دایکی ئاشتی سیمانپەری ئاک یڵدز لە ئیستەنبول لە نەخۆشخانە گیانی لە دەستدا. سیمانپەری خەڵکی ناوچەى تاتوانی بەدلیس بوو. نەخۆشیی دڵ و ئاسم (هەناسە تەنگی)ی هەبوو و بەو دۆخەوە تووشی نەخۆشیی کۆرۆنا بوو و لە دوای ١٥ رۆژ لە چارەسەری کۆچی دوایی کرد.

سیمانپەری هەموو کات لە تێکۆشانی ئازادی، ئاشتی و یەکسانیدا  لە ریزی پێشەوەی چالاکییەکان بوو. سیمانپەری یەکێک لە دایکانی لەچک سپی بوو، کە لە چالاکییەکاندا بە بەردەوامی لەلایەن پۆلیسەوە دەکرایە ئامانج و هێرشی دەکرایە سەر و توندوتیژیی بەرامبەر ئەنجام دەدرا. لە ساڵی ٢٠٢٠ و لە کاتی چالاکیی مانگرتنی زیندانیاندا وەک دایکی یەکێک لە مانگرتووەکان بەشداری چالاکی بوو، بەڵام لەلایەن پۆلیسەوە هێرشی کرایە سەر  و بە زەویدا راکێشرا.

هەروەها دایە فاتمە عایشە ئارسلان دایکی محەمەد ئارسلان هاوسەرۆکی پێشووی دەبەپە کۆچی دوایی کرد. دایە ئارسلان لە ئەدەنە دەمایەوە و ماوەیەکی زۆر بوو لە نەخۆشخانە لە ژێر چارەسەریی پزیشکیدا بوو و دوێنێ کۆچی دوایی کرد.

تەرمی فاتمە عایشە ئارسلان ئەمڕۆ لە ناچەى نیزپ لە دیلۆک بە خاک دەسپێردرێت.

ژ.ت