جە 'رۆئەژماروو گۆشەگیری'ی ئۆهەدەینە ئانە وزیان ڕووە کە ماوەو یەرۍ ساڵان هیچ زانیاریێوە جە بارەو ئیمراڵییوە ۋەردەس نییا و ئاماژە پانەی کریان، کە ئاژەو بێهەواڵی و نەبیەی زانیاری بە شێوێوە رەها ئینا ئارانە.
حۆتەم ژمارەو 'رۆئەژماروو گۆشەگیری' کە ١٥ ڕووۍ جارێ جە تەرەفوو جەمەو مافناساوە پەی ئازاڎیی (ئۆهەدە)ی وەڵاکریۆوە، کۊت ۋەروودەم و ۋەنەراش.
جە ڕۆئەژمارەکەنە کە بە ئامانجوو ئاگاڎارکەردەیۆ گلېرگەی جە گۆشەگیری زینڎانی ئاسایشوو بەرزی جە جۆروو ئێف و ئیمراڵی وەڵاکریۆوە، ئانەش یاڎ وستۆ کە زانیاری هورنەگێرتەی جە رابەروو گەلوو کوردی عەبدوڵا ئۆجالانی و زینڎانیا تەری حامیلی یڵدرم، وەیسی ئاکتاش و عومەر خەیری کۆناری کە ئینۍ گۆشەگیریێوە قورسەنە، پاش وستەن مانگەو ٣٨ە مینیوە.
جە ڕۆئەژمارەکەنە ئانەیچ وزیان ڕووە، کە ئیمراڵینە ماوەو ٢٤ ساڵا و دووۍ مانگا و ١٨ ڕووان گۆشەگیری هەن، ٤ ساڵۍ و مانگێوە و ٣٠ ڕووێن بنەیانەکۍ نەتاوانشا دیڎار ئەنجام بڎا، ٤ ساڵۍ و دووۍ مانگۍ و ٢٦ ڕووێن پاڕێزنەرا نەتاوانشا دیڎار ساز بکەرا و سەرنجشا وستەن سەروو ئانەی کە دووۍ ساڵۍ و ١٣ مانگۍ و ٧ ڕووێن مامەڵەو 'زانیاری هوەرنەگێرتەی رەها'ی ئینا ئارانە.
ئۆهەدە باسش جە جوابوو ڕاوەبەرایەتی گرڎیینوو زینڎانەکا سەر بە وەزارەتوو دادی کەردەن، پەی داواکارییەکەو پارتوو یەکسانی دیموکراسی (دەم پارتی) کە جە ٧و کانوونوو یووەم و ٢٠٢٣ێنە وەڵاکریابێوە. جە ئاگاڎییەکەنە کە بە نامونیشانوو "وەزارەتوو دادی نکۆڵیش جە گۆشەگیری کەرد" پی جۆرە ئامان: "جە تەرەفوو ڕاوەبەرایەتیەکەیۆ بانگەشە کریان کە جە زینڎانوو ئیمراڵینە گۆشەگیری رەها بیەیش نییا و زینڎانیا بە شێوێوە یەکسان جە گرڎ مافە یاسایی و رێساییەکاشا ئیسفاڎە مکەرا. نوسینگەو یاسایی سەڎەیچ ئی پرسیارێشە ئاراسەو وەزارەتوو دادی کەردە 'دمایین جار کەی دیڎار ئەنجام دریان'.
جە ڕۆ ئەژمارەکەنە ئاماژە بە ئاژەو وەیسی ئاکتاشی جە زینڎانوو ئیمراڵینە کریان کە ئازاڎکەردەکەیش پەی ماوەو یەک ساڵی دما وزیان و ئانە وزیان ڕووە کە ئەرەیاۋییان ئاکتاش کە زینڎانوو ئیمراڵینە زینڎانییا، بە پاو ئا خشتەیەی ماوۍ چێوەڵتەر داواکاری گرڎیی کۆماری جە بورسانە ئاماڎەش کەردەبۍ، ئشیۍ جە ٢٨و نیسانوو ٢٠٢٤ینە ئازاڎ کریۍ، بەڵام بە قەراروو لوجنەو چەمڎاری و کارگێڕی ئازاڎ کەردەکەیش ساڵێوە دما وزیان.
حەرپاسە جە ڕۆ ئەژمارەکەنە ئامان، کە قەرارەکە دژوو یاساین و پی جۆرە وچیان، "ئا قەرارە کە بە ماناو زەوتکەردەی ئازاڎیی بەڕێز ئاکتاشین، رادەسوو پاڕێزنەرا نەکریان".
ئۆهەدە جە ڕۆئەژمارەکەنە ڕا پەی چالاکی بە داواو "ئازاڎیی پەی رابەروو گەلوو کوردی عەبدوڵا ئۆجالانی و چارەسەری دیموکراتیکی پەی پرسوو کوردی" کریانۆ، کە جە تەرەفوو زینڎانیاوە ملۆڕاوە. جە پەڕەو دووەموو ڕۆئەژمارەکەینە جگە جە چالاکی "بایکۆتی" کە جە زینڎانەکانە بەردەواما، قسۍ سەرۆکوو کۆمیتەو ڕگێرتەی جە ئەشکەنجەو ئەوروپای (سی پی تی) ئالان میشێلی وزیان ڕووە کە باسش چانەی کەردەبۍ، کۆمیتەکە ساڵەو ٢٠٢٢ سەردای ئیمراڵیش کەردەن، گوزارشتەش ئاماڎۍ کەردېنە، بەڵام وەڵا کەردەیشۆ پەنەوازش بە رەزامەنڎیی و ڕا پنەدای تورکیاین.
یۆ جە بەشدارا کۆنفرانسوو ١١و نیسانی جە پەرلەمانوو ئەوروپای، جە پارێزنەرا سەندیکاو پارێزنەرا پاریسی ژان پرۆسەر سەروو ئاستی یاسایی گۆشەگیری جە ئیمراڵی و مامەڵەو سی پی تی دژوو گۆشەگیری ئاماژە پنەکریای هۊرسەنگنایش کەردەن و ئا مژارەیچە جە بوڵتەنوو ڕۆئەژمارەکەینە وەڵاکریانۆ.
