تۆڕەو هەواڵوو مافوو مرۆڤوو کورڎەسانی وەڵاش کەردۆ، "ڕۊو دووەشەممەی هاموڵاتیېوە بە نامۍ هادی غونچەدوسی خەڵکو دەگاو زەلێی شارو بانەی بە مەڵامەتوو ئەوەتەقای مینی و ئەوەمەڼەو جەنگوو ئێران عێراقیوە گیانش جەدەسدا".

ڕۊشنیچش کەردەنۆ، "ئا هاموڵاتیە دماو ئانەی دەسکاری مینی و تەقەمەنی ئەوەمەڼەو جەنگیش کەردەن، جە ئاکاموو ئەوە تەقایۆکەینە بە سەختی زامڎار بیەن و فاڕیانۆ پەی خەسەخانەو سەلاحەدینی ئەیوبی بانەی و چا بە مەڵامەتوو سەختی زەخمەکەیشۆ گیانش جە دەسدان".

ساڵەی ۋییەردۍ بە مەڵامەتوو ئەوەتەقای مینیوە ٢ کەسۍ جە ۋەرکەوتوو کورڎەسانینە گیانشا جە دەسدان و ١٢ کەسېچ کە دووێشا زاوڵۍ بێنۍ زامڎارۍ بیۍ، یاخوڎ ئەندامێوە جەسڎەیشا جە دەسدان.

بەمەڵامەتوو جەنگوو ٨ ساڵەو ئێران - عێراقی و حەرپاسە کۊشش و هێزە سەروازیەکا ئێرانی پەی وەرەنگاربیەیۆ هێزەکاو ۋەرکەوتوو کورڎەسانی، پانتایێوە فراوانوو مەنتیقە سنوورییەکا ئا بەشەو کورڎەسانی بە مینۍ چنیان.