ڕابەروو گەلوو کوردی عەبدوڵا ئۆجالان ماوەو زیاتەر جە ٢٥ ساڵان ئینا گۆشەگیری ئیمراڵینە. پەی ئازاڎیی جەستەی ڕابەروو گەلوو کوردی عەبدوڵا ئۆجالانی هەڵمەتەو "ئازاڎیی پەی عەبدوڵا ئۆجالانی، چارەسەری پەی پەرسوو کورد"ی جە ١٠/١٠/ ٢٠٢٣ێوە دەسشپنەکەردەن، هەر چا چوارچێوەنە جە بەینوو ١٥-٢٢ۍ حوزەیرانی چالاکیۍ بە نامونیشان و 'ڕووان و دیالۆگی چنی ئۆجالان'ی جە چڼین یاگێنە ئەنجام مڎریۆ.

جە بەرلین و پایتەختوو ئەڵمانیاینە بە سەرمەشقایەتی کەوانەی زێڕینی و ئەنداماو یۊبیەی ژەنا کوردی جە ئەڵمانیا (یەژەکە-ئە) جە مېڎانوو ماریانین پلاتزینە جە چوارچێوەو 'ڕووان و دیالۆگی چنی ئۆجالان'ی جە دژوو سیستموو گۆشەگیری ئیمراڵی  پێرفۆرمانسېوەشا پێشکەشکەرد.

بەشدارا چالاکیەکەی بە گۆرانیەو 'ئامارا'ی پێرفۆرمانسەکەشا پێشکەشکەرد و گۆرانیەو 'نامۍ ئێمە'ی گرووپوو ئاوازو کەشیشا واتۆ.

دماو تەمام بیەی پێرفۆرمانسەکەی وەڵاکەردەیۆ دیدگاکاو پارادایموو ڕابەروو گەلوو کوردی عەبدوڵا ئۆجالانی سەرو پارچە کاغەزێوە گولانەیۆ وەڵۍ کریێوە بە مەبەسوو زیاتەر وەڵاکەردەیۆ و ئاشناکەردەی پارادیمەکا دلۍ گلېرگەینە.