تەڤگەری ئازادی ژنانی ئێزدی شەنگال (تاژێ) بەبۆنەی ٨ ی ئادار، ڕۆژی جیهانیی ژنانی کرێکارەوە کەمپەینێکی نێونەتەوەیی دەست پێ کرد. کەمپەینەکە لە ١٠ هەمین ساڵیادی کۆمەڵکوژی شەنگال و قڕکردنی ژنان ڕاگەیاندرا. کەمپەینەکە بە درووشمی "دژی توندوتیژی سەر ژن، ببنە دەنگی خۆپاراستن" تا ٣ ی ئابی ٢٠٢٤ بەردەوام دەبێت. ڕێکخستنی چەتری مەجلیسی ژنانی ئێزدی ئەڵمانیا (سەمەژێ) بە ڕاگەیاندراوێک داوای کرد لەڕێگەی وێنە و دیمەن و نوسین و گۆرانی و هەڵبەست و گردبوونەوە و ڕێگەی ترەوە بەشداری کەمپەینەکە بکرێت.

سەمەژێ لە ڕاگەیاندراوەکەیدا تیشک دەخاتە سەر ڕۆڵ و گرنگی تاژێ لە ڕێکخستنی ژنان دژی توندوتیژی، دووپاتی دەکاتەوە تاژێ بووەتە دەنگی خۆپاراستنی ژنان، هەروەها ئاماژە بەوە دەکات پێ دەنێنە ١٠ هەمین ساڵیادی فەرمانی ٣ ی ئابی ٢٠١٤ کە بەهۆی هێرشی داعشەوە جینۆساید و کوشتنی ژنان لە شەنگال پێکهات، دەیان هەزار کەس کە ملکەچی ئایدۆلۆژیای دڕندانەی داعش نەبوون، کوژران یان ڕفێنران و بەکۆیلە کران.

سەمەژێ تیشک دەخاتە سەر بەرخۆدانی ژنان و پیاوانی شەنگال و دامەزراندنی یەکینەکانی بەرخۆدانی شەنگال (یەبەشە) و یەکێتی ژنانی شەنگال (یەژەشە)، بەرگریان کرد و زێدی خۆیان جێنەهێشت، ئەمەش بووە هاندەری گەڕانەوەی زۆر کەس بۆ ماڵی خۆیان.

لە ڕاگەیاندراوەکەی سەمەژێ هاتووە: "ئامانجی هەڵمەتەکەی تاژێ، کۆکردنەوەی دەنگ و واژۆ و پشتگیری ژنان و ڕێکخستنی ژنانی جیهانە. لەم چوارچێوەیەدا پێویستە یەکگرتن و تێکۆشانی نێونەتەوەیی ژنان ببینرێت و بەهێزتر بکرێت".

سەمەژێ پشتگیری و هاوکاری خۆی بۆ کەمپەینەکەی تاژێ دووپات دەکاتەوە و بانگەواز لە هەمووان دەکات: "بە شێوەی داهێنەرانە، بە وێنە و ڤیدیۆ و نوسین و گۆرانی و هەڵبەست و گردبوونەوە و شتی تر، بەشداری کەمپەینەکە بکەن".

لە کۆتایی ڕاگەیاندراوەکەدا هاتووە: "بۆ پشتگیری و بەشداربوون لە کەمپەینەکە؛ تکایە لەسەر بناغەی "دژی توندوتیژی سەر ژنان، ببنە دەنگی خۆپاراستن" کارەکانتان بەردەوام بکەن و بینرێت بۆ ناونیشانی [email protected] ".