کۆبییەیوەی ناوبەروو کۆن-مەدی ٢٢ و ٢٣ێ حوزەیرانینە بە دروشموو "ئەنجوومەنوو گەلی بمەرزنمێرە، چاندی و زوانیما بپارێزنمێ" بە بەشداربییەی زیاتەر جە ٥٠٠ ئەنداما شاروو کۆڵنوو ئەڵمانیاینە کریا.  کۆنگرەکەنە جەخت کریاوە چانەیە کە پنەوازا دژوو تاوانبارکەردەی کوردا خەباتێوی قەوەت بکریۆ.

کۆنگرەکەنە نرخنای دەربارەو پراکتیکەکاو ساڵێ کریا و تیشکە وزیا سەروو کەموکەسرییەکا و پەی هەرمانەکاو دمایی سەرنجەکێ ورگیریێ.

یۆ جە بابەتە گرنگەکاو کۆنگرەکەی مدرای بێ سەروو هەڵمەتەو "ئازادیی پەی عەبدوڵا ئۆجالانی، چارەسەری سیاسی پەی پەرسەو کوردی" کە ماوەو ٨ مانگان دەسش پەنە کەرەن، جەخت کریاوە سەروو گرنگیی هەڵمەتەکێ، هەرپاسە برەودای بە هەڵمەتەکێ کە بە شێوێوی زیاتەر و کاریگەرتەر هەرمانەکێش بکریانە.

دماو دووێ ڕوا جە کۆبییەیوەکەینە بەردەوام و گفتوگۆکەردەی ئەنجامنامەو کۆنگرەی بەروزیا.

گرنگتەرین خاڵەکاو کۆنگرەکەینێ:  

*جەختکەردەیوە جە وەرفراوانکەرەی خەباتی  پەی چەسپنای و ئشناسنای دەسکەوتەکاو گەلوو کوردی بە گردی، لە هەمان وەختەنە پەی ئشناسای ستاتۆو ڕاوەبەریی خۆسەریی سەرنیشت و وەرکەوتوو سوریای و ستاتۆو شەنگالی لاو دەوڵەتوو ئەڵمانیایوە.

*پەرەدای بە هەرمانە دیبلۆماسییەکا و قەوەتکەردەی پەیوەندیی بەینوو ڕێکوزیا مەدەنییەکا، سەندیکا و پارتە سیاسییەکاو ئەڵمانیای.

*هەرمانە و خەبات بکریۆ پەی پەروەردەکەردەی بە زوانی کوردی و ئاشناکەردەی شناسنامەی کوردی  سەرانسەروو ئەڵمانیاینە.

*پەی گردوو ئەنداماو نەچەدەکەی پەروەردەو کۆرسوو زوانی کوردیی بکریۆوە.

*پەشتگیریکەردەی بە بەهرەکاو گەنجا، بەتایبەت بوارو وەرزشینە.

خەباتی یاسای، سیاسی و دیبلۆماسی بکریۆ پەی دماییئاردەی  بە قەدەغەکەردەیەکاو سەروو سیمبوڵ و عەلەمەکاو تەڤگەروو ئازادیی کوردستانی و ڕێکوستەیە کوردستانییەکا و هەرپاسە دماییئاردەی بە گێرتەی سیاسەتمەدارا.