کۆمیتەو گەشمەرداو پەژاکی بە بۆنەو ساڵیادوو گەشمەردەبییەی چوار ئەنداماو کە وەخت و شۆنەی جیاجیێنە گەشمەردێ بیێ، یادوو ئا گەشمەردا بەرز ئرمانان و جەختش سەروو پابەندبییەی بە ئاواتوو گەشمەردا و کۆشیای پەی ئاردەیدی ئامانجەکاشا کەردەن.
کۆمیتەو گەشمەرداو پارتوو ژیوای ئازادوو کوردستانی (پەژاک)، بەیاننامێوەنە بە بۆنەو نۆزدەمین ساڵیادوو گەشمەردەببییەی دڵبرین ماکۆی، هەژدەمین ساڵیادوو گەشمەردەبییەی شاهۆ دیجلەی و سیروان بێستونی و چوارەم ساڵیادوو گەشمەردەبییەیی ئاریوان شۆڕشگێڵنی یاد و نامێ ئەو گەشمەرداشە بەرز ئرمانێنە و داواش وەنەو سەرجەموو خەڵکوو وەرکەوتوو کوردستانی، بەتایبەتی ژەنا و گەنجا کەردێنە، کە ڕاو بەشدارییوە جە ڕیزەکاو گەریلاینە یاد و ویرەوەریی گەشمەردا بەرز برمانا.
ئەرەیاونایەکەنە ئامان، "٢٤و حوزەیران (ژوئەن)وو ٢٠٢٤ ، هاموەختا چەنی نۆزدەمین ساڵیادوو گەشمەردەبییەیی هامڕا محەمەد لەتیف ئەمیری ئشناسیا بە دڵبرین ماکۆی، هەژدەمین ساڵیادوو گەشمەردەبییەی هامڕایا زاهید حیسامی ئشناسیا بە شاهۆ دیجلە و محەمەد عەلی سەیدی نئشناسیا بە سەیوان بێستون و ڕۆو ٢٥و ژوئەنیچ چوارەم ساڵیادوو گەشمەردەبییەی هامڕا ڕێبوار قولی زادە بە نامێ کۆد ئاریوان شۆڕشگێڵنی. پی بۆنەوە یاد و ویرەوەریی ئا کۆشەرە شۆڕشگێڵنە هەقەتیناو گەلی و هەرپاسە یادوو سەرجەموو گەشمەرداو مانگەو ژوئەنی بەرز مرمانمێ".
ئەرەیاونایەکەینە ئامان، دڵبرین ماکۆ ساڵەو ١٩٨١ بنەیانێوی وەڵاتپارێزننە دەگاو بەغچەلوو سەر بە شاروو ماکۆی ئامان دنیاوە، ساڵەو ١٩٩٩ دماو پیلانگێڵنیی میاننەتەوەیی دژوو ڕابەروو گەلوو کورد ی عەبدوڵا ئۆجالانی دەورش جە ڕێکوستەی وێنیشانەدای و ناڕەزایەتییەکانە وەراوەر پا پیلانگێڵنییە بییەن و هەمان ساڵەنە پێوەس بییەن بە ڕیزەکاو گەریلایوە و ئەرەمەرزنای پەژاکیچنە ساڵەو ٢٠٠٤ دەوری سەرمەشقانەش دییەن و ٢٥/٦/٢٠٠٥ جە بۆسێوی هێزەکاو دەوڵەتوو ئێرانینە و بەکرێگیریایانە مەنتێقەو دەشتەبێلوو سنۆینە دماو جەنگێوی سەخت و وێگێریێوی قارەمانانەی گەشمەردە بییەن.
سەبارەت بە گەشمەردە سەیوان بێستونیچ ئامان: ساڵەو ١٩٨١ کرماشانەنە پەیدا بییەن و دماو ئشناسای ئەندێشەکاو ڕابەروو گەلوو کوردی عەبدوڵا ئۆجالانی ساڵەو ١٩٩٨ پێوەس بییەن بە ڕیزەکاو گەریلایوە و پێسەو کۆشەرێوی کۆڵنەدەری و جەوێویەردەی گردوو هەرمانەکاش بەسەرکەوتەیی کەردێنێ و پێسەو فەرماندێوی گەنجی و ئازای ساڵەو ٢٠٠٦ جەنگنە دژوو سوپاو تورکی ئەرەگیرکەری هەرێموو زاپینە دماو چند ڕوا مدرامانی شکۆداری گەشمەردە بییەن.
