لە باکور و ڕۆژهەڵاتی سوریا، پلاتفۆرمی چالاکی هاوبەشی بزووتنەوە و ڕێکخراوەکانی ژنان، لە چوارچێوەی ٢٥ ی تشرینی دووەم ڕۆژی جیهانی تێکۆشان دژی توندوتیژی بەرامبەر ژنان، بەرنامەی چالاکییەکانی ئاشکرا کرد.
پلاتفۆرمی چالاکی هاوبەشی بزووتنەوە و ڕێکخراوەکانی ژنان لە باکور و ڕۆژهەڵاتی سوریا، هەموو ساڵێک چالاکییەکانی ٢٥ ی تشرینی دووەم ڕۆژی جیهانی تێکۆشان دژی توندوتیژی بەرامبەر ژنان، ئاشکرا دەکات.
پەیوەست بەمە، پلاتفۆرمەکە لە شارەکانی قامیشلۆ و ڕەقە ڕاگەیاندراوی خوێندەوە.
بەگوێرەی ڕاگەیاندراوەکە، درووشمی چالاکییەکی ٢٥ ی تشرینی یەکەمی ئەمساڵ وەهایە: "لەژێر درووشمی "دژی هەموو جۆرە توندوتیژی و داگیرکارییەک، ژن-ژیان-ئازادی".
لە ڕاگەیاندراوەکەدا، سڵاوکرا لە ژنانی کوردستان و دۆستانی کوردان لە هەر چوارپارچەی کوردستان کە دژی توندوتیژی پیاوان و دەوڵەت بەرخۆدان دەکەن، هەروەها زیندانییە سیاسییەکانی دەوڵەتی ئێران ئەو ژنانەی دژی داگیرکردنی خاکەکەیان دەوەستنەوە.
ئاماژە بەوە کرا، سیاسەتی "ڕژێمی بەعس" و دەوڵەتی داگیرکەری تورک و ئەو گرووپانەی پشتگیریان لێ دەکەن مەترسییە بۆ سەر ژنان، تیشکخرایە سەر فشار و قڕکردن دژی ژنان لە هەرێمە داگیرکراوەکانی سوریا.
لە درێژەدا، پشتیوانی بۆ ژنانی ڕۆژهەڵاتی کوردستان و ئێران و شۆڕشی "ژن، ژیان، ئازادی" دووپاتکرایەوە.
بەگوێرەی ڕاگەیاندراوەکە چالاکییەکان بەبۆنەی ٢٥ ی تشرینی دووەمم لە ١٣ هەتا ٢٥ ی تشرینی دووەم بەردەوام دەبن.
چالاکییەکان بەم جۆرەن:
-لە ١٤ تا ١٩ی تشرینی دووەم لە کۆمەڵە و گوند و کەمپ و دامەزراوەکان سیمینار ئەنجام دەدرێت.
- ڕۆژی ١٨ی تشرینی دووەم هێزەکانی پاراستنی ژنانی جەوهەری ڕێپێوانێک لە سەرتاسەری هەرێمی جزیر ڕێکدەخات.
-پەروەردەی کراوە لە هەموو بوارەکاندا بۆ پیاوان بۆ ماوەی ٣ ڕۆژدا دەکرێتەوە.
- ڕۆژی ٢٤ ی تشرینی دووەم هەڵمەتی هاشتاگ لە تۆڕە کۆمەڵایەتییەکان دەستپێدەکات.
- دیدار و کۆبوونەوە و دیالۆگ لەسەر ئاستی سوریا و ڕۆژهەڵاتی ناوین و لە تۆڕە کۆمەڵایەتییەکان ئەنجام دەدرێت.
- نمایشێکی شانۆیی بە ناوی "بەسە توندوتیژی" لە هەموو هەرێمەکانی باکور و ڕۆژهەڵاتی سوریا نمایش دەکرێت.
- زنجیرە سەردانێک بۆ گوندی ئافرەتان (ژنوار) ئەنجام دەدرێت.
- بڵاوکردنەوەی بروشورەکانی بانگەشەکردن سەبارەت بە ڕۆژی جیهانی تێکۆشان دژی توندوتیژی بەرامبەر ژنان.
- ڕێپێوانێکی پاسکیلسواری بۆ ژنانی گەنج بەڕێوەدەچێت و دروشمی دژی توندوتیژی و داگیرکاری بەرز دەکرێنەوە.
- ڕۆژی ١٤ تشرینی دووەم، هیلال زێرین پێشانگای تابلۆ لە سەرتاسەری باکور و ڕۆژهەڵاتی سوریا ئەنجام دەدات.
- هەر بزووتنەوە و ڕێکخراوێکی ژنان بەگوێرەی بەرنامەی خۆی، خەباتی جۆراوجۆر ڕێکدەخات.
- لە باکور و ڕۆژهەڵاتی سوریا لەسەر ئاستی کانتۆنەکان، ڕێپێوانی جەماوەری ڕێکدەخرێت.
