کۊششکاروو گروپوو یورومی جەمیل کورت ماوەو ١٠٤ ڕوان پەی داواکاری فاڕایۆ جە زیڼانو ژمارە ١ و ئەرزڕومینە مانیش جە واردەی گرتێنە. تاتەو کورتی دورسون کورت ئەرەیاۋناش، "پەی ئانەی داواو فاڕایۆ ڕۊڵەکاما جابەچێ بکریۆ، مشۊم مرانە؟".
زیڼانیا سیاسی جە زیڼانەکاو تورکیاینە کە گۆشەگیری قورسشا سەرەرە سەپیۆ، ۋەروو ئانەی ئاسانتەرین داواکاریشا پەی فاڕایۆ جابەجێ نمەکریۆ ناچار چالاکی مانگرتەی ئەنجام مڎا. یۆ چانیشا زیڼانی سیاسی و ئەنداموو گروپوو یورومی جەمیل کورتا کە گەرەکشا جە زیڼانی ئاسایشوو چڕی ژمارە ١و دوملوی ئەرزڕومیوە فاڕیۆوە پەی زیڼانێوە ئیستەنبوڵی کە بنەیانەکەش چا شارەنە مژیۋا.
ماوەو ١٠٤ ڕوان ئا زیڼانیە سیاسیە مانیش جە گرتێنە. دورسون کورت تاتەو جەمیل کورتی جە واچێوەنە پەی ئاژانسەکەیما باسش چانەیە کەرد، کە بە مەڵامەتوو مانگرتەیۆ وەزنەو کوڕەکەیش پەی ٣٩ کیلۆگراما وەستەنەرە و داواش کەردە گرڎ کەسۍ چا بارۆ هەڵوێسش بۆ و بە حەزەرۆ مامەڵە بکریۆ.
'وەزنەو جەمیلی پەی ٣٩ کیلووا وەستەنەرە و ئاژەو ئالیشانیچ دژوارا'
دورسون کورت ئانەش وست ڕووە کە کوڕەکەش ئەنداموو گروپوو یورومیا جە ساڵەو ٢٠٢٢ وەختۍ جە دژوو قەدەغەو کونسێرتی مردێنېوە بە شێوێوە نایاسایی گیریێنۍ و ئانەش وست ڕووە، "جە ٢١و ئادارو ٢٠٢٣ کوڕەکەم جە زیڼانوو سیلڤری پەی زیڼانوو ئاسایشوو چڕی دوملوی ئەرزڕومی دووروزیاوە. چا وەختۆن ژیۋایما فاڕیان پەی زیڼانی، ۋەروو مەڵامەتوو نەوەشی و کەم دەسی من جە روو ئابوریوە، نمەتاوو بەردەوام بلوونە پەی سەردای کوڕەکەیم. زیڼانوو دوملوی پېسە بیرۍ چامنەن، ئانە زیڼان نییا، ژوورەکېش پېسەنۍ قوتوۍ، ڕاو هەناسەدا و هەوا فاڕایشا نییا. کوڕەکەم چنی هامڕێوەش بە نامۍ ئالیشان گوڵی گۆشەگیر کریان. ئاڎیچ بە داواکاری فاڕایۆ مانیش جە واردەی گرتێنە. دماجار کە بە تەلەفون قسېم چنی کوڕەکەیم کەردە واتش، وەزنەم پەی ٣٩ کیلووا وەستەنەرە و ئاژەو ئالشانیش دژوارا".
'با گۊش جە داواکاریما بگیریۆ'
کورت ئانەش وست ڕووە کە داواکاری فاڕایۆ ئاسانتەرین داواکارییا و متاویۆ جابەجێ بکریۆ و واتش، "رۆڵەکێما پاگیرێنۍ کە تا داواکاریەکێشا جابەجێ نەکریا درێژە بە چالاکیەکاشا بڎا. پەی ئانەی داواو فاڕایۆ رۆڵەکاما جابەجێ بکریۆ مشۆم مرانە؟. با دەنگوو ئێمە بژنەویۆ و گۊش جە داواکارییەکاما بگیریۆ".
