ئەرەیاونیا کە سەنتەری زوانەوانیی (پڕۆفیسۆر دکتۆر حەمەو مارفی) زانکۆو هەڵەبجەینە، دووەمین دیداروو (پڕۆفیسۆر د.حەمەو مارفی، گەنجینەی زوانەوانیی کوردی) مبەرۆ ڕاوە...

ئەرەیاونیاکەی ئەرەیاونانش کە دیدارەکە ڕۆو یەکشەممەی (٢٠٢٤/٦/٢٣) سەعات (٩:٣٠)سەرسەعبی  هۆڵوو مودەڕیسوو کۆلێجوو پەروەردەو شارەزوورینە مبۆنە و سەرەڕاو پێشکەشکەردەی چند بابەتێوی زانستی، جەمێو چالاکیێ هەمەنۆعێ  پێشکەشێ مکریانێ و دیدارەکە ماوەو ڕوێوی مخواینۆ.

یاگێ واتەینە حەمەو مارفی، زانایێو  نامیەو بواروو زوانییا، ڕاو وانە ‌و نویستەیەکاشۆم خزمەتێوی فرەش بە زوانی كوردی كەردەن یاگەدەسش زوانەوانیی کوردیینە دیارا .

محەمەد مەعرووف فەتاح، نامێ تەمامەو ئی زاناو زوانەینە و بە "حەمەو مارفی" نامیەن

ساڵەو 1943 لە گەڕەكەو كانی ئاسكانوو شاروو سلێمانی-ینە ئامان دنیاوە .

قۆناغەكاو وەنایش سەرەتایی‌ و ناوەندی ‌و ئامادەیی شاروو سلێمانی-ینە تەمامنێنێ و ساڵەو  1960 بەكالۆریاو بەشی وێژەیینە یوەموو شاروو سلێمانی‌ و یەرەموو عێراقی بییەن.  

ساڵەو 1961 بەشوو زوانی ئینگلیزی كۆلیجوو پەروەردەو زانكۆو بەغداینە ورگیریان، دماو چوار ساڵا وەنا، بڕوانامەو بەكالۆریۆسییش بەپلەو شەرەفی لە زوانوو ئینگلیزیینە ئاردەن.

دماو وانای زانکۆی، بە بە مامۆستاو ئینگلیزی مەکتەبە ناوەندی ‌و دماناوەندییەكانی هەڵەبجە‌ینە و سلێمانیینە وانەو ئینگلیزییش واتەنۆ.

ساڵەو 1973 زانكۆی ئەمریكی بەیروتینە، بڕوانامەو ماستەریش زوانی ئینگلیزیینە ئاردەن، وەروو هەڵوێستە نیشتمانپەروەرییەکاش، حەرچەند قبوڵوو زانكۆیێوی نامیەو بەریتانیایش ورگێرتەبێ پەی وەنای دكتۆرای، بەڵام بۆنەو هەڵوێستە نیشتمانییەكاشۆ، ڕژێمی بەعسی ڕاش پەنە نەدا  پێنەدا دكتۆرا بوانۆ.‌

ساڵەو 1997 وەڵاتوو هۆڵەنداینە، بڕوانامەی دكتۆرایش زوانەوانی بەراوردنە (زوانی ئینگلیزی‌ و زوانی كوردی)ینە بەدەس ئاردن و  پلێ زانستییەش بیێنە پڕۆفیسۆر.

ماوەو 35 ساڵا پێسەو مامۆساو زانكۆی لە زانكۆكاو  سلێمانی ‌و سەلاحەدین ‌و دهۆك‌ و كۆیەنە خزمەتش کەردەن ‌و سەرپەرشتوو زیاتەر جە 200 نامە ماستەر‌ و دكتۆرایا زوانییش کەردەن.  

ساڵەکاو  1986-1992 سەرۆكوو بەشوو كوردیی كۆلیجوو ئادابوو زانكۆو سەلاحەدینی بییەن و بە هەوڵ‌ و هیمەتش   وانای باڵاو ماستەر‌ و دكتۆرای بەشەکەنە کریانۆ.

 ساڵەکاو 1991-1992 یەک وەختەنە سەرۆكایەتیی هەردووە بەشوو كوردی ‌و ئینگلیزیی كۆلیجوو ئادابوو زانكۆو سەلاحەدینیش كەردەن.

ساعیبوو 5 كتێبا و زیاتەر جە 45 ئەوەکۆڵییە زانستیییان بوارەكاو زوانی ‌و زوائشناسی‌ و زوانەوانیی بەراورد‌ینە و گۆڤارە زانستییەكاو دلێ و بەرینە وەڵێش کەردێنێوە، بە پاو ویروڕاو ئەکادیمییەکورداو بواروو زوانەوانیی کوردیی ئەوەکۆڵییە زوانەوانییەکاو ئیساتی زوانوو کوردیی، فرەتەرین یاگەدەسوو د.حەمەو مارفیشا پۆوە دیارا و داراو پەیلوای وێش بییەن بارەو زوانی کوردیوە.

ئەندامی كاراو ئەكادیمیای كوردی‌ و سەرنویسەروو گۆڤاروو ئەكادیمیای بییەن،  

ڕۆو 22ێ حوزەیرانوو  2010، کۆچی دماینش کەرد و قەبرسانوو  سەیوانوو شاروو سلێمانی-ینە نریا.