'گیان جە دەسدای حاجی ئەحمەدی زەرەرۍ گۊرەن پەی شۆڕشو کوردەسانی'
کۆنسەو ڕاوەبەری کەنەکەی ئەرەیاۋناش گیان جە دەسدای حاجی ئەحمەدی زەرەرۍ گۊرەن پەی گەلوو کوردی، شۆڕشو کوردەسانی و کەنەکەی و واتش: "سەرو ڕاکێت بەردەوامۍ بیمۍ، هیوا و ئاواتەکات مارمێنە دی."
حاجی ئەحمەدی
کۆنسەو ڕاوەبەری کۆنگرەو نەتەوەیی کوردەسانی (کەنەکە) بە مەڵامەتو کۆچی هەقەتینو ڕامېیاریمەدار حاجی ئەحمەدی بە پەیامێوە سەرساغی ۋێش پەی گەلوو کوردەسانی، ئەنداماو کەنەکەی، ئەندام و لایەنگرا پەژاکی و بنەیانەو حاجی ئەحمەدی بەربڕی.
پەیامەکەو کەنەکەی پی جۊرەنە:
"هەواڵو کۆچی هەقەتینو ئەندامو ئەرەمەرزنەرو کۆنگرەو نەتەوەیی کوردەسانی و هامسەرۆکی وەڵینو پەژاکی کاک عەبدولرەحمان حاجی ئەحمەدیما لا یاوا و فرە خەمبارێش کەردیمۍ. کاک حاجی ئەحمەدی ساڵەو ١٩٦٤ پېسە خۊنکارێوە کوردی ئامان ئەڵمانیا. چا سەرو بەنڼەنە جە ئۊروپانە تەنیا ڕێکویێوە کوردی بۍ بە نامۍ جەمەو خۊنکارا کوردیۆ، کاک حاجی ئەحمەدی بی بە ئەندامو ئا جەمیە و یاگۍ ۋێش جە هەرمانەو وڵاتپارێزنینە کەردۆ. دماتەر لوا پەی چیکۆسلۆڤاکیای پەی ئانەی چا درێژە بە ۋەنای بڎۆ. جە شارو پراگینە چنی گەشمەرڎە عەبدوڕەحمان قاسملۆی بۆ بە هەمڕا و دماتەر مەبۆ بە ئەندامو پارتو دیموکراتی کوردەسانو ئێرانی (حدکا). جە سەرەتاو شۆڕشو ئێرانینە (١٩٧٩) چنی کاک قاسملۆی گێڵێوە ۋەرکۊتوو کوردەسانی و جە سەرەتاو شۆڕشینە جە ۋەرکۊتوو کوردەسانی یاگۍ ۋێش کەردۆ و جە چوارچێوەو حدکاینە ۋەرپریاریش هۊرگێرتەن و بی بە کادرێوە چنەئاما. دماتەر پېسە ڕاوێژکارو هەرمانوکارو جبەرو حدکای ئاماوە پەی ئۊروپای.
کاک حاجی ئەحمەدی جە جبەرو وڵاتیچ تا دما ڕۊو ژیۋای کۊششکاریش نیشتیمان پەروەرێوە چالاک بۍ. بی بە ئەندامو پەرلەمانو کوردەسانی جە جبەرو وڵاتی، دماتەر مەبۆ بە ئەندامو کۆمیتەو ئاماڎەکاری و دەسەو ئەرەمەرزنەرو کۆنگرەو نەتەوەیی کوردەسانی. ماوێوە فرە ئەندامو کۆنسەو ڕاوەبەری کەنەکەی بیەن و تا دمایی ژیۋایچش ئەندامێوە چالاکو کەنەکەی بۍ. ساڵۊو ٢٠٠٤ پېسە ئەندامو ئەرەمەرزنەری جە کۊنگرەو ئەرەمەرزنای پارتو ژیۋای ئازادی کوردەسانی-پژاکینە بەشداربیەن یۊبیەن جە ئەرەمەرزنەرا ئا پارتەیە، هەر جە کۆنگرەی یووەمیچەنە بە سەرۆکو گرڎینو پژاکی هۊرچنیا.
کاک حاجی ئەحمەدی ٢٦ ساڵۍ ئەندامۍ کاراو کەنەکەی بیەن و چن خولێوەیچ ئەندامو کۆنسەو ڕاوەبەری کەنەکەی بیەن. پېسە ئەندامێوە سەرمەشقی جە گرڎو چالاکیی و گلېرۊبیەکا کەنەکەینە ئاماڎەبۍ. به تایبه تی جە هەرمانکەردەی پەی ۋەرکۊتوو کوردەسانی پێگێوە دیارش بۍ. وەختۍ ئەرەپڕایەکۍ سەرو گەشمەرڎەبیەو ژینا ئەمینیۍ و شۆڕشو ژەنی ژیۋای ئازادی دەسشپنەکەرڎ، هەمڕا حاجی ئەحمەدی سەرەڕاو نەوەشی و تەمەنی فرەیچش، جە جبەرو وڵاتینە بەشداریی جە چالاکییەکانە کەرۍ و یاگۍ ۋێش جە ئەرەپڕاکەینە کەردۆ.
کۆچی هەقەتینو هەڤاڵ حاجی ئەحمەدی زەرەرۍ گۊرەن پەی ئێمە و پەی گرڎو گەلەکەیما و پەی شۆڕشو کوردەسانی. ناڕەحەتێنمۍ بە کۆچی هەقەتینو کاک عەبدولڕاحمان حاجی ئەحمەدی، هامبەشۍ خەم و پەژارەو بنەیانەی و دۆسا ئێژایشانمۍ. پی بۊنۆ پرسە و سەرەوەشی جە تەمامو خەڵکو کوردەسانی و ئەنداماو کەنەکەی و ئەنداما و لایەنگرا پەژاکی و زەحمەتکێشا شۆڕشی و بنەیانەی ئێژایشا مکەرمۍ.
هەڤاڵ حاجی ئەحمەدی دڵنیابە شۊنەو پەیا تۆرە ملمۍ، ئاوات و هیواکات مارمێنە دی."
