وته‌بێژی هه‌ده‌په ئه‌برو گونای وتی، "تاكه رێگای ئاشتی له‌م وڵاته، كردنه‌وه‌ی ده‌رگاكانی ئیمراڵییه". گونای بانگه‌وازی له گه‌لان، هێزه‌كانی دیموكراسی، هونه‌رمه‌ندان كرد كه له به‌ر سیاسه‌تی شه‌ڕی ده‌سه‌ڵاتداری بوه‌ستنه‌وه.
وته‌بێژی پارتی دیموكراتیكی گه‌لان (هه‌ده‌په)ئه‌برو گونای له ناوه‌ندی گشتیی پارته‌كه كۆنفرانسی رۆژنامه‌وانی هه‌فتانه‌ی سازكرد.
گونای باسی له‌وه‌كرد، كه هه‌وڵ ده‌درێت قه‌یرانی ئابوری له وڵات به قه‌یرانه‌كه له ده‌ره‌وه‌ی سنووره‌كان په‌رده‌پۆش بكرێت و وتی، "دواتر ناوی مانه‌وه و كێشه‌ی ئه‌منی له‌سه‌ر داده‌نێن و هه‌وڵ ده‌ده‌ن كۆمه‌ڵگا بخه‌ڵه‌تێنن. سه‌رۆكی ئاكه‌په ئه‌ردۆغان ئاشكرای كرد كه ئۆپراسیۆن له سوریا بكه‌ن. ئایا ئامانجه‌كه كوێیه؟ بێگومان ئامانجه‌كه رۆژئاوایه. له‌م جیهانه‌دا له كوێ كورد هه‌بێت ئه‌و شوێنه ده‌كرێته ئامانجی ئه‌ردۆغان. ئامانجه‌كه كوردن كه له دژی هێرشه‌كانی داعش خۆڕاگرییان كردووه و ده‌ستكه‌وتیان به‌ده‌ستهێناوه"
هێرشه داگیركارییه‌كان
ئه‌برو گونای له درێژه‌دا وتی، "رووسیا به شه‌ڕی ئۆكرانیاوه سه‌رقاڵه، به هه‌ڕه‌شه‌ی ڤیتۆكردنی ئه‌ندامێتی فینله‌ندا و سوید له ناو ناتۆ ده‌رفه‌تی بۆ هه‌ڵكه‌وت كه له‌گه‌ڵ ئه‌مریكا سه‌ودا و مامه‌ڵه بكات. واته ده‌سه‌ڵاتداری گۆڕه‌پانی نێونه‌ته‌وه‌یی به چۆڵی بینی جارێكی تر رووی كرده‌وه كوردان و ده‌ستكه‌وته‌كانیان. به سیاسه‌تی دوژمنایه‌تی كوردان له ناوخۆ و ده‌ره‌وه ده‌یه‌وێت هه‌ڵبژاردن بكات. به‌م جۆره ده‌یه‌وێت كه به شه‌پۆلی نه‌ته‌وه‌په‌ره‌ستی هاوبه‌شه بچوكه‌كه‌ی له‌گه‌ل له‌گه‌ڵ خۆی بهێڵێته‌وه و ده‌سه‌ڵاتداری خۆی به‌هێز بكات. ئه‌ویش ده‌زانێت كه ئیتر كۆتاییان پێدێت و پێی وایه به سه‌ركوتی كوردان ده‌توانێت له‌و دۆخه رزگاری بێت. شه‌ڕێك له سوریا، شه‌ڕێك له دژی رۆژئاوا، جگه له ئازار هیچ شتێك به كورد ناگه‌یه‌نێت. ئه‌و به هه‌ژاری بۆ گه‌لانی توركیا ده‌گه‌ڕێته‌وه".
'چاره‌سه‌ری له‌گه‌ڵ ئۆجالان ده‌سته‌به‌ر ده‌بێت'
ئه‌برو گونای باسی له‌وه‌كرد، كه ئاشتی نه‌بێت دیموكراسی و ئازادیش نابێت و وتی، "رێگای ئاشتی به ئیمراڵیدا تێده‌په‌ڕێت. ئێمه ده‌زانین كه یه‌ك له پێداویستییه به‌په‌له‌كانی گه‌لان له‌سه‌ر ئه‌م خاكه ئاشتییه. ئاشتی نه‌بێت، دیموكراسیش نابێت، ئازادیش نابێت. تاكه رێگه‌ی ده‌سته‌به‌ركردنی ئاشتیش به كردنه‌وه‌ی ده‌رگاكانی ئیمراڵی ده‌بێت. له‌به‌ر ئه‌وه‌ش پێویسته ده‌رفه‌ت هه‌بێت كه به‌ڕێز ئۆجالان بتوانێت رۆڵی خۆی بۆ بونیاتنانی ئاشتی سه‌ر له‌نوێ بگێڕێت. جیهان هه‌مووی بینی كه ئه‌گه‌ر ده‌رگاكانی ئیمراڵی بكرێنه‌وه ئه‌و كاته‌یه ده‌رفه‌تی ئاشتی و ئازادی بۆ گه‌لان زیاتر ده‌بن، هیوای پێكه‌وه ژیانی گه‌لان گه‌وره‌تر ده‌بێت".
ناڕه‌زایه‌تی به‌رامبه‌ر بێده‌نگی و ده‌وڵه‌تان
ئه‌برو گونای باسی له‌وه‌كرد كه هێرشه‌كان له‌سه‌ر شه‌نگال و باكوری و رۆژئاوای سوریا، هه‌ڕه‌شه‌كان بۆ سه‌ر مه‌خمور و هێرشه ئاسمانییه‌كان هێمای به‌رچاوی دوژمنایه‌تی له‌گه‌ڵ كوردانن و وتی، " له وه‌ها دۆخێكدا كه ئه‌و هه‌مووه هێرش ده‌كرێن و مه‌ده‌نییه‌كان گیان له‌ده‌ستده‌ده‌ن، رێكخراوه نێونه‌ته‌وه‌ییه‌كان وه‌ك نه‌ته‌وه‌یه‌كگرتووه‌كان بێده‌نگن.
كۆنسێپتی شه‌ڕ له دژی كوردان، جگه له هه‌وڵی به‌هێزكردن و مانه‌وه‌ی كورسی ده‌سه‌ڵات هیچ شتێكی تر نییه. ئه‌و هه‌وڵه له ناوخۆ به دۆسیه‌ی فرت و فێڵی كۆبانێن دۆسیه‌ی داخستن له دژی پارته‌كه‌مان، ده‌ستگیركردن و زیندانی كردن. هه‌روه‌ها له دژی رۆژئاوا پلانێكی هێرش له ئارادایه، ئه‌و پلانه‌ش پلانی قڕكردنی كوردانه، له‌ناوبردنی هه‌بوونی كوردانه. ئه‌و پلانه نه‌ك هه‌ر له دژی گه‌لی كورده، له هه‌مان كات له دژی داهاتووی هه‌مو گه‌لانه. هێزه دیموكراسیه‌كان، رۆشنبیران، هونه‌رمه‌ندان، رێكخراوه جه‌ماوه‌رییه دیموكراتیكه‌كان له توركیا ده‌بێت له‌به‌رامبه‌ر ئه‌و گه‌مه چه‌په‌ڵه‌ی ده‌سه‌ڵاتداری بوه‌ستنه‌وه. ئه‌مه به‌رپرسیارێتی مێژوویی گه‌لانی ئه‌م خاكه‌یه".
هـ . ب
