کەجەکە دەنیز گەزمیش، یوسف ئەرسەلان و حوسەین ئینانش یاڎۍ کەردۍ و داواش جە هێزە دیموکراسییەکا کەردە بە شێوێوە بەقووەتتەر دەوروو کۊشیای هامبەشی، پەشتیوانی و یۊبیەینە کوۍ باوە، ئامانجوو کوردسانۍ ئازاڎی و تورکیایۍ دیموکراتیکی پێکبارا.
هامسەرۆکایەتی کۆنسەو ڕاوەبەری کەجەکەی بە ئەرەیاۋنێوە جە ٤٢ەمین ساڵوەگەڕوو جە قەنارەدایشانە، دەنیز گەزمیش، یوسف ئەرسەلان و حوسەین ئینانش یاڎۍ کەردۍ. ئەرەیاۋناکەی پی جۊرەنە:
"جە ٤٢ەمین ساڵوەگەڕوو جە قەنارەدایشانە، بە حورمەتۆ یاڎوو دەنیز گەزمیش، یوسف ئەرسەلان و حەسەین ئینانی کە یۆنۍ جە سەرمەشقا جمیەروو سۆسیالیستی تورکیای، مکەرمېوە. جە کەسایەتی ئاڎیشانە گرڎوو گەشمەرڎا ئاخێزی و دیموکراسی بە ڕێز و منەتبارییەوە یاڎۍ مکەرمۍ، جارێتەر وەعدوو سەرکەوتەیما کە دانما بە گەشمەرڎاما واوەی مکەرمېوە. سیستمی فاشیست، چەوەسنەر و قڕکەری بە تنی شەرمەزار مکەرمۍ.
دڵگرانێنمۍ بە گیان جە دەسداو سەرمەشقوو جمیەروو سۆسیالستی تورکیای ئیلهام ئاراسی. هامڕا ئیلهام ئاراس خەباتێوە فرەش کەرد پەی کۊشیای دیموکراسی و سۆسیالیزمی، بە پەشتیوانی گەلوو کوردی پەی بەقوەتکەردەی کۊشیای هامبەشی بی بە خاوەن خەباتێوە گۊرە. بەڕێزۆ یاڎش مکەرمېوە، جە ۋەرا ۋەروو هەڵوێس، کۊشیای و خەباتیشەنە بە ڕێزدارییوە سەرەما منامنمێرە.
تاریخ هەمیشە ئا کەسایەتیێشە شکۆمەنڎۍ و ئێژا کەردێنۍ کە پەی ئازاڎیی گیانوو ۋێشا هەمیشەیی کەرد، مەخلوقی خراپەکاروو سیستموو ئەرەگیریشا جە تاریکایەتی ۋێشانە شارتەنۆ. ئانۍ کە گەرەکشابۍ بە جە قەنارەدای متاوا هیواو ئاخێزی و ئازاڎیی دلېنەبەرا ۋێشا فریوودا، خەتە و هیواو ئازاڎیی سەرکۊت. چنەشا بۍ چانیشا کە بە کوشتەی بتاوا شۆڕشگێڵنا بکوشا، ۋێشا مەردۍ، شۆڕشگێڵنۍ گرڎ وەختۍ دڵوو گەلانە و جە کۊشیایشانە یاڎ مکریاوەا. پېسە گرڎوو شۆڕشگێڵنە سەرمەشقەکا جمیەروو سۆسیالیستی تورکیای دەنیز، یوسف، حوسەین هەمیشە جە دڵ و کۊشیای گەلانە یاڎ مکریاوە.
