محەمەد جەعفەر مونتەزری سەرۆکی دەزگاى داواکارى گشتیی ئێران و سەرۆکى دادگاى تایبەت بە پیاوانى ئایینى لە ئێران رایگەیاند، "لە هەوڵەکانیاندا دژ بە جلی ژناندا سەرکەوتوو نەبوون".

مونتەزەری بۆ ئاژانسی هەواڵی فەرمی ئێران 'ئیرانا' دوا و دەستنیشانی کرد کە لە پرسی جلوبەرگی نائیسلامیانەدا، ئەوان بەرامبەر  دەیان ملیۆن ژن لە ئێراندا، ڕێوشوێنی پۆلیسیی تووندیان گرتووەتە بەر و فشاریان کردووە، بەڵام هێشتا سەرنەکەوتوون.

سەرۆکی دادوەری ئێران، دانی بەوەدا نا، بە هێزی دادگا و پۆلیس، ئەو فشارانەی لە ژنانیان کردووە سەرنەکەوتووە. وتیشی "جگە لە خراپکردنی وێنەی نێونەتەوەیی ئێران، ئەو فشارانە بە کەڵکی شتێکی تر نەهاتوون".

هەروەها وتیشی "زۆربەی ژنان پابەند نین بە ئاینەوە و باوەڕ بە جلوبەرگی ئیسلامیی ناکەن، بەکارهێنانی تووندوتیژییش لە دژی ئەوە، ئەنجامێکی ئەرێنی ناهێنێتە ئاراوە و پێشمان ناخات".

لە ئێران، بە گوێرەی یاساکانی شەریعە، کچانی منداڵ، پاش ئەوەی تەمەنیان بوو بە ٩ ساڵ و ژنان، لەو شوێنانەی کە جەماوەریان تێدایە و لە شوێنە گشتیەکان و دەرەوەی ماڵەکانیاندا، ناچار دەکرێن کە حیجاب بکەن و نابێت بهێڵن جەستەیان ببینرێت. ئەو ژنانەشی کە دژ بەو کۆت و بەندە یاساییانە ڕادەپەڕن، بە 'گوناهکار' تاوانبار دەکرێن.

ر.م