ئەمڕۆ، ڕژاک لە شاری سلێمانی لە باشوری کوردستان، بە کۆنفرانسێکی ڕۆژنامەوانی بەرنامەی زنجیرە چالاکییەکانی بۆ ٢٥ ی تشرینی دووەم ڕۆژی جیهانی تێکۆشان دژی توندوتیژی بەرامبەر ژنان ئاشکرا کرد.

ڕاگەیاندراوەکە لەلایەن ئەندامی ڕژاک، شەیما نەبیل خوێنرایەوە، تێیدا گوترا: "وەکو ئەرکێکی ژنانە و ئەخلاقیانە دژی هەموو ستەم و توندوتیژیی و کۆمەڵکوژکردنی ژنانین، ئیتر ئەو کوشتنانە بە بیانوی "نامووس" یان هەر جۆرە بیانوویەک، تیرۆر و  بۆردوومانکردن بێت لەسەر خاکی خۆمان بە مەبەستی داگیرکاریی، چونکە ئەو ژنانەی تیرۆر دەکرێن لەلایەن داگیرکارانەوە و  ئەو ژنانەشی دەکوژرێن لەژێر ناوی "نامووس" و ئەو ژنانەشی کڕین و فرۆشتنیان پێوە دەکرێت بە هەمان ئەقڵ دەکرێن، کە دژە ژن و دژە مرۆڤن".

لە درێژەی ڕاگەیاندراوەکەدا هاتووە، بۆ زیاتر هۆشیارکردنەوەی جڤاک بە ئەرکی خۆمانی دەزانین تێبکۆشین و خوشکانی میرابەل بەبیربێنینەوە و تێکۆشانەکەیان بەردەوام بکەین، کە دژە ستەم تێکۆشاون.

دەربارەی کات و شوێنی چالاکییەکان گوتی: "وەک ڕژاک، لە سلێمانی و کەرکوک و ڕانیە و گەرمیان، ئەگەریش قوتابخانەکان بکرێنەوە سیمینار بۆ خوێندکاران ڕێکدەخەن. هەروەها چالاکییەکان لەشێوەی ڕێپێوان و ڕاگەیاندراو و بڵاوکراوە ئەنجام دەدەین".