داواکاری گشتیی دەوڵەتی تورک لە دژی زەینەب دورگیوت پەیامنێری ئاژانسی هەواڵی میزۆپۆتامیا (MA)ی دەستگیرکراو سکاڵای تۆمار کردووە و داوا دەکات بە تۆمەتی "بە ناوی رێکخستنەوە کاری کردووە" سزای زیندانیکردنی بەسەردا بسەپێنرێت.
زەینەب دورگیوت پەیامنێری ئاژانسی هەواڵی میزۆپۆتامیا (MA) لە ١٧ی کانوونی یەکەمی ٢٠٢٠ لە ناوچەى جزیری شرنەخ دەستگیرکرابوو. دوای دەستگیرکردنەوەکەى لە شرنەخەوە رەوانەى بەڕێوەبەرایەتیی ئاسایشی شاری وان کرا و لەوێ وتەى لێوەرگیرا و لەسەر سکاڵای داواکاری گشتی رەوانەى دادگا کرا تاوەکو سزای زیندانیکردنی بەسەردا بسەپێنرێت.
لە لێکۆڵینەوە لەگەڵ زەینەب دورگوت دا پرسیار لەبارەی ئەو هەواڵانەوە لێکراوە، کە ئامادەی کردوون و دوای ئەوەى لەلایەن داواکاری گشتیەوە وتەی لێوەرگیرا، داواکاری گشتی سکاڵای لە دژی تۆمار کرد و داوای کرد بە تۆمەتی "بە ناوی رێکخستنەوە کاری کردووە" سزای زیندانیکردنی بەسەردا بسەپێنرێت و بۆ سەپاندنی سزای زیندانیکردن بەسەر ئەو پەیامنێرەدا، رەوانەى دادگای وان کرا.
ژ.ت
