دۆڵەو گۆدەرنەو بەینو مەنتێقەکاو پاسوری، لجێ، فارقین و هەزرۆو ئامەدی بۆنەو وەشکەردەی بەنداویوە وێرانێ کریێ. بەنداووو سیلڤانەی دۆڵەو گۆدەرنەینە کە تاریخیوی هەزاران ساڵەش هەن و پردەو تاشکوپری تارێخییێ موزۆنە چێروو ئاوێوە. چوارچوە پڕۆژەکەینە تا ئیساتێ زیاتەر جە ١٠ دەگایا کەوتێنێ چێروو  ئاوێ و نزیکەو ٥٠ دەگایا تەریچ مگنانێ چێروو ئاوێوە.

'سەروازەکێ بە زۆر دەگایەکێشا تاڵانێ کەردێ'

دەگایەکاو قۆکانی و کەرکاو پاسوری دووێ چا دەگایانێ، کە مگنانە چێروو ئاوێوە. دەگانشینێ پا سەروو ئانەیە مگێرارە کە دەگایەکاشا چۆڵێ نەکەرا، بەڵام بۆنەو هەرمانەکاو وەشکەردەی بەنداویوە بەشێوی فرەو زەمینەکاشا تاڵانێ کریێنێ. دەگانشینێ ناڕەزایەتیی وەراوەروو ئا هەرمانێ بەرموزانێ، بەڵام کاربەدەساو دەوڵەتی ناڕەزایەتییەکاشا پەشتگۆش موزانێ.  

ماشاڵا کامەران واتش کە ستافوو بەنداوەکەی چەنی سەروازا مگنانێ دلێ دەگێکێ و بەزۆر زەمینەکاما تاڵان مکەرا، ئێمە گەرەکما نییەن زەمین و دەگایەکاما جیا بازمێ. بە سەدان هێکتارێ زەمینوو من کە تاپۆش بێ دەوڵەتی دەس ملەرە گێرتەن و کریان بە قوربانیی بەنداوی. نە دارێوەشا ئاست چنە و نە ولێوە، دلێشانە ڕەنجما دابێ، زارۆڵەکێم چون هەرمانەشا نەمەنە ڕووە مکەرانە شارەکا و پێسەو کرێکاری بیناسازی هەرمانە مکەرا. شپرزێ و پەرێشانێ بیێنێ، وەختێ وێما زەمینما هەن چی مشۆم ناچارێ بکریەیمێ بلمێ شارەکاو وەرنیشتی و زارۆڵێ بگنانێ ئا دۆخەوە".

کامەران بەشێوی قسەکاشنە واتش، "ئانێ چەمشا بڕییەن ڕەنجوو کەسای تەری ئاخۆ جە خودای متەرسانێ، جە دین و ئایینی نمەتەرسانە، ماچایچ مسوڵمانێ، باوڕدارێنمێ. ئینە چە باوڕدارییێوا بە ئایین؟ خاسا باوڕمەندی چەمبڕیەین ڕەنج و مانیای کەسای تەری؟ "

'ئێمە قەبووڵش نمەکەرمێ '

ئارەزو کامەرانیچ واتش، "ئی بەنداوە نە دارش ئاستەن، نە تارێخ. چند ساڵێن دژوو ئا بەنداوەیە دەنگ بەرز مکەرمێوە، بەڵام کەس گۆش نمەگێرۆ. کەس خاوەنداریی وەنەو مدرامانوو ئی گەلەیە نمەکەرۆ. کەس دژوو ئی کۆکوشییە نمەمدرۆوە. وەڵێ چند ڕوێنە تابورێوی سەروازەکاشا وست دلێ زەمینەکاوە تا نەتاومێ دژوو تاڵانکاریی زەمینەکاشا بمردمێوە. سەرباروو ئینەیچە ئێمە ناڕەزایەتیما نیشانە دا، دژشا مدرایمێوە و سەروازەکێ سووکایەتییشا پنە کەردیمێ. دیمەنەکێما تۆمارێ کەردێنێ، بە زۆر دەسشا سەروو تەلەفونەکامارە گێرت و دیمەنەکێشا سڕییێوە. بەشێوی فرەو شۆفێر و کرێکارەکا کوردێنێ، خەڵکوو ئی خاکەینێ، ئاخۆ شەرم نمەکەرا، وەختێو ناڕەزایەتی بەرموزمێن ماچانە ئێمەیچ کوردێنمێ، بەڵام کوردێ نییەنێ، کورد نیشتمانوو وێش کاول نمەکەرۆ".

'با کەس پەی زەڕی خاکوو وێش نەورەشۆ'

ئارەزو کامەران باسش کەرد، کە ئا ئەدێ پەی ڕاگێری وەنەو تاڵانکەردەی زەمینەکاشا ئێشکگێری مکەرا سەروازەکێ سووکایەتییشا پەنە مکەرا و بە مۆڵدای سەروازە فرا گەرەکشانە خەڵکی بتەرسنا دەس ملوو ئا زەمینارە بگێرا، کە تاپۆکەش ئینا نامێ دەگانشینەکاوە و پێسەیچ بەتەمامەتی ژیوگەکەی وێران مکەرا، چا ڕووەوە داواش کەردە دەگانشینێ بە هیچ جۆرێو ڕازیێ نەبانە بە ورەتەی و چۆڵکەردەی زەمینەکاشا.