جە ۋەرا ۋەروو هرووژم و ئەرەگیریەکا دەوڵەتو تورکینە پەی دلۍ خاکوو کورڎەسانی و پاشێلکارییەکاش، کەسایەتی و ڕۆشنۋیرەکا پانیشتوو کورڎەسانی هەڵوێسوو ۋێشا بەربڕی و واتشا: 'پەنەوازا دژوو ئەرەگیرا گرڎما یۆگېرتۍ بیمۍ".
چی دماییانە دەوڵەتو تورکی هرووژمەکێش پەی سەرو خاکوو کورڎەسانی و بەتایبەت پانیشتوو کورڎەسانی چڕۍ کەردێنێوە و تا مۍ زیاتەر هەوڵوو پەلاماردای و ئەرەگیرکەردەی مڎۆ، سەرو ئی مژاریە کاسایەتییەکاو پانیشتوو کورڎەسانی هەڵوێسوو ۋێشا بەربڕاو ماچا پەنەوازا دژوو ئەرەگیرا گرڎما پېوەرە ڕووبەڕوو هرووژمەکا بیمېوە.
ئەچی بارۆ ڕێبوار ئەحمەد، ئەنداموو ئەنجومەنو پارێزگاو سلێمانی، سەبارەت بە هرووژم و ئەرەگیریەکا دەوڵەتو تورکیای ئەرەگیری و ئامای دلۍ خاکوو هەرێموو کورڎەسانی پەی ئاژانسوو هەواڵوو فوراتی (ANF)ی قسېش کەردۍ و واتش: "جە گرڎوو ڕێکوزیاکا مافوو مرۆڤینە قەرار سەرو ئانەی دریان کە هەر خاکێوە سنورێوە جوگرافیی و سیاسی ۋێش هەنش و پەنەوازا پاشێل نەکریۆ، بەڵام دەوڵەتو ئەرەگیرو تورکی ئامان دلۍ خاکوو کورڎەسانی و گرڎوو سنورەکاس بەزنان، هەر پۊکەی پەنەوازا خەڵک کاروەدای و هەڵوێسوو ۋێشا برمانا پەی پارێزنای خاکوو کورڎەسانی."
هەر سەبارەت پی مژاریە، نویسەر جەلیل عەباسی هەڵوێسوو ۋێش بەربڕی و واتش: "دوژمناو کوردی هەمیشە جە ڕاو دای گژۍ یۆیرەو کوردی دلۍ یۆترینینە و تەماشەکەردەیشا جە دوورۆ، هرووژم و ئەرەگیریەکێشا پەی لووێنۍ سەر، کورد فرەو وەختی چی شەڕە کەڵەشێرانانە بیەن ۋەرا ۋەر بە یۆترینی، هەر ئی مەڵامەتنە پاسشە بە حیزب و لایەنە سیاسییەکایچ کەردەن مەسڵەحەتوو حیزبی وەڵۍ مەسڵەحەتوو خەڵکی بوزا و بۆنەو دەسکەوتوو حزبەکەیشاوە چنی دوژمنەکاو کوردی ڕێکۍ گنا، بەپەیلواو من چی ئاژەو ئیساتێنە ئێمە پەنەوازما پانەینە دلۍ ۋێمانە ڕێکۍ گنمۍ و ڕووبەڕوو دوژمنی مردمېوە."