ئەرەیاونایەکەو کۆمیتەو گەشمەرداو پەژاکیچەنە بارەو گەشمەردە شاهۆ دیجلەیجۆ ئامان، کە ساڵەو ١٩٨٠ شاروو جوانڕۆینە ئامان دنیاوە، ساڵەو ١٩٩٩ دماو بەشداریێوی جە ڕێکوستەی ناڕەزایەتییە جەماوەرییەکانە دژوو پیلانگێڵنیی میاننەتەوەیی پێوەس بییەن بە ڕیزەکاو گەریلایوە و پێسەو گەنجێوی ڕۆشنویری و ئاردەینەری یاواینەی قووڵش سەروو ئەندێشەکاو ڕابەروو گەلوو کوردی عەبدوڵا ئۆجالانی بییەن و کایێ ڕۆنامەگەرییچنە یاگەدەسش دیار بییەن و ئەنداموو ناوەندوو ئەرەیاونای و چاپەمەنیی پارتوو ژیوای ئازادوو کوردستان (پەژاک)ی بییەن و ٢٤/٦/٢٠٠٦ جەنگنە دژوو سوپاو تورکی ئەرەگیرکەری هەرێموو زاپینە چەنی شش هامڕایاش گەشمەردە بییەن. ب
حەرچی سەبارەت بە گەشمەردە ئاریوان شۆڕشگێڵنیچا، پەیدابییەو بۆکانین و گەنجێوی ونگەرم و نیشتمانپەروەر و وەشەسیاو لاو خەڵکی بییەن، کە بە یاواینەی جە "ئەرەگیرکەری سیستموو دەسەڵاتداریی ئێرانی و دۆخی نالەباروو گلێرگەی و یاواینەی دروس جە پەرسەو کوردی ڕاو کەشە سەرکەشەکانە و درێژەش دا بە ڕێبازوو سەرمەشقا پێسەو عاکیف مامۆ زاگرۆس، دلێر بۆکان، دڵگەش و ئاراسی و ماوێوە کوڵنە کەوت وەڵێ و تەوەنەو بناخەو ئازادیوازی و سەرمەشقایەتیی شۆڕشگێڵنانەیش بە پتەوی نیارە و بەگیانبازانە کۆشیا. گەشمەردە ئاریوان ٢٥/٦/٢٠٢٠ ئەنجاموو هجوومێوی عاسمانیی سوپاو تورکی ئەرەگیرکەرینە پەی سەروو مەنتێقەو شارباژێڕوو سلێمانی گەشمەردە بی.
ئاخۆ وچیان ، "جارێوی تەر جگە جە بەرزئرمانای یاد و ویرەوەریی هامڕایا "دڵبرین ماکۆ"، "سیروان بێستون"، شاهۆ دیجلە" و "ئاریوان شۆڕشگێڵن و سەرجەموو گەشمەرداو ڕاو ئازادیی، دیموکراسی و دادپەروەریی کۆمەڵایەتی، وەعد مدەیمێوە، کە پاڵپەشت بە میراتی بەنرخ و پەڕاوپەڕ جە ورەو ئی گەشمەردا، تا ئاردەیدیی ئامانج و ئاواتەکاشا کە بونیادنیای گلێرگێوی ئازاد و دیموکراتیکییا، درێژە بە کۆشییای مدەیمێ، هەرپاسە داوا وەنەو سەرجەموو گەلەکەیما بەتایبەتی گەنجا و ژەنا مکەرمێ بە بەشدارییشا جە ڕیزەکاو کۆشیای و پاگێرتەیرەینە سەروو ڕێبازوو گەشمەردا، یاد و ویرەوەریی گەشمەردا بە خاستەرین شێوە بەرز برمانا".
