بزوتنەوەی ژنان ئازاد (تەژەئا) لە دژی ئازادکردنی پلەدارێک بە ناوی ئەیوب. ک کە لە نسێبین دەستدرێژی کردبووە سەر ٤ منداڵ، لە ستیلیەی نسێبین کۆنفڕانسێکی رۆژنامەوانی سازکرد و رێپێوانی ئەنجامدا.

 دایکانی شەممە، چالاکوانانی تەژەئا، رکخستنەکانی هەدەپە لە مێردین، پەرلەمانتاری هەدەپ بێریتان گونەش و چەندین ژنی شارەکە بەشدارییان لە کۆنفڕانسە رۆژنامەوانیەکەدا کرد.

هاوسەرۆکی هەدەپەی نسێبین شیندار ئاکنجی لە چالاکیەکەدا کە پلاکاری "چەتە دەستدرێژیکارەکان باجی تاوانەکەیان دەدەن"ی بەرزکرابووەوە، قسەی کرد و رایگەیاند، ژنانی کورد بە شێوەیەکی سیستماتیک رووبەڕووی شەڕی تایبەت کراونەتەوە.

 شیندار ئەوەشی خستەڕوو، "سەرباری ئەوەی سیاسەتەکانی ئەشکەنجە، توندوتیژی و دەستدرێژی بۆ سەر ژنانی کورد پەرەی سەندووە، بەرخودانی ئێمەی ژنانیش پەرەی سەندووە و هەڵکشاوە. ئێمە بە بۆنەی ٢٥ی تشرینی دووەم / نۆڤەمبر رۆژی جیهانی بەرەنگاربوونەوەی توندوتیژی دژی ژنان بەڵێنی گوڕدان بە بەرخودان رادەگەیەنین".

بێریتان گونەش پەرلەمانتاری هەدەپیش ئەوەی خستەڕوو کە سیاسەتی شەڕی تایبەتی دەوڵەت ریسوا و شەرمەزار دەکەن و لە دژی هەموو چەشنە سیاسەتیکی چەپەڵ تێدەکۆشن.

هـ . ب