جەمیل ئاکسۆ، سەرپەرشتیارو ئیکۆلۆژی پۆلنی، قسېش پەی ئاژانسوو هەواڵوو فوراتی (ANF)ی کەردۍ و ئەرەیاۋناش، ئی سەڎەو تورکیایە بیەن بە ئاژېوە نائاسایی و ئینەیچ بە تایبەتی جە ساڵەو ٢٠١٥یوە دەسش پنەکەردەن و واتش: "دەسەڵاتدارا بەپاو دەستووری و یاساکا ۋېشا مامەڵە مەکەرا. یاسانیایرە، ئیدارەدای و دادپەروەری گرڎ ئینۍ چېروو دەسوو کۊشکېنە. گېڵای شۊنەو مافدیرە، لوای شۊنەو دادپەروەریرە، مانگرتەی، چالاکییەکۍ بە تنی سەرکوت مکریا. ئی بارە نائاساییەو دەوڵەتی، چنی هجوومکەردەی سەرو جمیەری و ئۆپۆزسیۆنەکۆمەڵایەتیەکا، حەرپاسە هجووم کەردەین پەی سەرو مدرامانوو ژیۋگەی دلېینەی."

ئاکسۆ باسش جە یۊگېرتەی کۆمپانیاکا ج تورکیا و کوردستانەنە پەی دلېنەبەردەی کەشی و دارسانەکا، ڕووبار و هیتیەرە کشتوکاڵییەکا کەرد و ئەرەیاۋناش؛ بەمەڵامەتوو خراپ بەکارئارڎەی و تالانکاریی کۆمپانیاکا، کرێکارا جە شۊنماو کارەکاشا و بەمەڵامەتوو ئا نەوەشیا توششا بۆ، ژیۋای ۋېشا جە دەس مڎا.

یاساو ئەرەگیرکەردەی بەکار مۍ

ئاکسۆ ڕۊشنش کەردۆ کە جە کوردسانەنە یاساو عەزیەت کەردەی هەنە. سیاسەتێوە دووەفاقیەو دلېنەبەردەی ملۊڕاوە و ماچۆ: "کوردسان ئینا ئاژەو ئەرەگیرینە و جگە چانەیچ بیەو نەتەوەو کوردی ڕەڎمکریۆوە و کۊشیای پەی ئازاڎیی و یەکسانی سەرکوت مکریۆ. دووەم: سەرمایە سەروو ئاستی میان دەوڵەتی دەوروو ۋېش موینۆ و سەروو ئا بنەمایۍ سیاسەتوو ئابووری بەرۊنە ڕاوە. بەمەڵامەتوو فاکتەری سەرەکییوە، جوگرافیاو کوردسانی ساڵانێوە فرەن ڕووبەڕوو سیاسەتوو کۆچبەری سیاسی و ئابووری بیەنۆ. چنی پڕۆژەو پانیشتوو ئەنادۆڵی (گاپ) و وەشکەردەی بەحری (بەنداو) چېروو نامۍ "نهێنی"ۍ و "بەحرۍ ئەمنی"ۍ، هێزوو کاری و هێزی سروشتی مەنتیقەکەی پێشکەش بە (سیستم)ی سەرمایەداری کریان. بەمەڵامەتوو ئی دووە سیاسەتە وێرانکەرەیۆ، گەرەکشانە گەلوو کوردی دلۍ یۊینە پارچە پارچە بکەرا و حەرپاسە خەڵکی پېسە کرێکاری هەرزانی جە پیشەسازی و خزمەتگوزارییەکاو شارینە بەکاربارانۍ. ئینە تەنیا باس و جە یۆدایۆی نییا، تەنانەت نوویسەرا بەکرێگرتۍ سەرمایەی (سیستم)ی بە ڕۊشنی باسشا سەر کەردەن."

شمە جا پارېزنای ژیۋگەینە ۋەرپەرسېندۍ

ئاکسو بە ئاماژەدای پانەی ئەرەگیری سیستمێوەن کە بە ۋن متەی چێرخان و سەرخانوو وڵاتی تاڵان مکەرۆ و تنووتیژیېوە دڕندانە وەرا ۋەر بە گرڎوو زیندەوەرا سەرو زەمینی ئەنجام مڎۆ. کێشەو وشکەساڵی جە کوردسانەنە فرە جدیین. ئیساتۍ زەڕاتەی دێمیەی دەسکاریکریۍ جە مەنتیقەو بەرهەمئاوردەی دیجلەینە منریۆ. جە بنارو کەش و جودینە دارسانەکۍ بڕیاوە. گرڎ هامنېوە ۋەروو مەڵامەتی "ئەمنی" دارسانەکۍ جە درەختا پاکۍ مکریاوە. کۆمپانیاکۍ بەبێ گۊشدای بە ڕا یاساییەکا ژیۋگەکا وێران مکەرا. جە سەرەتاو ڕووباروو مورادینە کە لقێوەن جە ڕووباروو فوراتی، کۆمپانیاکۍ و دەوڵەت پېوەرە کارمکەرا پەی بەرئارڎەو ئاڵتونی و سیانوور بەکار مارا، هامشێوەو مەنتیقەو ئیلیچی. ڕووبارەکۍ دیجلە و فوراتی بەمەڵامەتوو کانگا و ئاسەواروو شارەکا و کشتوکاڵی پیشەسازیۆ بیەن بە مەنتیقېوە هۊرشېونایۆ ژیۋگەی. پۊکەی مشۊم جە جەنگوو ئەرەگیری و تاڵانکەردەینە جەنگېوە ئیکۆلۆژی پەرەش پنە بڎریۆ. ئەگەر ئەرەگیرەکۍ گەرەکشانە خاکەکەیت پاسە پنە بکەرا کە دەردەو حیچی نەوەرۆ و بێ بەرهەم بۆ، ئانە ئەرکوو شمەن کە دارسان، ڕووبارەکۍ و هیتیارە کشتوکاڵییەکاتا پارېزندۍ.