ئەمڕۆ بە بەشدارییەکی زۆری ژنان، لە بەردەم باخی گشتیی سلێمانی، مەڕاسیمێکی تایبەت بۆ پیرۆزکردنی ڕۆژی جیهانیی ژنان ٨ـی مارس ڕێکخرا و تیایدا خەڵاتی ڕێزلێنان بە سێ ژنە مانگرتووەکەی سلێمانی بەخشرا، هەروەها خەڵاتی ساڵانەی یەکسانیی درا بە بەهار مونزیر.

لە مەڕاسیمەکەدا، ڕێکخراوەکانی بواری ژنان، ئەندامی پارتە سیاسییەکان، ژنانی چالاکوان و ئازادییخوازان و ژمارەیەکی زۆر لە ژنان بەشداربوون، بە جلوبەرگی کەلتووریی کوردییەوە.

هەر لە مەڕاسیمەکەدا سێیەمین خەڵاتی ساڵانەی یەکسانیی بەخشرایە بەهار مونزیر و خەڵاتی ڕێزلێنانیش درا بە سێ ژنە مامۆستا مانگرتووەکە و دواتر کۆنگرەیەکی ڕۆژنامەوانییان ئەنجامدا.

لە کۆنگرەکەدا شەدە بەشیر، ڕۆژنامەنووس و ئەندامی کەمپەینی ٨ـی ئادار وتی: "بەبۆنەی ڕۆژی جیهانیی ژنانەوە ڕێز لە خۆڕاگری تەواوی ژنانی کوردستان و جیهان دەگرین، هاوکات چەوساندنەوەی سیستەمی پیاوسالاری و سەرمایەداری ڕەتدەکەینەوە.

لە بەردوامییدا شەدە بەشیر گوتی: "لە هەرێمی کوردستان لەگەڵ هەوڵ و خەباتەکان لەپێناو باشترکردنی ژیانی ژنان کەچی بەبیانووی نامووسەوە دەیانکوژن، ساڵانێکە حکومەتی هەرێم ئامارەکانی کوشتنی ژنان ڕاناگەیەنێت، لەکاتێکدا کەمپەینی کوشتنی ژنان مانگی ڕابردوو ڕایانگەیاند کە لەماوەی ساڵی ڕابردوودا ٤٨ حاڵەتی کوشتنی ژن تۆمارکراوە، هەروەها بەپێی هەواڵە میدیاکییەکان لەماوی دوو مانگی ڕابردوودا هەشت حاڵەت تۆمارکراوە."

بەم جۆرە کۆتایی بە قسەکانی هێنا: "ئەرکی حکومەتە کە ئەم ڕەشەکوژییەی سەر ژنان ڕابگرێت و بیانپارێزێت، بەڵام ئەو بێباکانە لە ئاست ئەم تاوانانە بێدەنگە، تا ئێستا هیچ پلانێکی پێشکەش نەکردووە بۆ کەمکردنەوە و بنبڕکردنی ئەم دیاردە قێزەونە."

دواتر ژنان بە ڕێپێوان لەبەردەم باخی گشتییەوە بە وتنەوەی درووشمی "ژن، ژیان، ئازادیی"بەرەو شەقامی سەهۆڵەکە بەڕێکەوتن و مەڕاسیمەکەیان گۆڕی بە ڕێپێوان.