دەستەى بەڕێوەبەریی ناوەندیی پارتی دیموکراتیکی گەلان (هەدەپە) بە بۆنەى ساڵیادی کۆمەڵکوژیی زیلانەوە راگەیاندراوێکی بڵاوکردەوە.

لە راگەیاندراوەکەدا هاتووە، ٩١ ساڵ بەسەر کۆمەڵکوژیی زیلان دا تێدەپەڕێت، کە یەکێک لە ئەنجامەکانی گوشار، زۆرداری و توندوتیژیی کۆمارە لە دژی داواکانی گەلی کورد.

هەدەپە رایگەیاند، ژنان، منداڵان و بە تەمەنەکان و بە گشتی دەیان هەزار مرۆڤ لەو کۆمەلکوژییەدا کوژران و هێشتا وەک یەکەم رۆژ لە بیر و یادی گەلی کورددایە.

لە راگەیاندراوەکەدا هاتووە، "٤٤ گوند سوتێنران و بۆ چەندین رۆژ رووباری زیلان خوێنی قوربانییانی لەبەر دەڕۆیشت. ئەوانەشی لە کۆمەڵکوژییەکە رزگاریان بوو، بە زۆر ناچار بە کۆچبەری کران و دەست بەسەر ماڵ و موڵکیان دا گیرا. دەسەڵاتی ئەو سەردەمە بۆ ئەوەى سەربازەکان، جاش و جەردەوانەکان، چەکدار و میلیشیاکان و بکوژە مەدەنییەکان وەک بەرپرسیاری ئەو کۆمەڵکوژییە سزا نەدرێن و لە هەر جۆرە سزادانێک پارێزراو بن، یاسای بۆ دەرکردن و ئەوەش بووە هۆی روودانی کۆمەڵکوژی نوێ و دیکە. سیاسەتی نکۆڵیکردن و لە ناوبردن، کە لە زیلان بووە هۆی روودانی کۆمەڵکوژی ئەمڕۆ هەمان ئەو سیاسەتە لەلایەن ئاکەپەوە بە شێوازی جۆراجۆر بەڕێوەدەچێت".

لە راگەیاندراوەکەدا باس لەوە کراوە، بۆ بونیاتنانی داهاتوویەکی رووناک و دیموکراتیکی گەلان، دەبێت حساب و لێپرسینەوە بکرێت لە کۆمەڵکوژیی زیلان و هەموو ئەو ژان و ئازارەی بەهۆی ئەو کۆمەڵکوژییە روویانداوە و ئاماژە بەوەشکراوە، "ئێمە بە رێزەوە یادی ئەو دەیان هەزار کەسە رادەگرین، کە ژنان و منداڵان و کەسانی بە تەمەنیان لە ناودا بوو و لەو کۆمەڵکوژییەدا کرانە قوربانی و لە یادیان ناکەین. کۆمەڵکوژی و ئازارەکانی سەر ئەم خاکە پاساو و هۆکارمانە بۆ ئافراندنی وڵاتێکی ئازاد و دیموکراتیک. بۆ ئەوەی بەرپرسیارانی کۆمەڵکوژی لە بەرامبەر مێژوودا ئیدانە بکرێن و سزا بدرێن، ئێمە درێژە بە تێکۆشانەکەمان دەدەین".

ژ.ت