رابەروو گەلوو کوردی عەبدوڵا ئۆجالان زیاڎ جە ٢٥ ساڵان ئینا زیڼانوو دوورگەو ئیمراڵینە و دلۍ هەلومەرجۍ دژواری گۆشەگیرینە زیڼانیا و ٣٩ مانگێچا بەحیچ جۆرۍ هەواڵ و زانیاری جە بارەشۆ ۋەردەس نییا. دەوڵەتو تورکی کە جەئیمراڵینە رژێمێوە گۆشەگیری تایبەتیش ئەرەمەرزنان، هەم یاساو دلېینەو وڵاتەکەیش و هەمیچ رژێمی یاسایی میان نەتەوەیی پاشێل مکەرۆ و یاسای دوژمنکارانە سەرو ئۆجالانیرە مسەپنۆ. هەلومەرجێوە کە عەبدوڵا ئۆجالان چنەشەنە زیڼانی کریان، دلۍ گەلوو کوردی و سەرو ئاستی میان نەتەوەییچ ناڕەزایەتیش شۊنەو ۋێشەرە ئاورد.

سکرتێرو گرڎینوو یۊبیەی نەتەوەیی پارتیزانا ئیتالیایی (ئای ئێن پی ئای) فاریزیۆ و دی سانکتێز جە بارەو پەرسوو گۆشەگیری ئیمراڵی قسێش پەی ئاژانسوو هەواڵوو فوراتی کەردۍ.

'گۆشەگیری جۊرێوەن جە فشاری فاشیستی'

دی سانکتێز ئانەش وست ڕووە کە هەلومەرجوو زیڼانیکەردەی عەبدوڵا ئۆجالانی حەجگیز مایۍ قبوڵکەردەی نییەنە و واتش، "ئی گۆشەگیریە جۊرێوەن جە فشاری فاشیستی و تیرۆریستی. عەبدوڵا ئۆجالان سەرکردێوەن کە ملیۆنان ئینسانۍ وەششا مسیۆ. ساڵەی ۋییەرڎۍ ئامەدەنە بێنا دەرفەتم پەی رەخسیا کە چنی فرەو کەس و رێکوزیایا و کۆمەڵا دیڎار ئەنجام بڎەو. هەر کەسی دۊنینی واچۍ، زیڼانی کەردەی ئۆجالانی بە مەعناو زیڼانیکەردەی تەماموو گەلوو کوردیا. درک پانەی مکریۆ، ۋەروو ئانەی ئەگەر شمە ئینەی ۋەرا ۋەر بە سەرکردەو گەلوو کوردی بکەردۍ، ئایا چېش سەرو گەلوو کوردیرە نماردۍ؟ هاموەخت چنی گۆشەگیری فشارێوە تنیچ وزیان سەرو گەلوو کوردی، کوشیانە. مشۊم ئینۍ گرڎ بە زۋانێوە ڕۊشن شەرمەزار بکریا. نمەبۆ ئێمە کردەوەکا ئیمراڵی و ئانۍ ۋەرا ۋەر بە گەلوو کوردی مکریا قبوڵ بکەرمۍ یاخود ئاستشانە چەمۍ قوجنمۍ. بە مەڵامەتوو ئینیشاوە مشۊم ۋنەپەرسایۆ جە تورکیای بکریۆ".

'نمەبۆ سی پی تی جە ۋەرا ۋەر بە ئاژەو مەترسیڎاروو ئیمراڵی بێدەنگ بۆ'

سەرۆکی گرڎینوو ئەی ئێن پی ئای دی سانکتێز ئانەش وست ڕووە کە پېسە ئەی ئێن پی ئای ئاڎێچ نامەشا پەی کۆمیتەو ڕاگێرتەی جە ئەشکەنجەو ئەنجومەنوو ئەوروپای (سی پی تی) کیاستەن، داواشا ۋنەکەردێنۍ جە ۋەرا ۋەروو هەلومەرجوو عەبدوڵا ئۆجالانینە هەوڵەکاشا بوزانە گەڕ.  باسش چانەیچ کەرد کە، "پێسە فرێوە جە ئەرەمەرزیاکا ئێمەیچ نامەما پەی سەرۆکوو سی پی تی کیاست. سی پی تی جوابش داوە کە جە نزیکۆ چەمڎاری ئاژەو عەبدوڵا ئۆجالانی مکەرا. جە جوابەکەنە ئەرەیاۋییا کە کۆمیتەکە ساڵەو ٢٠٢٢ سەردای زیڼانوو ئیمراڵیش کەرڎەن و پەی ئانەی هەلومەرجوو عەبدوڵا ئۆجالانی بواڕیۆ درێژە بە فشارەکاشا مڎا.

