هەوڵەکێ بارەو ڕۆشنۆکەردەی دۆخوو ڕابەروو گەلوو کوردی عەبدوڵا ئۆجالانیوە، کە ئینا زیندانوو جۆروو ئێفوو ئیمراڵیینە دلێ هەلومەرجی دژواروو گۆشەگیریینە و ٣٩ مانگێن هیچ هەواڵێوە بارەشەوە نمەزانیۆ و هەرپاسە بارەو دۆخوو زیندانییای تەروو زیندانەکاوە عومەر خەیری کۆنار، حامیلی یەڵدرم و وەیسی ئاکتاش بەردەواما.

کۆمەڵەو مافشناسا پەی ئازادیی (ئۆهەدە)، کۆمەڵەو مافشناسە هامچەرخا (چەهەدە) و یاساو کۆمەڵایەتی وەڵی ئیسەتێچنە پەی دۆخوو ئیمراڵی سەرێ وەزارەتوو دادیشا دابێ، بەڵام هیچ جوابێوەشا نەدریابێوە پەنە. پاسە سەرێ سەندیکاو پارێزنەراو ئەنقەرەیشا دا. ڕێکوزیایەکاو بواروو یاسێ دژوو گۆشەگیری جە ئیمراڵیینە داواشا وەنەو سەندیکاکەی کەرد، کە هەوڵەکاش بوزۆنێ هەرمانە.

دماو ئانەیە دادگاو ئەنقەرەینە داواکارییەکە پێشکەش کریا، کۆنفرانسی ڕۆنامەوانی کریا. هامسەرۆکوو لەقوو ئەنقەرەو ئۆهەدەی چیدەم کۆزان ئاماژەش پانەیە کەرد، کە نمەتاوانێ هەرمانەو پارێزنەرایەتیی وێشا بکەرا و واتش، "پا سەبەبۆ سەرێ سەندیکاو پارێزنەراما کەرد، وەڵێ ئیساتێنە سەرێ یۆبییەی سەندیکاکاما دابێ".