کەمپەینی ئیمزا بۆ ئازادیی عەبدوڵا ئۆجالان رێبەری گەلی کورد لە هەر چوار لای ئەوروپاوە بەردەوامیی هەیە. لە چوارچێوەیەدا دوێنێ لە پۆستەخانەی ڤینێر پلاتز لە ناوچەی مولهیم لە شاری کۆڵنی ئەڵمانیا ٥ هەزار و ٥٠٠ نامە بۆ نەتەوە یەکگرتووەکان نێردرا.

پێش ناردنی نامەکان راگەیاندرا، بە پێشەنگایەتیی ناوەندی کۆمەڵگەى دیموکراتیکی کورد و ئەنجوومەنی ژنان لە کۆڵن و دەورووبەریدا هەڵمەتی کۆکردنەوەى ٥ هەزار ئیمزا و نامەیان رێکخست، بەڵام تاوەکو ئێستا ٥ هەزار و ٥٠٠ نامە کۆکراوەتەوە.

حوسێن تەمەل چالاکوانی ناوەندی کۆمەڵگەى کورد لە کۆڵن رایگەیاند، لە کۆڵن و دەورووبەریدا پلانەکە بە ئامانجەکەى خۆی گەیشتووە، بەڵام لە هەڵمەتەکانی تردا، کە بەردەوامییان هەیە زیاتر و باشتر کار بۆ کۆکردنەوەى ئیمزا دەکەن و دەیانەوێت ئەو ژمارەیە بە ٦ هەزار بگەیەنن.   

لەو نێوانەدا ماتیو پالمار جێگری وەزیری دەرەوەی ئەمریکا بۆ کاروباری ئەورویا، کە لە ٤ی تشرینی دووەمی ٢٠١٨دا لە کاتی سەردانەکەیدا بۆ ئەنقەرە رایگەیاندبوو، ١٢ میلۆن دۆلار بەو کەس و کەسانە دەدەن، کە شوێنی بەڕێوەبەرانی کەجەکە جەمیل بایک، موراد قەرەیلان و دوران کاڵکان دیاری دەکەن.

ناوەندی کۆمەڵگەى دیموکراتیکی کورد لە کۆڵن لەوبارەیەوە راگەیاند، بۆ هەڵوەشاندنەوەى ئەو بڕیارە لەسەر بەڕێوەبەرانی کەجەکە نامە بۆ جۆ بایدن سەرۆکی ئەمریکا دەنێرن و داوای لێدەکەن ئەو بڕیارە هەڵبوەشێنێتەوە.

ژ.ت