دەیان ژنی کۆچبەری عەفرین دژی بەشداربوونی چەتە حاتەم ئەبو شەقرا، بکوژی سکرتێری گشتی پارتی سوریای ئایندە هەڤرین خەڵەف لە کۆنگرەی دیمەشق لە ڕۆژی چوارشەممە لە ٢٩ ی کانوونی دووەم، لە شاری قامیشلۆ چالاکییەکیان ئەنجامدا.

بەشداربووان لقە زەیتون و پانکارتی "ئێمە دەگەڕێینەوە عەفرین" و "گەڕانەوەیەکی سەلامەتمان دەوێت"یان هەڵگرت.

لە چالاکییەکەدا بە زمانی کوردی و عەرەبی ڕاگەیاندراو خوێنرایەوە، بەشداربوونی سەرکردەکانی چەتەکانی دەوڵەتی داگیرکەری تورکیان لە دوایین کۆنگرەی دیمەشق شەرمەزار کرد.

ژنان بانگەوازیان لە ڕێکخراوەکانی مافی مرۆڤ کرد لێپرسینەوە لە چەتەکان بکرێت و لە دادگای سزای نێونەتەوەیی دادگایی بکرێن.

لەم بارەیەوە، ئەنجوومەنی دادی کۆمەڵایەتی کانتۆنی جەزیرە ڕاگەیاندراوێکی لەبەردەم بینای دادگای شاری قامیشلۆ خوێندەوە، بەشداربوونی بکوژان و چەتەکانی لە ئایندەی وڵات شەرمەزار کرد و داوایان لە ڕێکخراوە نێونەتەوەییەکان کرد، ئەم بکوژانە لە دادگا نێونەتەوەییەکان دادگایی بکرێن.