جە چوارچێوەو قۆناغەو دووەمو هەڵمەتەو 'ئازادی پەی عەبدوڵا ئۆجالانی، چارەسەری پەی پرسو کوردی' چالاکیۍ ساز مکریا. جە شارو بێلینزۆناو کانتۆنو تیچینۆی سویسرای کە زۋانی ڕسمی چا ئیتاڵییا، جە ناوەندو جەمەو دیموکراتیکی کوردینە پاننێلێوە سازکریا.

سەرۆکو کۆمیتەو 'ئازادی پەی عەبدوڵا ئۆجالانی جە سویسرا' د. بیپێ ساڤاری-بۆریۆلی، سەرۆکو جەمەو کولتوری پونتۆ رۆسۆی ئیتالیای رۆبێرتی ماپێلی، بە نامۍ جەمەو دیموکراتیکی کوردیچ ئەحمەد یامان پېسە قسەکەرا قسێشا کەردۍ.

د. بێپێ ساڤاری – بۆریۆلی جە سەرەتانە قسێش کەرڎۍ.

'پەی ئازادیی عەبدوڵا ئۆجالانی زیاتەر ئەرەکۆشمۍ'

د. ساڤاری باسش چانەی کەرڎ کە رابەرو گەلوو کوردی عەبدوڵا ئۆجالانی نەک هەر پەی کوردی جە هەمان کاتەنە پەی گرڎو گەلا رابەر و سەرکردێوە گرنگا. د. ساڤاری ئەرەیاۋناش، پەی ئانەی هەڵمەتەو ئازادی سەرگنۆ مشۆم زیاتەر ئەرەکۆشمۍ و واتش، "پەی ئازادی ئۆجالانی ساڵۍ چێوەڵتەر هەڵمەتێوە دەسشپنەکریا. پەی ئانەی ئا هەڵمەتۍ سەرگنۆ پەنەوازش بە هەوڵدای زیاتەری هەن. ئا جەنگەی جە ۋەرکۆتوو مېیامینینە ڕووە مڎۆ سات بە سات چەمڎاری و شۆنیرە لوایش پەی مکەرمۍ. ڕاو رزگاربیەی چا جەنگەیە پاڕادایمو نەتەوەی دیموکراتیکی عەبدوڵا ئۆجالانیا. جە ڕاو ئا پاڕادایمەیۆ گەل بە بێ کوشتەی یۆترینی بە شێوێوە ئاشتیانە متاوا پێوەرە بژیۋا. کورد جە ۋەرکۆتوو مېیامینینە خاوەنو جمېیەرێوە شۆڕشگێڵنیا. ئۆجالان عەیامۍ چێوەڵتەر وەڵۍ وینایش پەی ڕووەدایەکاو ئیسەی کەردەبۍ. چارەسەری ئینا دلۍ پاڕادایمو ئۆجالانینە. ئۆجالان نەک هەر پەی کوردا، بەڵکم پەی گرڎو گەلا کاراکتەرێوە گرنگا و مشۆم بە زووتەرین کات ئازاڎ بکریۆ. پەی ئازادی ئاڎیی ئێمە زیاتەر ئەرەکۆشمۍ".

لاو ۋێشۆ رۆبێرتۆ ماپێلی سەرنجش وست سەرو گرنگی ئەندێشەکاو رابەرو گەلوو کوردی عەبدوڵا ئۆجالانی پەی ۋەرکۆتوو مېیامینی و ئەوروپای و واتش، "ئۆجالان ئێمەیچ و گلېرگەکا ئۆروپایچ فێر مکەرۆ و ۋەنەما پنە مڎۆ".

ماپێلی پا جۆرە عەبدوڵا ئۆجالانش پېسە سەرکردێوە پێناسەکەرد کە وەڵۍ ۋینای پەی ئاینڎەی مکەرۆ و جە درێژەنە واتش، "ئەندێشەکۍ ئۆجالانی سەرو پەرسو ئازادی ژەنا فرە گرنگا. ئەرەکۊشایۍ کە ۋەرنیشتەنە دژو داعشی کریا، مشۆم پەی گرڎ کەسۍ باس بکریۆ".

ماپێلی ژەنا کوردی کە جە ۋەرنیشتەنە ئەرەکۆشا پېسە نمونێوە ئاردێشۆ و ئاماژەش پەی ئەندێشەکاو عەبدوڵا ئۆجالانی جە بارەو ژەنۍ و ژیۋگەیۆ کەرد. ماپێلی واتش، "مشۆم ئەندێشەکۍ عەبدوڵا ئۆجالانی وەڵۍ بکریاوە. گۆشەگیری درێژخایەنو سەرو ئاڎیی مشۆم دەموودەس هۆربگیریۆ، پۊکەی گرنگە پەرە بە ئەرەکۊشای بڎریۆ".

'مشۆم ئێمە چالاکییەکا قەوەت بکەرمۍ'

ئەحمەد یامانیچ جە بارەو گۆشەگیری رەهاو سەرو رابەرو گەلوو کوردی عەبدوڵا ئۆجالانی هۆرسەنگنای ۋەرفراوانش کەرد و سەبارەت بە هەڵمەتەو ئازادیچ واتش، "ئا هەڵمەتۍ پەی رابەر ئاپۆی دەسش پنەکەردەن، ساڵێوەش پەڕکەردۆ. چالاکی گرنگ ئەنجامدریان. ئانەیچ گرنگا، بەڵام ئی چالاکیۍ نمەتاوا ئازادی مسۆگەر بکەرا. جە قۆناغەی تازێنە پەی ئانەی هەڵمەتەکۍ سەروزیۆ، چالاکی قەوەتتەر ئەنجام مڎەیمۍ".

پانێلەکە بە واتەیۆ دروشمەکا 'بژیۋۆ ئۆجالان، بژیۋۆ کورڎەسان' دمایش پنە ئاما.