ڕێکوزیاو مەبیادەری و توئای دەری، کە ڕێکوزیای تایبەتی پا زارۆڵا، کە کەسوکارشا جەنگنە ژیوایشا جەدەس دان و هەرپاسە ئانێ زیندانیێ کریێنێ، ئامەدنە کۆبییەیۆێوەشا بە نامێ "وەختوو خاوەنداریین جە بەهاکا" ئامەدنە ساز کەرد.

کۆبییەیوەکەنە کەسکین بایندر هامسەرۆکوو پارتوو هەرێمە دیموکراتیکەکا (دەبەپە) قسێش کەردێ و ئاماژەش پانەیە کەرد، کۆشیایی ئازادی نیمسەدەو وەڵێ فرە بەهێش خوڵقنێ و پێویسا خاوەنداریی چا بەهایا بکریۆ و ئانەیچش وست ڕووە، کە هەنگام بە هەنگام گوڕ بە کۆشیای مدانێ و جەختش کەردۆ، "پا ویر و بڕواوە خاوەنداریی وەنەو خاک، هێز، زوانوو وێما مکەرمێ و کوردستانی مپارێزنمێ. ئێمە جە چوارپارچەو کوردستانینە بە سەرمەشقایەتیی ڕابەروو گەلوو کوردی عەبدوڵا ئۆجالانی مبیمێ بە ساعیبێ قەوارەی. دەوڵەتوو تورکی ئەرەگیرکەری گەرەکشا ئێمە جە بەهاکاما بڕۆرە و گەرەکشا زیاتەر دابەشما بکەرۆ و جە یۆترینی بڕۆما. بەڵام بەهاکێما و یادەوەریما ڕانیشاندەرێمانێ. ئێمە تا سەر خاوەنداری وەنەو بەها و دەسکەوتەکاما مکەرمێ و مپارێزنمێشا. تا ئازادێ بیمێ درێژە بە کۆشیای مدەیمێ."

بایندر درێژەنە واتش، گەلوو کوردی چوار پارچەو کوردستانینە پێسەو پەنابەریش سەرئامان و واتش، "کەی بێ با بێ، چندە دژوار بۆ بابۆنە، ڕوێو مێ گەلەکەما مافەکاش بەدەس مارۆ و کورد وێش مبەرۆنێ ڕاوە و هەرگیز دژوو ستەم و زۆرداری سەرە نمەکۆمنۆرە".

هامسەرۆکی گردینوو دەبەپەی باسش چانەیە کەرد، کە وەردەنگ و موخاتەبوو چارەسەروو پەرسەو کوردی ڕابەروو گەلوو کوردی عەبدوڵا ئۆجالانا، پێسە دماییش بە قسەکاش ئارد: "پەرسەو کوردی چارەسەرش هەن، چارەسەرییەکە ئازادیی ڕابەروو گەلوو کوردی عەبدوڵا ئۆجالانیا. کەردەیوە بەرەو ئیمراڵییا. چارەسەری بە ونی نمەکریۆ، بە سیاسەتی کۆلۆنیالیستی، داگیرکەری و قەیوم پەرسەو کوردی چارەسەرە نمەکریۆ. بە ددانیایپۆرەی، قەبووڵکەردەی و ئازادی چارەسەری مسۆگەر مبۆنە. ئەگەر شمە بە کوشتەی چارەسەری مکەردێ  وەراوەروو گەلوو کوردیوە تا دمایی وێگێریی مکەرۆ. وەروو ئانەیە گەلوو کوردی داواو زوان، کولتوور، شناسنامە و خاکوو وێش مکەرۆ. ڕۆ ڕۆو چارەسەری، ئازادی و کۆشیایا. ئێمە پێسەو ژەنا، گەنجا و گردوو ڕێکوزیایەکاو کوردی زیاتەر پەرە بە کۆشیای مدەیمێ. تا دما دڵۆپەو ونێما درێژە بە مدرامانی مدەیمێ".

کۆبییەیوەکەی بەواتەواچ و وستەیڕووەو ڕەخنە و وەڵێنیازەکا دماییش ئاما.