جە پەرلەمانوو ئۆرووپاینە، 'گەورەتەرین هامپەیمانی' کە جە پارتە ڕاسڕەوەکا، سۆسیالیست و ناوەندگرەکا پێکئامان، سەرەڕاو زیاڎبېیەی دەنگو ڕاسڕەوە ڕادیکاڵەکا، گەورەتەرین و باڵادەستەرین ژمارەشا جە پەرلەمانەنە بەدەست ئاوردۆ.
جە ٢٧ وڵاتا یۊبیەی ئەوروپاینە ٣٧٠ ملیۆن دەنگدەرۍ لووېنۍ سەرو سنوقەکا دەنگدای پەی هۊرچنیەو ٧٢٠ ئەنداما پەرلەمانوو ئۆرووپای. پەرلەمانوو ئۆرووپای پېسە ئەرەمەرزیېوە یۊبیەی ئۆرووپای گرنگیش پېڎا کەردەن و ٥ ساڵۍ جارۍ جە تەرەفوو هاموڵاتیاوە هۊرچنیۆ.
جە ئاژەو ئیساتېنە ئەرەیاۋییا کە پارتەکۍ گەلوو ئەوروپای (EPP)، سۆسیالیست و دیموکراتەکۍ (S&D) و ئەوروپای تازە (RE) پێوەرە ٣٩٨ کورسیېشا بەدەسئاوردېنۍ. ئی هامپەیمانییە جە کۆو ٧٢٠ کورسیا پەرلەمانوو ئەوروپای واتە باڵادەسی پەرلمانیشا بەدەس ئاوردەن.
ئەنداما تازۍ پەرلەمانو ئۆرووپای
ژمارەو ئا پەرلەمانتارا کە تا ئیساتۍ سەر بە حیچ گروپێوە سیاسیی نیەنۍ بە ١٠٢ پەرلەمانتارۍ مەزڼە مکریا. ئی ئاژە ڕەنگە بۆ بەمەڵامەتوو ئانەی کە کۆنەپەرسا نەتەوەیی و گرووپە ڕاسڕەوە تنڕەوەکۍ هێزشا چنگە گنۆ. حەرپاسە سەوزەکۍ و چەپە ڕادیکاڵەکۍ کورسیەکېشا جە دەسدۍ.
بەشکەردەی کورسیەکا بەپاو گروپەکا
چانەینە ١٨١ کورسیۍ پەی پارتوو گەلوو ئەوروپای با و حەرپاسە ١٣٥ کورسیۍ پەی سۆسیال دیمۆکراتەکا و ٨٢کورسیۍ پەی ئەوروپای تازەی، پارتوو سەوزی کورسیەکېش جە ٧٢ کورسیېوە پەی ٥٣ کورسیا کەمۍ کەردېنۍ. گروپوو چەپی تەنیا ٣٤ کورسیېش بەدەس ئاردېنۍ. کۆنەپەرسا نیشتمانیی یۊبیەو ئەوروپای ٧١ کورسیېشا بەدەسئاردېنۍ، جە وەختېنە گروپی ڕاسڕەوی ڕادیکاڵ ٦٢ کورسیېش بەدەسئاردېنۍ.
پارتە سەوزەکۍ جە سەرانسەرو ئەوروپاینە دەنگەکېشا کەمشا کەردەن
جە ئەڵمانیا و فەرەنسانە پارتە سەوزەکۍ دەنگەکېشا جە دەسدېنۍ جە وەختېنە جە سوید و هۆڵەندانە وەڵېکۊتەیشا بەدەسئارڎەن. بەگرڎیی سەوزەکۍ جە سەرانسەرو ئەوروپاینە کورسیەکېشا جە دەس دېنۍ.
