دژوو دەس سەرەرەگېرتەی شارەوانی جۆلەمێرگی و زینانیکەردەی هامسەرۆکوو شارەوانی محەمەد سدیق ئاکشی ڕۊو پەنج شەممەی ١٣و حوزەیرانی گلېرۊبیەیۍ جەماوەری جە جۆلەمێرگەنە ساز مکریۆ.

گلېرۊبیەکەی جە مېڎانوو ئۆتۆگاری جە دەروازەو شارەکەینە ساز مکریۆ. ئاماڎەکارییەکۍ پەی گلېرۊبیەکەی بەردەوامېنۍ. بە تایبەتی جە ئیستەنبوڵ، ئەنقەرە و ئیزمیرنە ژمارېوە فرە بە پاسۍ بەرەو جۆلەمێرگ کۊتۍ ڕا.

بەشدارا ئا چالاکیە ۋەروودەموو بیناکاو دەم پارتینە کوۍ بیېوە و بە واتەیۆ دروشمەکاو "بژیۋۆ مدرامانوو جۆلەمێرگ"ی و "جۆلەمێرگ هینوو ئێمەن" پەشتیوانی ۋېشا جە مدرامانوو جۆلەمێرگی نیشانەدا و دەس سەرەرەگېرتەی ئیرادەو گەلیشا شەرمەزار کەرد.

هاموەخت پەیاموو ئانەیشا دا کە پەی لوایۆ گژۍ ستەمیرە بەرەو جۆلەمێرگ گنا ڕا و جەختیچشا کەردۆ کە بە یەکڕیزی و یۊگېرتەیی متاوا بیاوا بە سەرکەوتەی.

هاموەخت پەیاموو ئانەیچشا ئەرەیاۋنا، کە نمازا خەڵکوو جۆلەمێرگی بە تەنیۍ با و تا سەرکەوتەی بەردەوامۍ با جە چالاکیەکاشا و داوایچشا ۋنەو ڕاو گردینی کەردە کە پەشتیوانیشا ۋنە بکەرا.