کۆنگرەی نەتەوەیی کوردستان (کەنەکە)، بەبۆنەی هاتنی ساڵی نوێوە ڕاگەیەندراوێکی بڵاو کردەوە.

کەنەکە، لە ڕاگەیەندراوەکەدا ڕووداوە گرنگەکانی ساڵی ڕابردووی هەر چوار پارچەی کوردستانی بەبیرهێناوەتەوە و ئاماژەی بۆ ئەوە کردووە کە چەرخی نوێ لە بەرژەوەندی کوردستانیان دەسووڕێت، لە بەشیکی ڕاگەیەندراوەکەشدا دەڵێت: "داگیرکەران و نەیاران هەموو هێزی خۆیان خستۆتە گەڕ تاکو لە دژی کوردسان ئەنجامێک بەدەستبێنن، پیلان و پڕۆژەکانیان لە دژی کوردستانیان بەردەوام لە زیادبووندایە، هەتا گەلی ئێمە تێکۆشانی خۆی بڵندتر بکات، ئەوانیش هێرشەکانیان چڕتر و فراوانتر دەکەن".

ئەمەش دەقی ڕاگەیەندراوەکەیە:

ساڵی نوێ، ساڵی ٢٠٢٠ پیرۆز بێت

ساڵێکی تریش، ساڵی ٢٠١٩ لەگەل هەموو خۆشی و ناخۆشییەکانی تێپەڕی، لە لایەکی تریشەوە ژیان بە هەموو ڕووەکانیەوە، بە باشی و خراپەکانییەوە بەرەو پێشەوە ئەجوڵێت، سەری سەدان ساڵە گەلی کوردستان بۆ ژیانێکی ئازادو  یەکسان و شایستە تێدەکۆشێت، هەر چرکەیەکیش کە بۆ ئازادی و سەرفرازی خەرج دەکرێت، بەهادارە، کوردو کوردستانیان بە درێژایی مێژوو بۆ ئامانجی هەرە مەزن کە ژیانێکی ئازادو بەختەوەرو شایستەیە، لە خەباتدا بوون و  ئەو ڕەوتەش هەر بەردەوامە، هێشتاش گەلی کوردستان نەگەیشتۆتە ئەو هیواو خۆزگە ڕەوایەی خۆی، بەڵام ساڵ لە دوای ساڵ لەو ئامانجە نزیکتر ئەبێتەوە. لە ئێستاشدا ساڵ بەساڵ هیوای کوردستانیان مەزنتر و بەهێزتر و نزیکتر ئەبێت، چەرخی نوێ لە بەرژەوەندی کوردستانیان دەسووڕێت.

داگیرکەران و نەیاران هەموو هێزی خۆیان خستۆتە گەڕ تاکو لە دژی کوردسان ئەنجامێک بەدەستبێنن، پیلان و پڕۆژەکانیان لە دژی کوردستانیان بەردەوام لە زیادبووندایە، هەتا گەلی ئێمە تێکۆشانی خۆی بڵندتر بکات، ئەوانیش هێرشەکانیان چڕتر و فراوانتر دەکەن.

داگیرکەران لە ساڵی ١٩١٩شدا درێژەیان بە پەیمانەکانی ناوخۆیان لە دژی کوردان دا، بە مەبەستی لەناوبردنی دەستکەوتەکانی کوردستانیان، پیلانی چەپەڵیان داڕشت و هێرشیان کردە سەر کوردستان.

هێرشی دەوڵەتی تورکیا لە باکوری کوردستان بێ پسانەوە لە ساڵی ٢٠١٩شدا درێژەی هەبوو، لەبەرامبەر ئەو هێرشانەشدا، لە پێشەوە هێزی گەریلاو هەموو دینامیکە کوردسیانیەکان، بەرخۆدانێکی قارەمانانەیان کردو ئامانج و خەونەکانی هێرشبەرانیان پووچەڵ کردەوە، لە ساڵی ٢٠١٩دا شۆڕشگێڕانی کوردستان زیندانەکانی داگیرکەرانیان کردە مەیدانی بەرخۆدان، لەدژی چەوسانەوەو داگیرکاریی و بۆ تێکشکاندنی گۆشەگیریی سەر بەڕێز عەبدولا ئۆجەلان، لە زیندانەکانی تورکیا، لە کوردستان و دەروەی وڵات هەڵمەتی مانگرتن لە خواردن بە سەرکەوتوویی بەڕێوەچوو، لەهەڵبژارنی شارەوانیەکانیشدا گەلی کوردستان خاوەندارێتی لە ئیرادەی خۆی کرد، لە شارە گەورەکانیشدا توانیببێتە هۆکاری تێکشکانی هاوپەیمانیی فاشیستەکان، لە دوای هەڵبژاردنیش جارێکی دی دەوڵەت دەستی بەسەر شارەوانیەکانی کوردستاندا گرت، ئەم بەرخۆدانەی ئێستا لە باکوری کوردستان کە لە زینداندا بێ یا لە ئاستی سیاسی و گەریلاییدا بێت، بەرخۆدانێکی بەنرخ و پیرۆزە.

