاستوو گۆشەگیری ئیمراڵینە بێدەنگۍ نەبا."
جە درێژەو ئەرەیاۋناکەینە تەژەکە-ئە ئاماژەش پانەی دا سیاسەتەکاو تاونایۆ، جەنگ و فشار جە هەر چوار پارچەو کورسانینە زیاتەرۍ بیێنۍ و ماچۆ: "چی دماییەنە جە ئەوروپا، کە ۋێش بە پارێزنەروو ئارامی و دیموکراسی وەسف مکەرۆ، جە چوارچێوەو سیاسەتوو تاوانبارکەردەی کوردانە چنڎین هجوومۍ جۆربەجۆرۍ کریێنۍ سەروو کوردا. ئی هجوومۍ ئانەی بەروزا کە دەوڵەتوو فەرەنسای بیەن بە ئامرازوو سیاسەتوو قڕکەردەی کوردا کە جە تەرەفوو تورکی فاشیستیوە بریۆڕاوە. ئامانجوو ئی هجووما پەی تەرسنای و چەوەسنایۆین، کە حەجگیز مەتاوۆ هەنگامېوە کێشۊماوە دماوە. بە پێچەوانەوە ئی هجوومۍ بیۍ بە مەڵامەتۍ کە زیاتەر کۊشیەیمۍ."
چی ڕوانگۆ هجوومەکۍ دژوو ئێشکگیری دادپەرەوەری شەرمەزارۍ مکەرمۍ و داوا جە دەوڵەتوو فەرەنسای مکەرمۍ دژوو ئی حۊڵە ئاژاوەگێڵنیا ڕاوجای پێویس بگێرۊنە ۋەر."
