یەکەم کۆڕبەندی ئیکۆلۆژی لە شاری فرایبورگی ئەڵمانیا بە پێشەنگایەتی کۆمیتەی ئیکۆلۆژی کۆنگرەی کۆمەڵگەی دیموکراتیکی کوردستانیان لە ئەوروپا (کەجەدەکە-ئە) ساز دەکرێت.

لە وڵاتانی جیاجیای ئەوروپاوە ئەندامانی فیدراسیۆنەکانی کەجەدەکە-ئە،، تەژەکە-ئە، کۆمیتەی ژنۆلۆژی، تەکۆژن، چالاکوانانی گەنجانی شۆڕشگێڕ، ئەکادیمییەکان، کۆمەڵناسان وئیکۆلۆژیستەکان بەشداربوون.

وتەبێژی کۆمیتەی ئیکۆلۆژی کەجەدەکە-ئە فاتۆش گۆکسونگور لە سەرەتای کۆڕبەندەکەدا قسەی کرد و بەئاماژەدان بە هێرشە داگیرکەرییەکان و قڕکردنی ئیکۆلۆژی وتی: "لەئێستاشدا کە هێرشە قڕکارییەکانی سەر رۆژئاوا لەئارادان، ئێمە دیسان باسی قڕکردنی ئیکۆلۆژیکیش دەکەین و ئەوە تاوتوێ دەکەین کە چۆن بتوانین خۆمان لە دژی قڕکردنی ئیکۆلۆژیک رێکبخەین. نەک هەر ئێمە و ئەو کەسانەی هۆگری ئەم بوارەن، بەڵکوو هەموان بەرامبەر  بە پاراستنی ئیکۆلۆژی بەرپرسیارن."

وتیشی: بۆ ئەوەی پاراستنی ئیکۆلۆژی تێکەڵ بە کاری رۆژانەمان بکەین دەبێت پرۆژە ساز بکەین. دەبێت لە پاڕادایمی رێبەرمان تێبگەین و لەو چوارچێوەدا کاربکەین. لە دژی سەرمایەداری بە شێوەی رێفۆرمیستی تێکۆشان ناکرێت. رێبەرایەتی لەبارەی ئیکۆلۆژییەوە دەڵێت دەبێت ببێتە پاساو و هاندەری سەرهەڵدان. تێکۆشانی ئیکۆلۆژیک دەبێت وەرچەرخان و گۆڕانکاری رادیکاڵ و سیستماتیک  بۆ خۆیان بکەن بە ئامانج"

دوای وتاری سەرەتایی پانێلەکانی یەکەم رۆژی کۆڕبەندەکە بە ناونیشانی "پێناسە و پێسپێکتیڤی ئیکۆلۆژیک"، "ژن و ئیکۆلۆژیک" و لە کوردستان و رۆژهەڵاتی ناوەڕاست سیاسەتی قڕکردنی ئیکۆلۆژیک و بەرەنگاربوونەوەی" بەڕێوەچوون.