ریپۆرتەری تایبەت بە تورکیای جە ئەنجومەنو پەرلەمانتاراو کۆنسەو ئەوروپای ستیفان شێناچ کە مانگۆو حوزەیرانی سەردای تورکیایش کەردەبۍ، ئەرەیاۋناش، جە سەرۋنەدای ئایندەیشەنە کە مانگۆو کانونو دووەمی ئەنجامش مڎۆ، داوامکەرۆ کە چەمش بە رابەر ئاپۆی گنۆ.
ریپۆرتەری تایبەت بە تورکیای جە ئەنجومەنو پەرلەمانتاراو کۆنسەو ئەوروپای ستیفان شێناچ جە مابەینو ١١-١٤ حوزەیرانی سەردای زینانەکا تورکیایش کەردەبۍ. شێناچ جە گوزارشتەکێشەنە جە بارەو سەرۋنەداکەیشۆ ئاماژەش پانەی کەرڎ، جە زینانەکانە ژمارێوە فرە پاشێلکاریۍ بیەیشا هەن. جە گوزارشتەکێنە گۆشەگیری سەرو رابەر ئاپۆی جە زینانی وزیایرەو ئاسایشی تنو جۆرو ئێفو ئیمراڵی باسش چۆ کریابۆ.
شێناچ جە دیڎارەنە چنی ئاژانسوو مێزۆپۆتامیای باسش چانەی کەرڎ کە، بە مەبەسو دیڎاری چنی رابەر ئاپۆی داواکاری بەرز مکەرۆوە. شێناچ ئاماژەش بە گۆشەگیری سەرو رابەر ئاپۆی کەرڎ و واتش، "گۆشەگیری زینانەنە جە دژو مافەکا مرۆڤین و ئینا ئاستو ئەشکەنجەینە. پەی دیڎاری چنی ئێژا ئۆجالانی منیچ داواکاری بەرز مکەرووە". شێناچ مانگۆو کانونو دووەمی دیسان سەردای تورکیای مکەرۆوە.
جە بەشێوەتەرو قسەکاشەنە شێناچ هێماش پەی دەسسەرەرەگێرتەی شارەوانییەکا کەرڎ و واتش، "سەرۆک شارەوانییەکۍ هۆرچنیێنۍ. حکومەت ناچارا کە مل پەی دیموکراسی بڎۆ".
شێناچ یاڎش ئارڎۆ کە تورکیا بە پاو قەرارەکا دادگاو مافەکا مرۆڤو ئۆروپای نمەجمۆوە و ئانەش وست ڕووە کە پەی بە یاگۍ یاونای ئا قەرارا هەوڵەکێشا بەردەوامێنۍ. شێناچ دەسنیشانش کەرد کە دەسەو شالیارایچ پاگیرا سەرو جابەجێکەردەی قەرارەکا.
