نزیکەو ٤٠ ساڵان جە کەشەکاو کوردسانینە بە سەرمەشقایەتی گەریلای جە دژوو دەوڵەتو تورکی قڕکەری-فاشیستی و چەتەکاش مدرامانی بێهامتا مکریۆ. گەریلا چا مدرامانانە هەم دژوو تەکنیکی زەمینی و ئاسمانی دەوڵەتو تورکی، گازی کیمیاویی و تەقەمەنی قەڎەغەکریای گژیۊنە، هەمیچ ژیۋایچ ۋېش رێکوزۆ. گەریلا ماوەو دەیان ساڵانە بەردەوام وەڵېکۊتەن، بەردەوام ۋێش تازەکەردەنۆ و گرڎ وەختۍ سوپرایز و هەنگامەی چەمەڕانەکریۍ ئەنجام مڎۆ. دەوڵەتو تورکی، دەسەڵاتداری جەنگی تایبەتی فاشیستی ئاکەپە-مەهەپەی و ئەردۆغان جە شوباتوو ٢٠١٨ ینە جە خواکورک، ساڵەکا ٢٠١٩-٢٠٢٠ جە هەفتانین و جە شوباتوو ٢٠٢١ ینە هجوومش کەرڎ سەرو گارەی و هەڕێمەکاو پارېزنای مەدیای. جە هجوومەکەو سەرو گارەینە بۆمب، تەقەمەنی قەڎەغە و چەکی کیمیاویی بەکار ئامۍ و یاسا میان نەتەوەییەکۍ پاشێلکریۍ. جە گارەنە هێزەکاو گەریلای هەپەگەی و یەژاستاری دژوو هجوومەکا ۋېشا رێکوست و ڕاشا نەڎا کە سوپاو تورکی چا هەرێمەنە باڵادەس بۆ.

ۋەروو ئانەیچ سوپاو تورکی گازی کیمیاویی ژەعراوی و تەقەمەنی قەڎەغەکریاش بەکارئارڎ و جە هەرێمەکەنە کیشیاوە. بەکارئاوردەی چەکی کیمیاویی نیشانۍ قەوەتی نییەنە، بەپێچەوانۆ نیشانۍ دەرونۍ وڕاین. دماو ٢ مانگا سوپاو تورکی جە دژوو زاپ، مەتینا و ئاڤاشینی دەسش بە هجوومی کەرد. دەوڵەتو تورکی بەکارئاوردەی ئی گازە ژەعراوییا، کە بە پاو یاسا میان نەتەوەییەکا قەڎەغېنۍ درێژە پنە مڎۆ. سەرەڕاو بەکاربەردەی ئا گازە ژەعراویایچە جە تەرەفوو سوپاو تورکی ئەرەگیریۆ، کە پاشێلکەردەی یاسا میان نەتەوەییەکان و تاوانەو جەنگینە، بەڵام رێکوزیا میان نەتەوەییەکۍ چەمېشا سەرو ئا ئاژەیرە قوجنېنۍ. ۋەروو هامکاریی و پەشتیوانییەکا ناتۆی دەوڵەتو تورکی تاوانێوە پا جۆرە درێژە پنە مڎۆ. ۋەروو ئانەی پەیوەندییەکۍ رێکوزیا میان نەتەوەییەکا چنی ناتۆی عال مزانیۆ.

ۋەروو ئانەی رێکوزیا میان نەتەوەییەکۍ چەمپۊشیشا چا ئاژەیە کەرد و بێدەنگۍ بېنۍ، سوپاو تورکی ئەرەگیری بە گازی کیمیاویی ژەعراوی و تەقەمەنی قەڎەغە کۆنسێپتێوە تازەو هجوومیش ئاماڎەکەردەن. سوپاو تورکی جە ماوەکا وەڵتەرینە و جە شۊنمای جیاجیانە دژوو گەریلاکاو ئازاڎیی کورڎسانی چەکی کیمیاوییش بەکارئاوردەن. سوپاو تورکی ئەرەگیری جە ساڵەو ٢٠٢١یوە بە چەکی کیمیاویی ژەعراوی و تەقەمەنی قەڎەغەی هجوومەکېش بەسیستماتیک کەردېنۍ. جە ماوەو چوار ساڵی ۋییەردەینە هێزەکاو گەریلای هەم جە روو دیمەنیوە و هەمیچ بە بەڵگەی نویسیا، جە شۊنماو وەختی جیاجیانە بەکارئاوردەی مادەی کیمیاویی و تەقەمەنی قەڎەغەکریاشا جە تەرەفوو سوپاو تورکیوە پەی رای گرڎینوو کورڎسانی و جەهانی وەڵا کەردەنۆ.

