بەگوێرەی هەواڵێ میدیاکانی ئێران، دادگای تێهەڵچوونەوەی رەشت سزای سەپێندراو بە سەر ١١ چالاکوانی مافەکانی ژنانی وەک خۆی و بە بێ هیج گۆڕانکاریەک پەسەندکرد.

ئەو ١١ چالاکوانە لە ١٦ ی ئابی ٢٠٢٣ دا لە ئەنجامی هەڵکوتانی هێزەئەمنییەکان بۆ سەر ماڵەکانیان لە شارەکانی رەشت، بەندەر ئەنزەلی، لاهیجان و فومەن دەستبەسەر و دوای شەش مانگ دەستبەسەری بە دانانی بارمتەی قورس بە شێوەی کاتی ئازاد کرابوون.

لە دانیشتنی دادگادا زوهرە دادڕەس بە تۆمەتی پێکهێنانی گروپ بە ئامانجی تێکدانی ئاسایشی نیشتمانی سزای شەش ساڵ و یەک رۆژ زیندان و بە تۆمەتی "کۆبوونەوە و پیلانگێری" سزای ٣ ساڵ و شەش مانگ و یەک رۆژ زیندان واتە بە کۆی گشتی سزای ٩ ساڵ و شەش مانگ و ٢ رۆژ زیندانی بەسەردا سەپێندراوە.

هەریەک لە نگین رەزایی، مەتین یەزدانی، ئازادە چاوەشیان، فروغ سەمیع نەژاد، سارا جیهانی، زەهرا دادڕەس، یاسمین حەشدەری و شیوا شاهپەسند بە تۆمەتی "کۆبوونەوە و پیلانگێڕی" سزای ٣ ساڵ و شەش مانگ و یەک رۆژ زیندان و بە تۆمەتی ئەندامبوون لە گروپ سزای ٢ ساڵ و حەوت مانگ و١٦ رۆژ (واتە هەرکامێکیان بە کۆی گشتی سزای شەش ساڵ و یەک مانگ و ١٧ رۆژ) زیندانیان بەسەردا سەپێندراوە.

دوو لەو دەستبەسەرکراوانەش بە ناوەکانی جیلوە جەواهری و هومەن تاهیری بە تۆمەتی بانگەشە دژی دەسەڵات هەرکامێکیان سزای یەک ساڵ زیندانیان بۆ بڕاوەتەوە.

لەدوای دەستپێکردنی سەرهەڵدانی ژن، ژیان، ئازادی هێزە ئەمنییەکانی ئێران گوشارەکانیان بۆ سەر چالاکوانانی ژن چڕتر کردووەتەوە و دەیان ژنە چالاکوان دەستگیر و راپێچی زیندان کراون.

هـ . ب