گوڵێ جمۆ جە بنەیانێوە خەڵکوو مەنتیقەو بلبلێی عەفرینی جە حەڵەبەنە جە ئەڎۍ بییە. دلۍ بنەیانێوە وڵاتپارێزنینە گەورۍ بیە. هەر زوو جمیەروو ئازاڎیی کوردیش ئشناسا. هەر جە زاوڵەیۆ ئاشنایەتیش چنی رابەروو گەلوو کوردی عەبدوڵا ئۆجالانی، کورڎەسانی و پەکەکەی بۍ. بە کاریگەری بەشداربیەو ئەنداما بنەیانکەیش جە تەمەنێوە کەمەنە رووەش کەردە کەشەکا کورڎەسانی. پەی ئانەی ۋێش بیاونۆ بە ژیۋایۍ تازەی نامۍ ڤیانێش ئەو ۋێش نیا.

ڤیان مەزڵومە پی جۆرە باس جە پرۆسەو بەشداربیەو ۋێش مکەرۆ: "من پېسە گەنجێوە هەستم بە ۋێم کەرد. پېسە گەنجێوە کە جە قەفەزەنە فڕێنە و ۋێش یاونان بە چرۆو درەختەکا. پېسە مریچڵێوە کە شۊنەو ئازاڎیرە گێڵۍ و  زانۍ چکۆنە هێلانېش کەردێنە، منیچ بەردەوام شۊنەو خیاڵەکامۆ بێنۍ. پەی ئانەی لایەق بە گەلەکەیم و ماواو ۋێم بوو، ئی ڕێمە گێرتەنە ۋەر."

پی جۆرە بە ئەشقێوە ئێژاوە بەشداریش جە ژیۋای هامڕاکاشەنە کەرد. زوو فێرەو ژیۋای کەشەکا بیە. دماو چن ساڵا کۊشیای جە کەش و مەتیناینە، چنی دەسپنەکەردەی هجوومەکا داعشی پەی سەرو ۋەرنیشتی لووا پەی وای و بەشداریش جەنە کەرد. ڤیان مەزڵومە تا ئازاڎبیەی ۋەرنیشتی گەلەکەش بە تەنیا جیاناست، سەرەڕاو ئانەی یەرۍ جارۍ جە جەنگەنە زامڎارە بیە، حەجگیز دەسبەردارەو کۊشیای نەبیە و درێژەش بە مڎرامانی دا.

ئیتر ئاماڎۍ بۍ کە بلۆ پەی بۆتانی

 دماو ئانەی کە خاکوو ۋەرنیشتی ئازاڎ کریا ڤیان مەزڵومە جارێوە تەر ڕووەش کەردۆ مېڎانەکا گەریلای جە کەشەکانە. ئیتر ئاماڎۍ بۍ کە بلۆ پەی بۆتانی. ڤیان مەزڵومە پەی ئانەی خیاڵ و ئاواتوو زاوڵەیی ۋێش بارۊنە دی گەرەکش بۍ بلۆ پەی جودی. ڤیان مەزڵومە گەرەکش بۍ حەرچی زووا وەرمەکاس بارۊنە دی و ساڵەو ٢٠١٥ ی ڕووەش کەردە بۆتان.

چنی ١٢ هامڕایاش تێکەڵ بە قافڵەو گەشمەرڎا بیە

بۆتانەنە جە چالاکیەکانە دژوو دوژمنی جە ریزەکا وەڵێوە بۍ. بە وەشەسیای و عەشقوو ئازاڎیی سەرو ڕاو سەرکەوتەی هەنگامەش نیا و نامۍ ۋێش جە داستانەکا مڎرامانینە نویستۆ. دەوڵەتوو تورکی ساڵەو ٢٠١٧ ی دەسش بە هجوومېوە ۋەروەڵای ئەرەگیری کەرد و بە تابەتی فەرماندۍ هەرێمەکەی دەلال ئامەدە (هولیا ئەرئۆغڵو) و ئازێ مەلازگردە (ئاسلی ئۆزکایا)ش کەردۍ ئامانج. جە ئاکاموو هجوومەکا سوپاو تورکینە پەی سەرو مېڎانوو بەستای بۆتانی ڤیان مەزڵومە سەرەڕاو فەرماندۍ قەرارگەو ناوەندی یەژاستاری دەلال ئامەدۍ چنی ١٢ هامڕایا ۋێش تێکەڵ بە قافڵەو گەشمەرڎا بیە.