وڕناو ڕژێمو ئەسەدی پ سووریانە جە ٨و کانوونو دووەمینە هامسەنگی سیاسی و سەروازیش چا وڵاتەنە فاڕا. حەر چنە وڕناو ڕژێمی بەتەمامەتی دمایس بە ململانێ و گرژییەکا ناردەن، بەڵام گلێرگەی مییاننەتەوەیی بە خێرایی وێشا جە گرووپیو تەحریر شام (هەتەشە) نزیک کەردۆ و سەبارەت بە بنیاتنیاو سووریێوە تازەی دەسشا بە گفتوگۆی کەرد.

محەممەد جولانی، سەرۆکو ڕێکوزیاو هەتەشەی کە سەرۆکایەتی قۆناغو ڕاگوزەریش گێرتەن دەس، هەتا ئیسەیچ پێسەو سەرۆکو گروپێوە چەکداری تەماشە کریۆنە، بەڵام کاسایەتیە جەهانییەکێ چەمەڕاو ئانەی مکەرا فاڕیۆنە و بۆنە بە کەسایەتیێ سیاسی جە پرۆسەو ئاوەدانکەردەیۆ سووریاینە. جە لێوەتەرۆ هرووژمەکێ دۆڵەتو تورکی و چەتەکاش کە گۆرەترین لایەنگرو گروپو جیهادی هەتەشەینێ، پەی سەرو ناوچەکا ئیدارەو وێ ڕاوەبەری سەرنیشتوو و وەرکەوتوو سووریای بەردەوامێنێ. جە هرووژمە ئاسمانییەکا ئی دماییەی بەدەیان هاموڵاتیێ مەدەنیێ کە فرەیشا ژەنی و زاڕۆڵێ بێنێ گیانسا جەدەسدا.

ئولالیا ڕێگوانتە، نوێنەرەو پارتو کوپی جە پەرلەمانو کەتەلۆنیای، سەبارەت بە هرووژمەکا دۆڵەتو تورکی و چەتاکاش پەی سەرو وەرنیشتی چنی ئاژانسو هەواڵو فوراتی (ANF) قسێش کەردە.

'مافو ژیوای جە گەلوو کوردی مساناوە'

ئولالیا ڕێگوانتە، سەبارەت بە هرووژمەکا دۆڵەتو تورکی پەی سەرو وەرنیشتی ئەرەیاوناش: "دۆڵەتو تورکی جە سەرەتاو ئەرەمەزنارەو سیستەمو وەرنیشتی بەردەوام هرووژم مکەرۆنە سەرو ناوچەکەی و بەتایبەت گەلوو کوردی. چێگەنە باس جە جەنگێ دوولایەنەی مەکەرمێنە، بەڵکووم باس جە کردەوێوە ئاشکراو ئەرەگیری مکەرمێنە. دۆڵەتو تورکی بە ئاشکرا گەلا مەدەنیێ ناوچەکەی مکەرۆنە ئامانج و کۆمکوژێشا مکەرۆ. جە کاتێنە وەرنیشت هیچ تەرسیش نییەنە پەی تورکیای، ئامانجو سەرەکی دۆڵەتو تورکی و چەتەکاش، ئەرەگیری و سانایۆ مافو ژیواین جە گەلوو کوردی."

'نمەبۆ گلێرگەی مییاننەتەوەیی بێدەنگ بۆنە'

ئولالیا ڕێگوانتە جە قسەکاشەنە ئاماژەش پانەیەدا کە ئەردۆغان سەرۆککۆماریپو تورکیای ئینا هەوڵو زینە کەردەیۆ هەژموونو عوسمانیینە جە ناوچەکەنە و ئەرەیاوناش کە مەبۆنە گلێرگەی مییاننەتەوەیی جە وەراوەرو ئی دۆخەینە بێدەنگی هورچنۆنە،

دۆڵەتو تورکی چێرخانو مەدەنی و سەرچەمەو وزەی و مییانو ئاوەو هاموڵاتیا بە ئامانج گێرۆنە و گەرەکشا دۆخو ژیوای هاموڵاتیا قورس بکەرۆ و ناچارشا مکەرۆ دەس جە یاگێ  و یانەو وێشا وەردا و کۆچ بکەرا. گلێرگەی مییاننەتەوەیی پەنەوازا سەرنج سەرو ئا چێوا دۆنەو کە جە ناوچەکەنە ڕووە مڏانە و ڕاشکاوانە ڕاگیری جە سیاستەکا دۆڵەتو تورکی گێرانە."

'پەنەواز بە  وریایی و دیقەتی هەن'

ئۆلالیا جەختش چانەیش کەردۆ کە وڕاو ڕژێمو ئەسەدی گرنگ بێ، بەڵام مرۆڤ مشۆم سەبارەت بە حکومەتو هەتەشەی وریا بۆنە  و واتش: "بە وەرچەم گێرتەی کردەوەکا ویەردەی و ئیسەو هەتەشەی، مشۆم مرۆڤ بە هۆشیارییۆ نزیک بۆوە. ئێمە مزانمێنە کە هەتەشە تاریخێ ئیسلامی تنڕەوش هەن، هەرپاسە ویناما ئی گروپە جەهادییە جە وەرنیشتەنە و کۆبانێنە کۆمکوژیشا کەرد. پۆکەی مشۆم گرڏ ئینشا پەی ئایندەو سووریای وەرچەم گیریانە."

'پەنەوازا مۆدێلو وەرنیشتی جە گرڏو سووریاینە پەرەش پنە بڎریۆ'

ئولالیا جە دماینو قسەکاشەنە ئەرەیاوناش؛ پەنەوازا سیستەمو وەرنیشتی پارێزنمێ و پێسەو مۆدێلێوە پەی ئایندەو سووریای هەژمارش کەرمێنە، هامکاتەنە گرنگا سیستەمو دیموکراتیکی و کۆمەڵایەتی وەرنیشتی بۆبپنە مۆدێلێوە پەی گرڏو سووریای. بنیات نییاو دۆڵەتێوە تەری جگە چینەی نەک دیموکراسی پەی ناوچەکەی نمارۆ، بەڵکووم زیاتەر نائارامی خوڵقنۆنە و واتش: "مۆدێلو وەرنیشتی سەرچەمەو هیوایێ گۆرەن، نەک تەنها پەی سووریای و ناوچەکەی، بەڵکووم پەی تورکیاچ هیوایێ گۆرەن."