بەڕێوەبەری گشتی تەندروستی سلێمانی سەباح هەورامی لە کۆنفڕانسێکی رۆژنامەنووسیدا راگەیاند، ١٠ حاڵەتی کۆلێرا تۆمار کراوە.

سەباح هەورامی باسی ئەوەی کرد کە لە مانگی حوزەیراند ابەهۆی ڕشانەوە و سکچوونەوە ٨ کەس گیانیان لەدەستداوە کە دوو کەسیان منداڵان. هەروەها ژمارەیەک پشکنینیش بۆ بەغدا رەوانەکراون.

هەڤاڵ ئەبوبەکر پارێزگاری سلێمانیش داوای لە حکومەتی هەرێم کرد کە بە زوترین کات دەستوەردان بکات و بودجەیەکی تایبەت بۆ رێگریکردن لەم نەخۆشیە فەراهەم بکرێت.
کوێستان محەمەد، وەزیری کاروکاروباری کۆمەڵایەتی ڕایگەیاند؛ بەهۆی بڵاوبونەوەی پەتای کۆلێرا، دوو سزادراو لە لەچاکسازی گەورانی سلێمانی گیانیان لەدەستداوە و دوو سزادراوی دیکەش دۆخی تەندروستیان ناجێگیرە.

وتیشی: نەخۆشخانەکەی چاکسازیی گەوران کەوتووەتە ئامادەباشیەوە و سەرجەم پێداویستییە پزیشکیەکانی پەیوەست بۆ روبەڕوبونەوەی ئەم نەخۆشییە دابینکراوە و لەگەڵ وەزارەتی تەندروستی و چەند رێکخراوێک و بەڕیوەبەری تەندروستی سلێمانی بۆ ئەو مەبەستە لەسەر هێڵن و بەڵێنیان پێداوین هەر ئەمڕۆ و سبەینێ هەموو پێداوستیەکان دابین بکەن.

وەزیری کاروباری کۆمەڵایەتی رونیشیکردەوە، لەمڕۆ وە سەردانیکردنی سزادراوان لە چاکسازیی گەوران راگیراوە تا دۆخەکە کۆنتڕۆڵ دەکرێت و چونە ناوەوەی هەموو جۆرەکانی سەوزە بۆ ناو چاکسازیەکە قەدەغەکراوە و لە ڕێی بڵندگۆوە ڕینمایی دەدرێتە سزادراوان.
ف.ق