لە شاری حەلەب دەربارەی ڕەوشی گەڕەکەکانی شێخ مەقسوود و ئەشرەفیە کە زۆربەی دانیشتووانەکەیان کوردن، لەنێوان ئەنجوومەنی مەدەنی هەردوو گەڕەکەکە و شاندێکی دەسەڵاتی دیمەشق ڕێککەوتنێکی ١٤ خاڵی واژۆکرا.
ئەنجوومەنی مەدەنی گەڕەکەکانی شێخ مەقسوود و ئەشرەفیەی حەلەب و شاندێکی دەسەڵاتی دیمەشق، لەسەر ڕەوشی هەردوو گەڕەکەکە ڕێککەوتن.
ئەم ڕێککەوتنە بەرئەنجامی ئەو ڕێککەوتنەیە کە لەنێوان هێزەکانی سوریای دیموکراتیک (قەسەدە) و دەسەڵاتی دیمەشق واژۆکرا و لە ١٤ خاڵ پێکدێت.
خاڵەکانی ڕێککەوتنەکە بەم جۆرەن:
١- پاراستن و ڕێزگرتن لە تایبەتمەندییە کۆمەڵایەتیی و کەلتوورییەکانی دانیشتوانی گەڕەکی شێخ مەقسود و ئەشرەفیە، لەپێناو بەهێزکردنی ژیانی هاوبەش و ئاشتیی.
٢- ئەم ڕێککەوتنە کاتییە کارایە تا ئەو کاتەی لیژنە هاوبەشەکان ڕێککەوتنێکی دوورمەودا واژۆ دەکەن.
٣- وەزارەتی ناوخۆ و وەزارەتی بەرگریی بەرپرسیارن لە پاراستنی دانیشتوانانی هەردوو گەڕەک.
٤- لەپێناو پاراستنی ئاسایش و سەلامەتی دانیشتوانی هەردوو گەڕەکەکە، چەک لەناو گەڕەکەکانی قەدەغە دەکرێت و تەنها دەبێت چەک لە دەستی هێزە ئەمنییەکانی سەر بە وەزارەتی ناوخۆ هەبن.
٥- تا ئەو کاتەی دۆخی گەڕەکەکان ئارام دەبێتەوە، لەسەر ڕێگاکان ساتر درووست دەکرێت و خاڵی پشکنین لەلایەن هێزە ئەمنییەکانی سەر بە وەزارەتی ناوخۆوە دادەنرێت.
٦- هێزە سەربازییەکان بە چەکەکانیانەوە لە هەردوو گەڕەکەکەوە بەرەو ڕۆژهەڵاتی فورات دەکشێنەوە.
٧- لە هەردوو گەڕەکی گەڕەکی شێخ مەقسود و ئەشرەفیە، دوو ناوەندی هێزە ئەمنییەکانی سەر بە وەزارەتی ناوخۆ دەکرێنەوە.
٨- هاتوچۆکردنی دانیشتوانی هەردوو گەڕەکەکە ئازادانەیە و بەبێ ڕێگری کردنە، نابێت کەسێک کە دەستی بە خوێنی سوورییەکان سوور نەبووبێت دەستگیر بکرێت.
٩- لەپێناو ئاسانکردنەوەی هاتوچۆ لەنیوان حەلەب و هەرێمەکانی باکوور و ڕۆژهەڵاتی سووریا، کۆمیتەیەک لە ئاستی کۆردیناسیۆن پێک بهێنرێت.
١٠- لەپێناو جێبەجێکردنی ئەم ڕێککەوتنە، کۆمیتەی پەیوەندیدار لە هەردوو گەڕەکەکە پێکدەهێنرێت.
١١- بەبێ جیاوازیکردن لە نێوان گەڕەکەکانی حەلەب، تەماشای هەردوو گەڕەکەکە و دەزگا و ڕێکخراو و ئەنجوومەنە مەدەنییەکانی بکرێت.
١٢- دیل بە دیل دەکرێت و سەرجەم زیندانییەکانی یەکتر ئازاد بکرێت، کە لەلایەن هەردوولاوە لە پاش هەڵمەتی ڕزگارکردن، دەستگیر کراون.
١٣- نوێنەرایەتی هەردوو گەڕەکەکە بەشێوەیەکی گشتیی و یەکسان، لە ئەنجوومەنی پارێزگای حەلەب و لە ژووری بازرگانی و هەموو ژوورەکانی تر، بەگوێرەی یاسا دەکرێت.
١٤- دەزگا و ڕێکخراو و فەرمانگە خزمەتگوزارییەکان و بەڕێوەبردن و پەروەردە و شارەوانی و ئەنجوومەنە خۆجێییەکان، هەتا ئەنجامدانی ڕێککەوتنێکی بەردەوام و دوورمەودا لەلایەن هەردوو کۆمیتەکەوە، وەکو خۆیان دەمێننەوە.