ڕابەرا جمیەروو سۆسیالیستی تورکیای کە جە کەسایەتی دەنیزەکانە یاڎشا مکەرمېوە، میراتیێوە گەورەشا پەی جیا ئاستیمی. ئی میراتییە ستراتیجوو کۊشیای هامبەشوو گەلان و یوتۆپیایی ژیۋای ئازاڎیی، سۆسیالیستی و دیموکراتیکیا. ئەنەیاوای چی ڕابەرا و دڵسۆزیی پەیشا، بە بنەماگېرتەی ستراتیجوو کۊشیای و یوتۆپیایی ئاڎیشا بۆ. تەڤگەرمان جە نزیکبیەیۆ وێشەنە ئینەش کەرد بە بنەما، جە سەرەتاوە حەتا ئیساتۍ ئی نزیکایەتییە بەردەوامیش هەن. دڵسۆزی ڕابەر ئاپۆی بە ئامانجوو ژیۋای ئازاڎیی، دیموکراتیکی و یۊبیەی گەلا و کۊشیای ئێژای کە نیم سەڎەن بەردەواما، حەرپاسە حۊڵدایە بێهامتاکێش مشناسیاوە. ڕابەر ئاپۆ کە بە کاریگەری ڕابەری گەورەو جمیەروو شۆڕشگێڵنی تورکیای ماهیر چایانی دەسش بە کۊشیای کەرد، پەکەکەش وەشکەرد، کوردسانی ئازاڎ و تورکیایۍ دیموکراتیکی کە ۋێش مسپارۆ بە یۊبیەی ئازاڎیی و دیموکراتیکی گەلا مکەرۆ بە ئامانجوو ۋێش، پەی ۋێش کەردش بە ئامانج کە کۊشیای سۆسیالستی دیموکراتیکی تورکیای و کۊشیای ئازاڎیی کوردسانی بکەرۆ بەیۆ. کۊشیای ئازاڎیی کوردسانی سەروو خەتەو سۆسیالیستی دیموکراتیکی وەڵێکۊتەی گۊرەش خوڵقنا و هۊرچەرخیا پەی کۊشیاو تورکیایۍ دیموکراتیکی ئازاڎیی، جە ۋەرکەوتوو دلېڕاسەی دیموکراتیکی. ڕابەر ئاپۆ کە بە هێزوو دڵسۆزی نەریتی سۆسیالستی شۆڕشگێڵنی، بە پرۆژەو سیستمی کۆنفیدراڵیزمی دیموکراتیکی و پارادایمی نەتەوەیی دیموکراتیکی ڕاو ڕاسی ڕزگاریش نیشانەو گەلا، ژەنا، مرۆڤایەتی دا و چارەسەری ژیۋای ئازاڎییش دەسنیشانکەرد.
مۆدێرنێتەی سەرمایەداری کە ئینا دلۍ قەیرانۍ و هۊرشێویایۊینە. سیستموو پاوانوازی سەرمایەداری بە جەنگی جیهانی یەرەمۆ ڕێبازوو خۆسەری ۋێش ڕاوەبەر مکەرۆ، حۊڵمڎۆ دلۍ ئی ئاژەینە ۋێش ڕزگاربکەرۆ. مۆدێرێنیتەی سەرمایەداری بەرەوو جە یۆترازیای و هۊرشێویایۆ ملۆ. جە لېوەتەرۆ گێڵای مرۆڤایەتی پەی ژیۋایۍ ئازاڎیی، کۆموناڵی و دیموکراتیکی گرڎ ڕووۍ بەقوەتتەر بۆ. ئینەیچ جە کوردسان، تورکیا و ۋەرکەوتوو دلېڕاسەینە فرە بە ڕۊشنی بەرگنۆ. ستراتیجوو کۊشیای هامبەشوو گەلوو کوردی و گەلا تورکیای ئەنجامێوە گرنگش خوڵقنا. سیستمی فاشیستی پڵۊسنەر جە کەسایەتی ئاکەپە-مەهەپەینە گورزێوە قورسەش واردە. پەی ئێمەی هێزەکاو سۆسیالیستی، دیموکراتیکی و ئازاڎیوازی ئەرکێوە بنەڕەتییا کە ئی ستراتیجیە قوڵتەر بکەرمېوە، بە تەمامی فاشیزمی هۊرشێونمێوە و تورکیای دیموکراتیک بکەرمۍ. تاریخ ۋەرپرسیاریێوە پی جۊرەشە ڕادەسوو ئێمە کەردەن. پێویسا ئێمەیچ بە دەوری تاریخی ۋێما هۊربێزمۍ، پەشتیوانی و یۊبیەی گەلا هێقم بکەرمۍ و دەوری تاریخیما جابەجێ بکەرمۍ. جە قۆناغێوە پی جۊرەینە کە فاشیزم گورزێوە گرانەش واردێنە، تەنیا سەروو بناغەو یۆبیەی هێزی دیموکراتیک و فراوانکەردەی کۊشیای متاویۆ فاشیزم دلېنەبریۆ و چەمەڕاییەکۍ ئازاڎیی و دیموکراسی گەلوو تورکیای پێکبۍ. پێویسا هێزەکاو دیموکراسی یۆبیەی و پەشتیوانی هېقم بکەرا و سەروو ئی بنەماییۍ کۊشیای بکەرا. قەناعەتما پاسەن هەڵوێسی هەرە بە ماناو دڵسۆزی پەی یاڎ کەردەیۆ دەنیزەکا پی جۊرەنە، سەروو ئی بنەمایۍ داوا مکەرمۍ جە هێزەکاو دیموکراسی جە دەوروو کۊشیای هامبەشی، پشتیوانی و یۆبیەینە عالتەر کوۍ باوە، ئامانجوو کوردسانی ئازاڎیی و تورکیایی دیموکراتیکی پێکبارا."