ئێمەیچ بەردەوامۍ بیمۍ تا زانیاری جە سی پی تی هۊربگێرمۍ، ۋەروو ئانەی سی پی تی جە فرەو بوارانە کارمکەرۆ، بەڵام هەڵوێستەکەش ۋەرا ۋەر بە عەبدوڵا ئۆجالانی و یەرە زینڎانیەکەی تەروو ئیمراڵی مایۍ قبوڵکەردەی نییەنە، ۋەروو ئانەی ئینسان چا نمەتاوۆ باس جە بیەو مافەکا مرۆڤی، یەکسانی و ئازاڎیی بکەرۆ. جە دورگەو ئیمراڵینە ئاژێوە مەترسیڎار هەن و ئینەیچ حەجگیز مایۍ قبوڵکەردەی نییا".

'گۆشەگیری پەرسێوە میان نەتەوەییا کە پەنەوازش بە ئەرەکۊشاین'

دی سانکتیز باسش چانەی کەرد کە مشۊم یۆبیەو ئەوروپای و ئەرەمەرزیێکێش جە ۋەرا ۋەر بە گۆشەگیری ئیمراڵی بێدەنگۍ نەبا و سیاسەتەکاشا ۋەرا ۋەر بە تورکیای بواڕا و واتش، "جە پەرسوو ئاژەو عەبدوڵا ئۆجالانینە کە بیەن بە ڕەمزۍ، مشۊم ئێمە فشارێوە حەقەتینە جە تورکیای بکەرمۍ. ئێمە نمەزانمۍ بەڕێز ئۆجالان زینڎەن یان نا. چڼین ساڵێن نمەتاوۆ بنەیانە یاخود پارێزنەرا ۋێش بوینۆ، ئینە ئابڕو شیەیۍ میان نەتەوەییا کە نمەکریۆ ۋەرا ۋەر پانەی بێدەنگۍ بیمۍ. ئەوروپا مشۊم پەشتیوانی جە ژڵېوەو ئازاڎیی مافوو چېردەسا بکەرۆ و پی جۆرە سیاسەتی میان نەتەوەیی ۋێش بواڕۆ".

'سات و سەوداو مامەڵەی چەپەڵ پاسە مکەرۆ کە ئەوروپا ۋەرا ۋەر بە تورکیای بێدەنگ بۆ'

دی سانکتێز ئەرەیاۋناش کە بە مەڵامەتوو مەسڵەحەتە ئابوری و جیۆپۆلیتیەکاوە ئەوروپا جە ۋەرا ۋەروو پاشێلکارییە نایاساییەکانە جە ئیمراڵی هەڵوێسېوە بێدەنگیش گێرتەن ۋەر و واتش، "جە بارەو کۆچبەراوە رێککەوتەیش چنی تورکیای کەردەن، ئینەیچ پاسە مکەرۆ کە ئەوروپا جە ۋەرا ۋەروو ئاژەو دلېینەو تورکیاینە بێدەنگ بۆ. واتە ئانەی تورکیا پەی ئەوروپایش مکەرۆ بە راسی کارێوە چەپەڵا. جگە چانەیچ رێککەوتەی سەروازیچش چنی تورکیای هەن. کاربەدەسا ئیساتۍ یۊبیەی ئەوروپای زیاتەر جە رێزگێرتەی جە مافەکا مرۆڤی گرنگی بە مەسڵەحەتەکاشا مڎا".

'مشۊم عەبدوڵا ئۆجالان ئازاڎ بکریۆ' فابریزیۆ دی سانکتێز ئاماژەش بە گرنگی پاڕادایموو رابەروو گەلوو کوردی عەبدوڵا ئۆجالانی کەرد و واتش، "بەڕێز ئۆجالان فەیلەسوفێوە فرە گرنگا. قسەکێش جە بارەو یەکسانی ژەن و پیایۆ، هەوڵ و ئەرەکۊشای جە دژوو دەوڵەتی، ئەندێشە سیاسیەکێش فرە گرنگېنۍ. بەڵام تا زیڼانی بۆ ئاڎ نمەتاوۆ بە تەمامیی گوزارشت جە ئەندێشەکاش بکەرۆ. پەی ئانەی مرۆڤایەتی فەیلەسووفێوە گەورە جە دەس نەڎۆ مشۊم ئازاڎ بکریۆ. مشۊم ئازاڎ بکریۆ؛ ۋەروو ئانەی کردەوەکۍ دژ پاڎیی تاوانێنۍ دژبە مرۆڤایەتی، تاوانۍ سیاسیێنۍ. چنی ئاڎیی گەرەکشانە ئەندێشەکایچش بە دیلی بازاوە. حەرپۊکەی مشۊم ئۆجالان ئازاڎ بکریۆ. ئەندێشەکێش ئازاڎۍ بکریا، مشۊم بە شێوێوە ئازاڎ بتاوۆ بەشداری جە گفتوگۆ جەماوەریەکانە بکەرۆ".