قسەکەرەو یەژەکە-ئەی کەزبان دۆغانە فیستیڤاڵوو ژەناو زیلانێنە واتش کۆشیای ژەنا بە سەرمەشقایەتیی ژەناو کوردی جیهانەنە گەورەتەر بۆ، ڕەنگەو وێش فەلسەفەو ڕابەروو گەلوو کوردی عەبدوڵا ئۆجالانیوە ورمگێرۆ و واتش: "ئیتر ژیوایێوی تازە بنیات منیەیمێ".
فیستیڤاڵوو ژەناو زیلانێ ژەنە کورداو ئەورووپای و ئەڵمانیای ڕێکش موزانە، شاروو دویسبۆرگینە بە بەشداریی هەزاران کەسا بەردەواما.
چالاکییەکە یۆبییەی ژەناو کوردوو ئەوروپای بە درووشموو "بە ژەنی، ژیوای، ئازادی، بەرەو شۆڕشوو ژەنێ" ڕێک وزیا و کریا بە سەوقاتوو ئا ژەنە سەرمەشقا کە مانگەو حوزەیرانینە دلێ ڕیزەکاو کۆشیای ئازادیی کوردستانینە گەشمەردێ بیێ.
هەزاران کەسێ بە جلوبەرگی نەتەوەییوە بەشدارێ بیێ، سەکۆو فیستیڤاڵەکەی بە ڕسمێ کادرە سەرمەشقەکاو پەکەکەی ڕازنیێوە، درووشموو "گەشمەردێ نمەمرانێ" و "ژەنی، ژیوای، ئازادی" و "بژیوۆ سەرۆک ئاپۆ" بەرزێ کریێوە.
ماو واتەی سروودەو ئەی ڕەقیبی لاو کۆرۆو زارۆڵاو ڕۆژی و دەیەقێوە ڕێزگرتەی وەنەو یادوو گەشمەردا، بەرنامەو فیستیڤاڵەکەی بەردەوام بی.
قسەکەرەو یەژەکە-ئەی: ژیوایێوی تازە بنیات منیەیمێ
قسەکەرەو یەژەکە-ئەی کەزبان دۆغانە واتش ئینە تەنیا فیستیڤاڵێوی کولتووری و سیاسی نییەن، هاموەخت بەشێوەن جە هەڵمەتەو ئازادیی ڕابەروو گەلوو کوردی عەبدوڵا ئۆجالانی.
کۆشیای ژەنا بە سەرمەشقایەتیی ژەناو کوردی جیهانەنە گەورەتەر مبۆنە، ڕەنگەو وێش جە فەلسەفەو ڕابەروو گەلوو کوردی عەبدوڵا ئۆجالانیوە ورمگێرۆ و ژیوایێوی تازە بە سەرمەشقایەتیی ژەناو کوردی بنیات منیۆ.
دمایی فیستیڤاڵەکە بە مۆسیقا و کۆنسێرت بەردەوام بی، هاموەخت گرووپێوی سەمای ئەفغانی لوێ سەروو شانۆی.
چالاکەی بەلوچییە سافیز مەنزوورە واتش، ئا کۆشیایە بە سەرمەشقایەتیی کۆشیای ئازادیی کوردی مکەریۆ، پەی چندین گەلا سەرچەمەو هومێدی و ئیلهامین.