ئەوە کۊڵیای چا چەکە کیمیاوییە ژەعراویا و ئا تەقەمەنیە قەڎەغەکریایا مکەرمۍ کە سوپاو تورکی ئەرەگیری جە ماوەو چوار ساڵا ۋییەردەینە بەکارش ئاوردێنۍ.

٢٠٢١: سوپاو تورکی ئەرەگیری ٢٥٦ جارۍ بە چەکی کیمیاویی و تەقەمەنی قەڎەغە هجوومش کەرد سەرو گەریلای

سوپاو تورکی ئەرەگیری دژوو گەریلاکاو ئازاڎیی کورڎەسانی جە هەرێمەکاو گارە/سیان، زاپ، ئاڤاشین و مەتیناینە بۆمبی قەڎەغەکریا و چەکی کیمیاویی کە سەرو ئاستی میان نەتەوەیی قەڎەغەن بەکارئاورڎەن و جە دژوو هەرێموو سېکوچکەو گارە، زەندورای سەر بە مەتینای، مامڕەشۆ، کەش و سۆری، ئارس فارس، کەش و کارتاڵی و وەرخەلێ ئاڤاسینی ٢٥٦ جارۍ بۆمبی قەڎەغە و چەکی کیمیاویش بەکارئاوردەن.

٢٠٢٢: دەوەتو تورکی ٣ هەزارۍ و ٢٨٠ جارۍ گازی کیمیاویی ژەعراوی و تەقەمەنی قەڎەغەش بەکارئارڎەن.

هجوومە ۋەرفراوانەکۍ سوپاو تورکی ئەرەگیری جە ساڵەو ٢٠٢٢ ېنە دژوو هەرێمەکاو پارېزنای مەدیای بە تایبەتی زاپ، ئاڤاشین و مەتینای بەردەوام بۍ. رژێموو فاشیستی ئاکەپە-مەهەپەی واچۍ زاپ، ئاڤاشین و مەتینای جە ماوەو دووۍ پەی یەرۍ حەفتانە ئەرەگیر مکەرۆ. دووۍ ساڵۍ سەرو ئا قساشارە ۋییەردەن. سەرەڕاو ئانەی مۆدێرنتەرین تەکنەلۆجیاو جەنگی، بۆمب و چەکی کیمیاویی قەڎەغەیش بەکارئارڎ و هامکاریچش جە پەدەکەی هۊرگېرت، نەتاواش ئامانج و پلانەکاش جابەجێ بکەرۆ. سەرو ئا بنەمایۍ جە ساڵەو ٢٠٢٢ېنە سوپاو تورکی ئەرەگیری بە گرڎیی ٣ هەزارۍ و ٢٨٠ جارۍ بە گازی ژەعراوی، چەکی کیمیاویی و تەقەمەنی قەڎەغەی هجوومش کەرد سەرو گەریلاکاو ئازاڎییی کورڎەسانی.