لە باشووری کوردستانیش، دوای داگیرکرنەوەی کەرکوک و ناوچە دابڕاوەکان، کێشە و ئاڵۆزییەکان بە تەواوی چارەسەر نەبوون، بە داخەوە کە ناتوانین بڵێین رێبەرو هێزە کوردستانییەکان، لە داگیرکردنەوەی کەرکوک و ناوچەکانی تر دەرسیان وەرگرت و  هەنگاویان بەرەو یەکێتییەکی نەتەوەیی هەڵێنا، هیوای ئێمە ئەوەیە لە ساڵی نوێدا هەنگاوی جدیی بەرەوە یەکێتی نەتەوەیی و چارەسەرکردنی کێشەکانی بنرێن.

ئێستا عێراق بە دۆخێکی هەستیاردا تێئەپەڕێت. دۆخی داهاتووی عێراق نادیارە، ئەمەش کاریگەریی لە هەرێمی کوردستان ئەبێت، لە لایەکی تریشەوە داگیرکاریی تورکیا لە باشووری کوردستان رۆژ لە دوای رۆژ لە زیادبووندایە، ئێستا لە هەموو کات زیاتر پێویستی بە یەکڕیزی و یەکدەنگی هەیە، پێویستە دۆخەکە بە باشی هەڵبسەنگێنرێت.

لە رۆژهەڵاتی کوردستانیش، خۆپاراستن و تێکۆشانی گەل بەردەوامە، رژێمی ئێرانیش وەک تورکیا لەمساڵدا لە هێرشەکانی  بەردەوام بوو، ئێران لە ناوخۆو دەرەوەدا رووبەڕووی قەیرانی قووڵ بۆتەوە، قەیارانەکانیش بەردەوام زیاتر ئەبن، لە مانگی نۆڤەمبەردا لە کوردستان و سەرانسەری ئێران خۆپیشاندان و ناڕەزایەتی گەورە بەڕێوەچوو، ئالۆزیەکان تائێستاش هەر بەردەوامن، ئێمە هیواخوازین ئەو دۆخە گۆڕانکاریی دیموکراسیی لەگەڵ خۆیدا بۆ رۆژهەڵاتی کوردستان و ئێران بهێنێت، ببێتە بنەمای ئازادی و ئاسایش.

لە مانگی ئازردا، رێک دوای نەورۆز، دواین بنکەی داعش ڕزگارکراو کەوتە دەست شەڕوانان، ئیدی ئەفسانەی ڕەشی داعش تێکشکێنرا. ئەمەش سەرکەوتنێکی مێژوویی بێهاوتا بوو، دەوڵەتی تورکیاو نەیاران ئەو دۆخەیان پێ قبووڵ نەدەکرا، هەربۆیە لە ساڵی ٢٠١٩دا هێرشی هەرە فراوان لەسەر رۆژاوای کوردستان بوو.لە ٩ی ئۆکتۆبەردا تورکیا هێرشی کردە سەر رۆژاوای کوردستان، لە بەرامبەر ئەو هێرشانەدا لە هەموو ئاستێکدا بەرخۆدانێکی بێوێنە بەڕێوەچوو، ئامانجی هێرشەکان داگیرکردنی تەواوی رۆژاوای کوردستان و تێکدانی دەستکەوتەکانی گەلەکەمان بوو، بەڵێ توانیان گرێ سپی و سەرێ کانی هەندێ شوێنی تر بگرن، بەڵام نەگەیشتنە ئامانجەکانی خۆیان، بەرخۆدانی گەلی رۆژئاواو دەنگدانەوەی لە جیهاندا، نەیانهێشت تورکیا بگاتە ئامانجەکانی خۆی، ئێتساش لە هەرێمەکەدا شەڕ و بەرخۆدان بەردەوامە.

