به‌هۆی به‌فربارین ڕێگه‌كانی زۆر ناوچه‌ی باكووری كوردستان داخران
له باكووری كوردستان به‌هۆی بارینی به‌فر له زۆر ناوچه ڕێگه‌كان داخران.
شه‌پۆلی به‌فر، باران و ته‌زره بارین له باكووری كوردستان كاریگه‌ری له ژیانی هاوڵاتییانی كردووه و زۆر ناوچه‌ی سه‌ر به ئامه‌د ڕه‌نگی سپییان پۆشیوه و له چه‌ندین گوند مه‌ترێك به‌فر باریوه. هه‌ر به‌و هۆیه‌وه ڕێگه‌كانی نێوان پاسوور و مووش و چه‌ندین گوند و لادێ داخراون. له‌سه‌ر ڕێگه‌ی ئامه‌د - وێرانشار ئامبولانسێك و ٤ كامیۆن به‌هۆی داخرانی ڕێگه‌كه گیریان خواردووه.
له لایه‌كی دیكه‌وه له ناوچه‌كانی خزخێر، دهێ، به‌رواری، تلۆ و هاوێل-ی سه‌ر به شاری سێرت ڕێگه‌ی ٧٥ گوند داخراوه. له گردی كاركه‌ر-ی سه‌ر به ناوچه‌ی خزخێر خێزانێكی ٥ كه‌سی له‌نێو ئۆتۆمبێلێكدا گیریان خواردبوو و مه‌ترسی له‌سه‌ر ژیانیان دروست بووبوو، به‌ڵام دواتر ڕزگار كران.
ئه‌مڕۆش دۆخی كه‌شوهه‌وا له باكووری كوردستان هه‌وراوییه و جار جاریش به‌فر و باران ده‌بارێت. پێشبینی ده‌كرێت له ڕوحا باران ببارێت و له شاره‌كانی ئامه‌د، ئێلح، سێرت، مێردین و شرناخ باران و به‌فر پێكه‌وه ببارن.
s.m
