گەریلاو هەپەگەی شەڕزان جودی و گەریلۍ یەژا ستاری دیجلە نورەڵا، یاڎوو گەریلۍ پەکەکەی زەینەب کناچیانېشا کەردۆ کە ساڵەو ١٩٩٦ی دێرسیمنە چالاکیێوە فیدایش کەرد و واتشا: "ئارۆنە جە کورڎەسانەنە سەرو هێڵۊ مڎرامانوو زیلانۍ کۊشیای مکریۆ."
گەریلاکاو ئازاڎیی کورڎەسانی شەڕزان جودی و دیجلە نورەڵا بۆنەو ٢٨ەمین ساڵوەگەڕوو گەشمەرڎەبیەی زەینەب کناچۍ (زیلا)ە پەی ئاژانسوو هەواڵوو (ANF)ی قسېشا کەردۍ و باسشا جە چالاکی فیداییانەو زیلانۍ کەرد کە ساڵەو ١٩٩٦ی دێرسیمەنە کەردش.
گەریلۍ یەژا ستاری دیجلە نورەڵا: "هەڤال زیلانە ساڵەو ١٩٧٢ۍ مەلەتی جە ئەڎۍ بیێنە. بە باوەڕداری عەلەوییۆ چنی چاندی کوردی گەورۍ بیە. جە زانشتگەنە بەشی پزیشکی ۋەنۍ. گرڎوو وەختەکا ژیۋایش کە دلۍ سیستەمینە ژیۋای کەرۍ بە حیچ جۆرۍ دەسبەردارەو چاندوو گلېرگەکەو ۋێش نەبیە. فرە عال جە حەقیقەتوو ژیۋای کوردی، حەقیقەتوو گەلوو کوردی، حەقیقەتوو کۆمەڵایەتی و سیستەمی فام کەرۍ. جە ساڵەو ١٩٩٤ی جە ئەدەنەنە بە ڕېبازی ئاپۆیی ئاشنابیە و بەشداری کار و چالاکیش کەرد. جە ساڵەو ١٩٩٥ینە جە دێرسیم بەشدارەو دلۍ ڕیزەکا ئارگەکەی بیە. هەڤاڵ زیلانە جە ماوۍ کەمەنە بە ڕابەرایەتی ئاشنا بیە و بە عالی چنەش یاوانە. ساڵەو ١٩٩٦ی بەچالاکیێوە تاریخی دڵسۆزی ۋێش بە ڕابەرایەتی نیشانە دا. پېسە گەریلاکاو یەژا ستاری گرڎ وەختۍ سەروو هێڵۊ مڎرامانوو زیلانۍ جە ئەرەکۊشاینە بیمۍ. ئارۊنە جە چنڎین مەنتیقۍ کورڎەسانینە سەرو هێڵۊ مڎرامانوو زیلانۍ ئەرەکۊشای ئەنجام مڎریۆ و بە هەزاران زیلانۍ پێڎۍ بیێنۍ. پېسە هامڕایا زیلانی جە زاپ، مەتینا، خواکورک و چڼڎین هەرێمۍ تەروو کورڎەسانینە دژوو دووژمنی جەنگ مکەرا. چېش بۆ با بۆ جە ئەرەکۊشایمانە هەڤاڵ زیلانۍ یاڎ مکەرمېوە."
گەریلاو هەپەگەی شەڕزان جودی: "گەشمەرڎە زیلانە ساڵەو ١٩٩٦ی جە دژوو هجوومەکا سەرو ڕابەرایەتی چالاکی فیداییانەش کەرد. چا وەختەنە هامڕا زیلانە چالاکیەکەش کەرد، سەرو گەلوو کوردی و ڕابەرایەتی هجوومی گەورە بۍ. جە قۆناغێوە فرە سەختەنە ئەرکوو سەرمەشقیش گێرت ئەستۆ و چالاکی فیداییانەش کەرد. هامڕا زیلانە ماوێوە فرە نەبۍ کە بەشداری دلۍ ڕێکوستەیش کەردەبۍ. جە ماوۍ فرە کەمەنە ڕابەرایەتیش ئشناسا، چا ئاستەنە فرە دڵسۆزەو ڕابەرایەتی و پەکەکەی بۍ، کاریگەریێوە فرەش سەرو کادری و گەلی بۍ. بە چالاکیەکەیش جیهانش لرناوە، بتەو گەلوو کوردی و ژەناش نیشانەو جەهانی و دوژمنادا. پەیاموو ژەنا کوردی و پەیاموو ژیۋای ئازاڎیش نیشانەو جیهانی دا. بیە بە مانیفێستەو ڕاسی ژیۋای. زیلانە دەنگوو تەماموو مرۆڤایەتی بۍ ۋەرا ۋەر بە سیستمی فاشیزمی. سەرچەمەو ئەنەیاوایش، فەلسەفەو ژیۋای ئازاڎیی ڕابەر ئاپۆی بۍ. هامڕا زیلانە وەڵۍ ئانەینە چالاکیە فیدایەکەیش بکەرۆ، نامێوەش پەی دماو وێش جیائاست و واتش: "وەشڵەی چێوۍ عالتەر جە گیانیم بیۍ پەی ئانەی فیدام کەردۍ." ئینە مانیفێستێوەن. گرڎ وەختۍ سەرو هێڵۊ زیلانێوە ڕا مکەرمۍ و بە ئەرەکۊشایما درێژە پنەدەرۍ یاڎوو زیلانۍ بیمۍ."