ئێستاش دەوڵەتی تورکیا هەڕەشە لە رۆژاوای کوردستان ئەکات. ئێستا دۆخی رۆژاوا جێگایەکی سەرەکی لە وتووێژە نێودەوڵەتییەکاندا گرتووە، هێزەکانی پاراستنی گەل بە هەمووشێوەیەک لە دۆخی ئامادەباشیدان، رێبەرە سیاسی و ئیدارییەکانی رۆژئاواش لە ناو کارو خەباتێکی فراوانی سیاسی و دیپلۆماسیدان، رۆژئاوا لە هەموو روویەکەوە پێویستی بە هاوکاریی هەیە، پاراستنی دەستکەوتەکانی رۆژاوا لە رۆژاوای کوردسیان، خاڵی سەرەکییە. پێویستە هەموو گەلی کوردستان و هەموو هێزە کوردستانیەکان و دۆستانی دۆزی کوردستان، بەردەوام لە ناو کارو چالاکیدا بن، خاوەندارێتی لە رۆژاوا خاوەندارێتییە لە هەموو کوردستان.

پێویستە لە کۆتایی ساڵی ٢٠١٩دا بەخۆداچوونەو لێپیچەنەوەی ناوخۆیی بکرێت. سەرەرای خەم و ژان و برینداربوونی گەلی کوردستان، کەموکوڕی و هەڵە لە سیاسەت و  تێکۆشاندا هەبوو، بەڵام هەر سەرکەوتووبووین، گوتەی سەرکەوتن کلیلەو ئەبێ ئێمە لەسەر ئەو گوتنە سوورو بەردەوام بین، کوردان لەناو ئەو ئاگری شەڕو جەنگانەدا کە نەیاران و دوژمانان هەڵیانگیرساندووە، تێکۆشانێکی بێوێنە ئەکەن و سەرکەوتووبوون، هەرچۆنێک بێ ئەبێ کوردان هەر سەربکەون، چونکە لە دۆزی کوردستاندا جگە لە سەرکەوتن هیچ ئەڵتەرناتیڤێکی دی نییە، لە ئەنجامی سەرکەوتنە نەتەوەییەکانی کوردستانیاندا، دوژمنان ناکۆکیەکانی خۆیان خستۆتە لاوەو  لەسەر نەهێشتنی دەستکەوت و نەبوونی گەلی کورد پیلان و نەخشەی داگیرکەرانە دائەڕێژن، لە بەرامبەر ئەمەشدا پێویستە هاوپەیمانیی ناوخۆیی کوردان پێکبێت، هەرچۆنێک بێت پێویستە کوردان کێشە ناوخۆییەکانی خۆیان بە رێگای دیالۆگ چارەسەر بکەن، ڕێککەوتنی نێوان کوردان پیلانەکانی داگیرکەران و نەیاران پووچەڵ ئەکاتەوە، لە شەڕی رۆژاوای کوردستاندا گەلی ئێمە لە سەرانسەری کوردستان و دەرەوەی ولات لە کارو خەباتێکی بێوچاندا بوو، هیوادارین ئەم یەکێتییەی گەلی کوردستان ببێتە یەکێتییەکی سیاسی.

ئێمە وەک کۆنگرەی نەتەوەیی کوردستان بەهیواین گەلی کوردستان، ساڵی نوێ، ساڵی ٢٠٢٠ بکاتە ساڵی تێکۆشانی زیاتر و بەهێزتر، پاشەرۆژی ئێمە رووناکییەو خەبات و تێکۆشانی گەلی کوردستانیش بەرەو رووناکی هەنگاو ئەنێت، ئەو دەستکەوتانەی کە تا ئێستا بەدەست هاتوون بەشی ئەوە ئەکات کە هیوامان بە سەرکەوتن بەهیز بکات بگەینە ئامانج.

هیواخوازین ساڵی ٢٠٢٠ ببێتە ساڵی بە ئامانج گەیشتنی گەلی کوردستان.

دەبا ساڵی ٢٠٢٠ بۆ هەموو مرۆڤایەتی ببێتە ساڵی ئاشتی و تەبایی و دیموکراسی و یەکسانیی.

بەم بیرو هیوایەوە کۆنگرەی نەتەوەیی کوردستان پیرۆزبایی ساڵی نوێ لە هەموو کوردستانیان و تەواوی جیهان دەکات.

کۆنگرەی نەتەوەیی کوردستان – ك.ن.ك

٣١-١٢-٢٠٢٠