دژوو دەوروو کۆمپانیاو بەشکەردەی کارەبێ ئاویرکەوتەیوەکانە، ڕێکوستەی دەم پارتی ئامەدنە وەردەموو بیناو ئا کۆمپانیایەنە کۆنفڕانسێوی ڕۆنامەوانییشا ساز کەرد و واتشا، "ئا کارەساتە بەرش وست، کە کورد گرد یاگێوەنە ڕووبەڕوو کێشەیا".
رێکوستەی دەم پارتی ئامەدنە سەبارەت بە ئاویرکەوتەیوە چنار و شەمرەخنە، کە ٢٠و حوزەیرانی کەوتەبێوە، وەردەموو کۆمپانیاو بەشکەردەیی کارەباو دیجلە (دەداش)ینە، کۆنفڕاسێوی ڕۆنامەوانییش ساز کەرد. ئاویرکەوتەیوەکەینە ١٥ کەسێ مەردێ و بە دەیانیچ بریندارێ بیێ، بە هەزاران دۆنمێ زەمینیچ سۆت، بە هەزاران سەرێ مەی و ئاژەڵیچ مڕارێ بیێوە و شەلوکۆرێ بیێ. خەڵکوو ئا مەنتێقا باسوو ئانەیە مکەرا ئاویرکەوتەیوە بۆنەو کەمتەرخەمیی دەداشیوە بیەن جە تازەکەردەیەوەو تۆڕەکاو فاڕایوە کارەبێنە.
ڕاوەبەراو دەم پارتی و دەبەپەی و چندین کەسێ بەشدارییشا کۆنفڕانسە ڕۆنامەوانییەکەنە کەرد و پلاکاردوو 'مشۆم دەداش خزمەتوو خەڵکینە بۆ نەک دەسەڵات"یشا بەرز کەردۆ.
هامسەرۆکەو ئامەدوو دەبەپەی محەمەد شیرین گوربوزە واتش، کە چندین ساڵێن سیاسەتی چەپەڵ سەروو کوردیرە پەیڕەو مکریۆ و واتش، "دەسەڵاتدار ئا ئەرەمەرزیێ کە پەی خزمەتوو گەلی بێنێ ورەتێنێش. خزمەتگوزاریی کارەبێش پەی خەڵکی بە ڕەوا نەوینا. هەرێمەکەنە ئایرکەوتۆ. ئێمە بۆنەو کەمتەرخەمیی دەداشیوە شەرمەزارێش مکەرمێ".
هامسەرۆکەو ئامەدوو دەم پارتی پنار ساکیکیشە واچێوەش پێشکەش کەرد و مەردەی ١٥ کەساش بە ڕووەدای ئاویرکەوتەیوە یاد کەردۆ و ئانەش وست ڕووە، کە ئایرەکە بۆنەو کەمتەرخەمیی دەداشی و تازەنەکەردەیوە تۆڕەکاو فاڕایوە کارەبێوە کەوتەنۆ، بەڵام وەرپەرساو ئا کۆمپانیایە گەرەکشانە وێشا جە وەرپەرسی بدزانێوە و بابەتەکەی پەردەپۆش بکەرا.
لاو وێشۆ پەرلەمانتاروو ئامەدوو دەم پارتی عەدالەت کایا سەرنجەش پەی سەروو کەمتەرخەمیی نابوەرپەرسیی دەداشی دا و ئانەش وست ڕووە، "پێویسا دەداش کۆنترۆڵ بکریۆ. گردوو هەرمانبەدەسا جە مەردەی ئا ١٥ کەسا وەرپەرسێنێ. حەوڵەکێما پەی وەنەپێتەیوە چا ڕووەدایە بەردەوامێ مبانە. مشۆم زەرەروەنەکەوتێ جە ڕووەو مادی و مەعنەویوە قەرەبوو بکریانێوە و دادپەروەری بچەسپنیۆ".
