ئه‌ندامی فه‌رمانداره‌تیی گشتیی یه‌په‌گه نه‌ورۆز ئه‌حمه‌د ڕایگه‌یاند، دوای شه‌ڕی دژ به داعش یه‌په‌ژه له‌گه‌ڵ خه‌باتی پاراستن و هه‌ڵمه‌ته‌كانی هێزه‌تایبه‌تییه‌كاندا، كاری ڕێكخستن و تێكۆشانی جڤاكی ده‌كات.
نه‌ورۆز ئه‌حمه‌د ئه‌ندامی فه‌رمانداره‌تیی گشتیی یه‌كینه‌كانی پاراستنی ژن (یه‌په‌ژه) كه هاوكات فه‌رمانده‌یه‌كی هه‌ڵمه‌تی گه‌رده‌لوولی جزیره ده‌رباره‌ی ڕۆڵی یه‌په‌ژه دوای شه‌ڕی داعش بۆ ئاژانسی هه‌واڵی فورات (ANF) دوا.
ده‌رباره‌ی به‌شداربوونی یه‌په‌ژه له هه‌ڵمه‌تی گه‌رده‌لوولی جزیر نه‌ورۆز ئه‌حمه‌د گوتی، «یه‌په‌ژه به وره، تامه‌زرۆیی و پێداگرییه‌كی گه‌وره ده‌ستی به هه‌ڵمه‌ته‌كه كرد. ئێمه ویستمان داعش به ده‌ستی یه‌په‌ژه كۆتایی پێبێت. ده‌مانزانی هه‌ڵمه‌ته‌كه زه‌حمه‌تی زۆری هه‌یه، به‌ڵام هێزه‌كانیشمان ئه‌زموونی شه‌ڕیان هه‌بوو.»
نه‌ورۆز ئه‌حمه‌د ڕایگه‌یاند، «زۆرێك له هێزه‌كانی یه‌په‌ژه به‌شدارییان كرد له هه‌ڵمه‌ته‌كه. هه‌موو هێزه‌كانمان له‌پێناو ڕزگاركردنی ژنانی ئێزدی له ده‌ستی داعش زۆر تووڕه بوون. ئێستا شوێنێكی زۆر بچووك له ده‌ستی داعشدا ماوه. وه‌ك ئه‌وه‌ی ئێوه‌ش ده‌یبینن هێزه‌كانی یه‌په‌ژه له ڕیزه‌كانی پێشه‌وه‌ن. له مه‌ترسیدارترین شوێنه‌كانن. ئێمه پێداگرین له‌سه‌ر ئه‌وه‌ی هه‌تا ساتی كۆتایی له‌م شه‌ڕه‌دا به‌شدار بین. ئه‌مه وه‌ك ئه‌ركێكی سه‌رشانمان ده‌بینین. باوه‌ڕمان وایه له ماوه‌یه‌كی كورتدا مژده‌ی سه‌ركه‌وتن ده‌ده‌ینه هه‌موو ژنانی دونیا.»
