واتەواچەو دەم پارتی ئایشەگوڵ دۆغانە ئەرەیاۋناش ئانۍ چی دماییەنە گفتوگۆشا دەس پنە کەرڎەن هیچ نەخشەڕێوەشا پەی ڕای گرڎیی وەڵا نەکەردەنۆ، تەئکیدش کەرڎۆ مشۆم بەرەکۍ ئیمراڵی بکریاوە و ڕابەرو گەلوو کوردی عەبدوڵا ئۆجالان بەشداربۆ جە گفتوگۆکانە.
واتەواچەو پارتو یەکسانی و دیموکراسیی گەلا (دەم پارتی) ئایشەگوڵ دۆغانە دەربارەو کۆبیەیۆ لوجنەو ڕاوەبەری ناوەندو پارتەکەیشەنە کۆنگرێوە ڕۆنامەوانیش بینا.
پەرسو کوردی
ئایشەگوڵ دۆغانە سەرنجش وست سەرو سڵامەکەو باخچەلی جە ١ و ئۆکتۆبەری جە پەرلەمانتارا دەم پارتی، ئەرەیاۋناش پەرسو چارەسەری پەرسو کوردین جە ١ و ئۆکتۆبەریوە نەبیەن بە ڕۆژەڤو پارتەکەیشا، دەمێوەن مژاری سەرەکی پارتەکەیشانە، پەرسو کوردی گۆرەتەرین و بنەڕەتیتەرین پەرسو تورکیاین، بەڵکم پەرسو تورکیای و هەرێمەکەین.
ئەرەیاۋناش چارەسەرو ئی پەرسەیە پەنەوازش بە نزیکایەتیێوە جدی و قووڵی و تاریخیا، ئەگەر ئی پەرسە بە ڕاو دیموکراتیکی چارەسەر نەبۆ، ئابووری و دیموکراسیی جە تورکیانە وەڵۍ نمەگنا. جەختش کەردۆ، چێگە و چا باس جە چارەسەری مکریۆ، بەڵام چێوۍ ئەوتۆ پەی ڕای گرڎیی و دەم پارتی ڕۆشن نەبیەنۆ، واتش: "ئی قۆناغەیە پېسە پرۆسەو چارەسەری پێناسە نمەکەرمۍ، متاومۍ واچمۍ بڕۍ گفتوگۆ هەن".
"نەخشەڕا پەی ڕای گرڎی وەڵانمەکەراوە"
دۆغانە ئەرەیاۋناش ئاڎۍ ڕابەرو گەلوو کوردی عەبدوڵا ئۆجالانی پېسە نامونیشانو چارەسەری پرسو کوردی وزاڕووە، واتش: "ئانۍ گفتوگۆشا دەس پنە کەرڎەن، دەربارەو چارەسەری پرسو کوردی بە ئاشکرا قسۍ نمەکەرا و هیچ نەخشەڕێوە پەی ڕای گرڎی وەڵا نمەکەراوە".
دەم پارتی ئەرەیاۋناش پېسە دەم پارتی ئاماڎێنۍ گرڎ ۋەرپرسیاریۍ و دەسوەڵێوستەیۍ بگێرا ئەستۆ و ئاماڎێنۍ گفتوگۆی جدیتەر بکەرا، واتش: "ئێژا ئۆجالان نەک هەر جە کورڎەسان و تورکیانە ئەکتەرێوە سەرەکییا، جە ۋەرکۆتوو مېیامینیچەنە خاوەن ویر و پەیلوای چارەسەرین".
"بەرەکا ئیمراڵی بکەردێوە"
دۆغانە جەختش کەرڎۆ، گۆشەگیری ڕێبازێوە ئەشکەنجەیا و قبووڵ نمەکریۆ،: "سەرۆکو مەهەپەی باخچەلی مۍ و بانگەواز جە ئێژا ئۆجالانی مکەرۆ، هامسەرۆکو ئێمەیچ جوابش داوە. ئێمەیچ واوەیش مکەرمێوە. بەڕاسی پەی ئێمە یاگۍ پرسیارێن، ڕا ۋەردەم و ئێژا ئۆجالانینە مکەراوە، ڕا ۋەردەمو ڕای گرڎینە مکەراوە، ئێمە چەمەڕێنمۍ، بزانمۍ چنی جواب مڎاوە، چێش ماچا؟".
دۆغانە جەختش کەرڎۆ، نمەکریۆ درێژە بە گۆشەگیری بڎا و چەولایچۆ بانگەواز جە ڕابەرو گەلوو کوردی عەبدوڵا ئۆجالانی بکەرا، پەنەوازا ڕا پەی موخاتەبی بکریۆوە، واتش: "ئەگەر بەرەو ئیمراڵی نەکەراوە، گۆشەگیری دمایی پنە نارا، ئۆجالانی بەشدار نەکەرا جە گفتوگۆکانە هەر دلۍ گفتوگۆینە مەناوە و هیچ وەڵێکۆتەیۍ نمۍ دی. بانگەواز واوەی مکەرمێوە، مشۆم گۆشەگیری هۆربگێرا، ڕاو بەرەو ئیمراڵی بکەراوە، ئێژا ئۆجالانی بەشداربکەرا چی گفتوگۆیانە".
