پەی ئەنداماو بنەیانەو ئاڤراسی مەنتێقەو تەتوانینە، کە بەرواری جیاوازەنە جە کۆشیای ئازادیی کوردستانینە گەشمەردێ بیێ م. نوری ئاڤراس (شاهین)، بەهجەت ئاڤراس (فەلات ئارتۆس)، سەبری ئاڤراس (هارون)، مەزڵوم ئاڤراس (هارون شاهین)، ساڤدا ئاڤراس (تۆپراک هارون)، عەبدولحەمید دۆنەر (عەگید)، عەبدولکەریم ئاڤراس (هارون شاهین)، وەڵات ئاڤراس (دیجلە ئێلا) و بورهان ئاڵتینتاش ( نوعمان) مەراسیمێوی یادکەردەیوەنە شاروو دۆسڵدۆرفوو ئەڵمانیاینە کریا.

هۆڵەکەو ناوەندوو جڤاکی دیموکراتیکوو دۆسڵدۆرف (دەکتەم)، بە ڕسمێ ڕابەروو گەلوو کوردی عەبدوڵا ئۆجالانی و گەریلا گەشمەردەکا ڕازنیابێوە.

بنەیانەو گەشمەردا و ڕاوەبەراو ئەرەمەرزیاو بنەیانەو گەشمەردا (کۆماو)، سیاسەتمەدارە لەزگین بۆتانە و بڕێو کەسێ بەشدارێ یادەکەی بێنێ.

دماو دەیەقێوە ڕێزگێرتەی جە یادوو گەشمەردا، بە نامێ بنەیانەکەیوە حەمدوڵا ئاڤراسی واتش، کە هەزاران گەریلێ پەی ئازادیی گەشمەردێ بیێ و هەڵای قەبرەو هەزاران گەریلایا نادیارەنە، دەوڵەتوو تورکی هجووم مکەرۆنە سەروو قەبرسانوو گەشمەردا و تاوانی ئینسانی مکەرۆ.  

ئاڤراسی واتش گەریلا درێژە بە خەتەو مدرامانوو شێخ سەعیدی مدانە، ئەرەیاوناش: "بژیوۆ کۆشیای ئازادی و هەزار سڵاـێ چانیشا ڕیزەکاو کۆشیای ئازادیینە مدرامان مکەرا. گەشمەردێ نمەمرا".

دمایی درووشموو "گەشمەردێ نمەمرا" و "ڕاو گەشمەردا، ڕاو ئێمەنە" بەرزێ کریێوە.

بە نامێ کۆماویوە، عەلی کۆنکورت گەشمەرداو ئازادییش بە ڕێز و سوپاسۆ وە یادێ کەردێوە، واتش تەڤگەروو ئازادیی سەروو ونەو گەشمەرداوە کەوتەن وەڵێ.  

تیشکەش وستە سەروو هەڵمەتەو ئازادیی جەستەیی ڕابەروو گەلوو کوردی عەبدوڵا ئۆجالانی و واتش: "هامڕایا گەلوو کوردی و ڕابەر ئاپۆ هەنگامێوی سەرکەوتێ منیانە. قۆناغوو یوەموو ئی هەڵمەتێ سەرکەوتێ بییە ئیساتێ یەک ئامانجما هەن، کە ئازادیی ڕابەر ئاپۆیا".

دمایی پەیاموو کۆمیتەو گەشمەردا ونیاوە، هەرپاسە پەیاموو هامژیوەو گەشمەرد شاهینی، نازێ ئاڤراسی و واڵێ گەشمەردە فەلات ئارتۆس و گەشمەردە هارون زیندانوو جۆروو T ی وانینە ونیاوە.  

دمایی سینڤزیۆنێو پەی یادوو گەشمەردا نیشانە دریا. یادەکە بە چەپڵێ و درووشموو "گەشمەردێ نمەمرا" دماییش ئاما.