«دوای شه‌ڕی داعشیش ئێمه هه‌ر هه‌ین»
نه‌ورۆز ئه‌حمه‌د هێمای بۆ ئه‌وه كرد، ئێستا كاری سه‌ره‌كی بۆ ئه‌وان ته‌واوكردنی شه‌ڕی ئه‌و به‌ره‌یه دژی داعش. گوتی: «ئێمه هیوادارین له ماوه‌یه‌كی كورتدا هه‌ڵمه‌ته‌كه ته‌واو بێت. بێگومان فه‌رمانداره‌تیی یه‌په‌ژه به‌شداری كردووه له هه‌موو هه‌ڵمه‌ته‌كانی قه‌سه‌ده و له‌م باته‌ته‌دا له هه‌موو كه‌س زیاتر چاومان له‌سه‌ر به‌رپرسایه‌تیی خۆمان بوو. دوای شه‌ڕی به‌ره‌كه‌ش، به هه‌موو شێوه‌یه‌ك و به‌باشی به‌شداری له هه‌ڵمه‌ته‌كانی دیكه‌دا ده‌كه‌ین. چونكه داعش له كه‌سایه‌تیی ژناندا ئیراده‌ی گه‌لانی شكاندبوو. له شه‌نگال بۆچی ئه‌وه‌نده پیاویان كوشتن و ژنه‌كانیان ڕفاندن. له دوایین هه‌ڵمه‌تدا بینیمان كه هاوسه‌رگیرییان به منداڵانی ته‌مه‌ن بچووك كردووه. هاوسه‌رگیرییان به ژن له‌گه‌ڵ زۆر پیاو كردووه. له شه‌نگال، كۆبانێ و ناوچه‌كانی دیكه ویستیان واتای ژن بكوژن. هێرشه‌كانی داعش له سه‌ره‌تاوه له كه‌سایه‌تیی ژناندا بۆ كوشتنی ژیان، بۆ له‌ناوبردنی واتای ژن له‌نێو كۆمه‌ڵگه بوو.»
ئه‌و فه‌رمانده‌یه گوتیشی، «شه‌ڕی به‌ره‌كه له دژی داعش له كۆتاییدایه. به‌ڵام داعش ڕایگه‌یاندووه كه له ڕێی شانه نووستووه‌كانییه‌وه هێرش ده‌كات. به‌ڕاستیش هێرشه‌كانی ئه‌وان به‌رده‌وام ده‌بن. له زۆر شاری ئێمه ته‌قینه‌وه ده‌كه‌ن و هێرش ده‌كه‌نه سه‌ر خه‌ڵكی سیڤیل. بێگومان ئه‌مه مه‌ترسییه‌كی گه‌وره‌یه.»
«هێزه‌تایبه‌ته‌كانمان به ئه‌ركی خۆیان هه‌ڵده‌ستن»
فه‌رمانده‌كه‌ی یه‌په‌ژه باسی له‌وه كرد، یه‌په‌ژه هێزی خۆپاراستن و زیهنیه‌تی پاراستنی ڕه‌وای ژنی بۆ خۆی به‌بنه‌ما گرتووه و به‌م شێوه‌یه دامه‌زراوه. بێگومان له‌م بابه‌ته‌دا بۆ ماوه‌یه‌كی درێژ تێده‌كۆشن.
ناوبراو گوتی: «له ئێستا به‌دواوه هێزه‌تایبه‌ته‌كانی ژنان له هه‌ڵمه‌ته‌كانی داهاتوودا به‌شداری ده‌كه‌ن. چونكه شه‌ڕی له‌مه‌ودوا دژی داعش زیاتر پێویستی به پڕۆفیشناڵی هه‌یه. له‌م چوارچێوه‌یه‌دا ئه‌و هێزانه‌مان كه په‌روه‌رده كراون و ئاماده‌كراون پێشه‌نگایه‌تی بۆ هه‌ڵمه‌ته‌كه ده‌كه‌ن. هه‌موو هێزه‌كانی یه‌په‌ژه به گوێره‌ی ئه‌م هه‌ڵمه‌ته خۆیان ئاماده ده‌كه‌ن.»