٢٠٢٣: سەرەڕاو قەراروو بێچالاکیچ بە چەکی قەڎەغە و کیمیاویی ١٠٤٧ جارۍ هجوومشا کەرد

دەوڵەتوو تورکی ئەرەگیری بۆنەو ١٠٠ ساڵەو کۆمارەکەیشۆ کە بناخەکەش سەرو دلېنەبەردەی گەلاو ئانادۆلی و گەلوو کوردی ئەرەمەرزیان بە پاڵنەڕی جیاجیا درێژەش بە هجوومە ئەرەگیریەکا ۋێش دان، بەڵام ئانېچ جە ماوێوە کەمەنە جە ۋەرا ۋەروو گەریلاینە شکسشا ئاورڎەن. گرڎوو هجوومەکا سوپاو تورکی ئەرەگیری جە ساڵەو ٢٠٢٣ ېنە شکسشا ئاورد. ۋەروو بومەلەرزەکەو ٦و شوباتی جە تورکیا و کورڎەسانەنە، هامسەرۆکایەتی دەسەی ڕاوەبەری کەجەکەی سەرەڕاو هجوومەکا جە ٩و شوباتینە ئەرەیاۋنابېش کە قەراروو بێچالاکیشا دان. سەرەڕاو ئی قەراریچە سوپاو تورکی ئەرەگیری هجوومەکېش نەمردنۍ و جە ۋەرا ۋەروو گەریلاینە بە گازی کیمیاویی و ژەعراوی قەڎەغە درێژەش بە هجوومەکاش دا. سوپاو تورکی ئەرەگیری جە ساڵەو ٢٠٢٣ېنە ١٠٤٧ جارۍ بە گازی کیمیاویی و تەقەمەنی قەڎەغە هجوومش کەرد.

٢٠٢٤: جە ماوەو پەنج مانگی یووەمینە ٣٥١ جارۍ تەقەمەنی کیمیاویی و قەڎەغە بەکارئامېنۍ

جە پەنج مانگەو سەرەتاو ساڵەو ٢٠٢٤ینە سوپاو تورکی ئەرەگیری بە گازی کیمیاویی و تەقەمەنی قەڎەغەی درێژەش بە هجوومەکاش دان. ناوەنڎوو ئەرەیاۋنای و چاپەمەنی هەپەگەی ڕووانە پەیوەست پا هجووما ئەرەیاۋنایش دان و جە بارەو ئاژەو جەنگی و هجوومەکایچ گرڎ مانگێوە ئەرەیاۋنای وەڵا مکەرۊوە. سەبارەت پانەی؛ جە پەنج مانگی یووەموو ساڵەو ٢٠٢٤ ینە سوپاو تورکی ٣٥١ جارۍ بە گازی کیمیاویی و تەقەمەنی قەڎەغە هجوومش کەرڎەن سەرو گەریلای. سوپاو تورکی جە ماوەو ٣ ساڵا و ٤ مانگانە جە هجوومەکاشەنە پەی سەرو زاپی، ئاڤاشینی و مەتینای بە گرڎیی ٥ هەزارۍ و ٤٥ جارۍ گازی کیمیاویی و تەقەمەنی قەڎەغەش بەکارئاورڎەن. ناوەنڎوو ئەرەیاۋنای و چاپەمەنی هەپەگەی جە ئەرەیاۋنای ۋېشەنە جە مانگەو حوزەیرانینە ئەرەیاۋنابېش کە سوپاو تورکی بە تایبەت جە هەرێموو مدرامانوو کەش و ئێف ئێمینە جە ۋەرا ۋەروو گەریلاکانە گازی کیمیاویی و تەقەمەنی قەڎەغەش بەکارئاورڎەن.

یەرۍ ساڵۍ و ٤ مانگۍ سەروو هجووموو سوپاو تورکی ئەرەگیریرە پەی سەرو مېڎانوو سێکوچکەو هەرێموو گارەی جە شوباتوو ٢٠٢١ یرە ۋییەرڎەن. پەیوەس پانەی سەرەڕاو ئانەی دەوڵەتوو تورکی بە ئەرەیاۋناو جەنگی تایبەتی و دەرونی ۋېش گرڎ ڕووۍ چېوۍ تازەش دیەنۆ و چا ڕېوە پەی ڕای گرڎینوو تورکیای و جیهانی پرۆپاگەندەش کەردەن، ئەردۆغان و رژێمە فاشیستیەکەو ئاکەپە و مەهەپەی سەرەڕاو ئانەی ئامانجەکەشا نەپێکان، پلان و ئامانجە تازەکېچشا جە چوارچێوەو قسانە مەناوە. جە ۋەرا ۋەروو ئانەینە ئەنڎاموو کۆمیتەو ڕاوەبەری پەکەکەی موراد قەرەیلان جە نەورۆزو ٢٠٢٤ینە بە سوپرایزێوە گەورە بەڵگە و دیمەنوو وستەیرە واروو درۆنی سیخوڕی و هجوومکەریش جە ڕاو واچېوە پەی جەهانی ئەرەیاۋنا. دماو ئا واچەیە ئاژەکە پېسە ئانەی رەوتوو جەنگی و هجوومەکا فاڕۆ، هۊرسەنگیۆ.