ڕۆو ١٤و حوزەیرانوو ساڵەو ٢٠١٨، کەسوکار و پاسەوانەکاو ئیبراهیم خەلیل یڵدزی، پەرلەمانتاری وەڵینوو ئاکەپەی ڕحانە، مەنتێقەو پیرسوسینە هجوومشا کەرد سەروو بنەیانەو شەنیاشاری. چا هجوومەنە هامژینە و دووێ کوڕێ ئەمینە شەنیاشارێ بەشێوێوی دڕندانە کوشیێ. ئەمینە شەنیاشارە و کوڕەکەش پەرلەمانتاروو پارتوو یەکسانی و دیموکراسیی گەلا (دەم پارتی) فەرید شەنیاشار، کە بەبرینداری هجوومەکەنە دەرباز بی، ئێشکگێریی دادپەروەرییشا فاڕاوە پەی وەردەموو وەزارەتوو دادی، ئێشکگێرییەکە ئینا ڕۆو ١٢٠ەمینینە بەردەوام بێ. هامسەرۆکی گردینوو کۆمەڵەو مافەکاو ئینسانی (ئیهەدە)ی، حوسەین کوچوکبالابان و ڕاوەبەراو لەقوو ئەنقەرەو ئیهەدەی و ئامەد و ئەنتاڵیا و ئەدەنە و مێرسین و ئەزمیر و ئیستەنبوڵ و وان و ئاگری و شەرناخ و سێرتی بەشدارێ بێنی.

هامسەرۆکی گردینوو ئیهەدەی حوسەین کوچوکبالابان سەردایەکەنە واتش: "تاوانبارێ دیارێنێ و ئێمە ماچمێ داواو دادپەروەریی ئەدا ئەمینەی، داواو ئێمەنە. داوا وەنەو حکومەتی مکەرمێ دەس چی سیاسەتەو دەربازبییەیە جە سزێ وربگێرۆ".