تێكۆشانێكی به‌هێزی جڤاكی
نه‌ورۆز ئه‌حمه‌د ڕایگه‌یاند، پڕۆسه‌ی دوای كۆتایی هاتنی داعش له به‌ره‌ی شه‌ڕ، ماوه‌یه‌كی درێژ به‌رده‌وام ده‌بێت. گوتی: «ئاستی جڤاكی هه‌یه كه ئێمه پێی ده‌ڵێین هه‌ڵمه‌تی سێیه‌مین. ئێمه ڕێگه به‌وه ناده‌ین عه‌قڵیه‌تی داعش خۆی ڕێكخات و خۆی بچه‌سپێنێت. له‌نێو كۆمه‌ڵگه‌دا هێشتا زۆر كه‌س هه‌ن كه خاوه‌نی ئه‌م عه‌قڵیه‌ته‌ن، یان له به‌رانبه‌ر داعش بێ ئیراده بوون و ترساون. داعش به ڕێبازی زۆر دڕندانه هێرشی كرده سه‌ر ئه‌م كۆمه‌ڵگه‌یه. ژنی كوشت، ڕه‌جمی كرد، پارچه‌ی كرد، سووتاندی. له‌نێو كۆمه‌ڵگه‌دا هێشتاش ترسێكی گه‌وره له داعش هه‌یه. بێگومان یه‌په‌ژه له‌مه‌ودواش ڕۆڵی پێشه‌نگایه‌تیی بۆ گه‌وره‌كردنی تێكۆشانی دژ به داعش ده‌گێڕێت.»
«عه‌قڵیه‌تی داعش له‌ناوده‌به‌ین»
فه‌رمانده‌كه‌ی یه‌په‌ژه ڕایگه‌یاند، «پێویسته ئێمه عه‌قڵیه‌تی خۆبوون، ئازادی و بوێریی خۆپاراستن بده‌ینه ته‌واوی كۆمه‌ڵگه. هێزه‌كانمان ماوه‌یه‌كی زۆر درێژه له‌نێو شه‌ڕدان. به‌ڵێ له‌م شه‌ڕه‌دا ئه‌زموونێكی زۆریان به‌ده‌ستهێنا. به‌ڵام ئیدی پێویستی به‌وه هه‌یه ئه‌م هێزه سه‌رله‌نوێ خۆی هه‌ڵسه‌نگێنێت. سه‌رله‌نوێ خۆی په‌روه‌رده و ڕێكخراو بكات. بۆ ئێمه ئه‌وه‌ی گرنگه ئه‌وه‌یه عه‌قڵیه‌تی داعش له‌نێو كۆمه‌ڵگه له‌ناوببه‌ین.»
«شه‌ڕ و ئه‌ركی یه‌په‌ژه هێشتا ته‌واو نه‌بووه»
ئه‌ندامی فه‌رمانداره‌تیی گشتیی یه‌په‌ژه نه‌ورۆز ئه‌حمه‌د ڕایگه‌یاند، ئێستا ئه‌وان له‌نێو خۆبه‌ڕێوه‌به‌ریی دیموكراتیدا خه‌بات ده‌كه‌ن. گوتی: «هێشتا مه‌ترسی گه‌وره له‌سه‌ر هه‌رێمه‌كانمان هه‌یه. هێشتا زووه كه باس له خۆڕێكخستن به‌شێوه‌ی سوپا بكه‌ین. پێویسته ئێمه ئه‌و مه‌ترسییانه نه‌هێڵێین كه ئێستا له ئارادان. بۆ ئه‌وه‌ی بتوانین هه‌موو ئه‌وانه له‌ناوببه‌ین، پێویسته خۆمان به‌هێز بكه‌ین. ئێمه وه‌ك هه‌ندێك كه‌س ناڵێین [ئیدی شه‌ڕ ته‌واو بوو]، یان به گوێره‌ی چاوه‌ڕوانیی هه‌ندێ كه‌س ناڵێین [ئیدی ئه‌ركی سه‌ربازیی یه‌په‌ژه نه‌ماوه]. له ڕاستیدا قورسترین ئه‌رك له‌مه‌ودوا ده‌ستپێده‌كات. بۆ ئه‌و مه‌به‌سته‌ش ئێمه هه‌وڵ ده‌ده‌ین ئاستی هۆشمه‌ندیی، تاكتیكی، ڕێكخستنی و ته‌كنیكی به‌هێز و ده‌وڵه‌مه‌ند بكه‌ین. ئێمه له ئێستا به‌دواوه به‌هێزتر خۆمان ڕێكده‌خه‌ین.»
s.m
