ڕێكخراوه‌كانی ژنان له چوارچێوه‌ی ئاماده‌كارییه‌كان بۆ ٢٥ی تشرینی دووه‌م (ڕۆژی جیهانیی به‌ره‌نگاربوونه‌وه‌ی تووندوتیژیی دژی ژنان) له شاری ئیسته‌نبووڵ «كۆبوونه‌وه‌ی گه‌وره‌ی ژنان»یان ڕێكخست.
ڕێكخراوه‌كانی ژنان له ئیسته‌نبووڵ به درووشمی «ئێمه پێكه‌وه به‌هێزین» له هۆڵی كۆبوونه‌وه‌كانی جه‌زایر «كۆبوونه‌وه‌ی گه‌وره‌ی ژنان»یان ساز كرد. دایكانی شه‌ممه و به‌رخۆدێره‌كانی فلۆرمار-یش به‌شدار بوون.
له كۆبوونه‌وه‌كه‌دا دیمه‌نی تێكۆشین، چالاكییه‌كانی بزووتنه‌وه‌ی ژنان و ڕێكخراوه‌كانی ژنانی كوردستان و توركیا پیشان دران. سه‌حه‌ر كالكان ئه‌ندامی ئه‌نجومه‌نی ژنان وته‌یه‌كی پێشكه‌ش كرد و باسی ئامانجی كه‌مپینی «ئێمه پێكه‌وه به‌هێزین»ی كرد.
ناوبراو گوتی: «له كاتی باری نائاساییدا زۆر چالاكی ژنان ده‌ستگیر كران و كۆمه‌ڵكوژیی و ده‌ستدرێژییه‌كانی سه‌ر ژنان زیادیان كرد. سه‌ره‌ڕای هه‌موو هێرشه‌كان ئێمه كۆڵمان نه‌دا و به‌رده‌وام بووین. له دژی ئه‌و قانوونانه‌ی كه ده‌یانویست بیانچه‌سپێنن، بووینه ده‌نگی به‌رخۆدانی ژنانی ڕه‌نجده‌ر. له ساڵی ٢٠١٦ له دژی تووندوتیژی و پێشێلكردنی مافه‌كانیان له‌سه‌ر شه‌قامه‌كان بوون. ئێمه پشتگیریی به‌رخۆدانی ژنانی جیهان و توركیامان كرد. له ٨ی ئه‌یلوولیشدا بانگه‌وازێكمان كرد بۆ ئه‌وه‌ی هێزی خۆمان ڕێكخه‌ین. ئه‌مڕۆش بۆ ئه‌و مه‌به‌سته لێره‌ین.»
هه‌ر له كۆبوونه‌وه‌كه‌دا، ئه‌ندامی ئه‌نجومه‌نی ژنان چاگلار ئاكده‌ره له میانه‌ی پێشكه‌شكردنی وته‌كه‌یدا گوتی: «ئێمه له دژی سیسته‌می تاكه‌پیاویی به‌ڕێوه‌بردنی وه‌ڵات كه‌مپینی [نا، ژنان پێكه‌وه به‌هێزن]مان ده‌ستپێكرد. كۆبووینه‌وه بۆ ئه‌وه‌ی باسی ئه‌وه بكه‌ین پێویسته چۆن له دژی ئه‌م سیسته‌مه ڕێوشوێن بگیرێته‌‌به‌ر. ئه‌مڕۆ گفتوگۆ ده‌رباره‌ی قانوونی ئایینسه‌روه‌ری، قانوونی ٦٢٨١ و هه‌مواركردنه‌وه‌ی نه‌فه‌قه ده‌كه‌ین. گفتوگۆ ده‌كه‌ین ده‌رباره‌ی ئه‌وه‌ی له دژی ئه‌مانه چی بكرێت، ڕێباز و تێكۆشینی هاوبه‌ش چۆن دابنرێت. هه‌روه‌ها ٢٥ی تشرینی دووه‌م نزیك ده‌بێته‌وه، لێره‌دا باسی پێشنیاز و داواكارییه‌كانمان ده‌كه‌ین بۆ ئه‌و ڕۆژه.»
s.m
